10 Ser di kunfiansa

KUZÊ KI KEL-LI SIGINIFIKA

Kes algen ki é di kunfiansa ta kunpri régras, ta kunpri ses promésa i sénpri es ta fla verdadi. Pur isu es ta ganha kunfiansa di ses pai ku ses mai, di ses amigu i di ses patron.

PAMODI KI KEL-LI É INPORTANTI

Kuazi sénpri, kantu más bu prova ma abo é algen di kunfiansa más liberdadi bu ta dadu.

“Midjór manera di bu djuda bu pai ku bu mai ten kunfiansa na bo, é mostra-s ma bo é un algen maduru i responsável, ka sô óras ki bu sta djuntu ku es, má tanbê óras ki bu ka sta djuntu ku es.” — Sarahi.

KONSEDJU DI BÍBLIA: ‘Nhos kontinua ta prova kuzê ki nhos é di verdadi’. — 2 Coríntios 13:5.

KUZÊ KI BU PODE FAZE

Ka ta nporta si bu krê pa algen ten más kunfiansa na bo ô si bu krê pa es torna ten kel kunfiansa ki es perde na bo, kes kuza li pode djuda-u.

Ser onéstu. Kuza ki más pode kaba ku kunfiansa ki algen ten na bo é mintira. Má, si bo é sinseru i onéstu, prinsipalmenti óras ki bu ta fadja, bu pode ganha kunfiansa di otus.

“É fásil ser onéstu óras ki tudu kuza sta ta bai dretu. Má óras ki bo é onéstu sikrê bu faze un kuza mariadu, na verdadi kel-li ta poi algen ta kunfia más txeu na bo.” — Caiman.

KONSEDJU DI BÍBLIA: ‘Nu krê konporta ku onestidadi na tudu kuza.’ — Hebreus 13:18.

Ser responsável. Fazedu un piskiza na Mérka ku pesoas ki ses trabadju é faze kontratu ku algen pa trabadja na ses enpréza. Kel piskiza ta fla ma 78 pursentu di kes algen fla ma ser responsável é “un di kes três kuza más inportanti ki es ta djobe na un algen pa es faze kontratu ku el.” Si bu prende ser responsável gósi, kel-li ta djuda-u tanbê óras ki bu bira grandi.

“Nha pai ku nha mai ta repara óras ki N ta ser responsável i N ta kunpri ku kel ki N ten ki faze sen es fika ta fla-m manenti. Kantu más N aji di kel manera li, más es ta kunfia na mi.” — Sarah.

KONSEDJU DI BÍBLIA: ‘N ten sertéza ma bu ta faze sima N sta pidi-u, pamodi N sabe ma bu ta ba faze inda más txeu di ki kes kuza ki N sta ta fla-u.’ — Filémon 21.

Ten paxénxa. Tudu algen ta odja klaru óras ki bu ta kria i bu ta fika más fórti, má ta leba ténpu pa es odja ma bu sta ta bira un algen maduru i responsável.

“Bu ka pode spéra ma bu ta ganha kunfiansa di bu mai ku bu pai i di otus algen sô pamodi bu aji di manera responsável sô un bês. Má bu ta ganha ses kunfiansa ku ténpu, si bu sforsa pa aji sénpri di manera responsável.” — Brandon.

KONSEDJU DI BÍBLIA: ‘Nhos bisti di paxénxa.’ — Colossenses 3:12.