Kriansas meste orientason di algen más grandi

PAMODI KI KRIANSAS MESTE ORIENTASONS DI ALGEN MÁS GRANDI?

Kriansas ta meste pa algen más grandi da-s konsedju i orientason. Anhos ki é pai ku mai, nhos é kes midjór algen pa orienta nhos fidju i kel-li é nhos obrigason. Má otus algen más grandi tanbê pode djuda i da bu fidju konsedju.

PAMODI KI ORIENTASONS DI UN ALGEN MÁS GRANDI É INPORTANTI?

Na alguns lugar, kriansas ta pasa poku ténpu ku algen más grandi. Kel-li ta kontise pamodi:

• Alguns kriansa ta pasa maior párti di dia na skóla, undi ten más kriansa di ki otus algen más grandi.

• Txeu pai ku mai ten ki bai trabadja, pur isu óras ki kel kriansa sai di skóla, el ta fika na kaza el sô.

• Un studu ki fazedu na Mérka fla ma kriansas ki ten 8 ti 12 anu ta gasta más ô ménus 6 óra pa dia ta odja tilivizon, ta uza internet i ta djuga jogus iletróniku.a

Un livrub ki ta pâpia sobri modi ki ta kriadu fidjus fla: “Envês di jóvens buska orientasons na ses pai ku ses mai, ses profesor ô otus algen más grandi responsável, es ta dexa ses amigu influensia-s.”

MODI KI BU PODE ORIENTA BU FIDJU

Pasa ténpu ku el.

PRINSÍPIU DI BÍBLIA: ‘Iduka mininu na kaminhu ki el debe anda; mésmu óras ki el bira bédju, el ka ta disvia di el.’ — Provérbios 22:6.

Normalmenti, kriansas ta krê ajuda i orientason di ses pai ku ses mai. Alguns spesialista ta fla ma pai ku mai ten más influénsia na ses fidju óras ki es é jóven ti ki es bira adultu. Un profesor di pisikolojia, skrebe na se livruc: “Pai ku mai é kes ki más ta influensia atitudi i konportamentu di ses fidju désdi jóven ti ki es bira adultu. Jóvens ta nporta ku kel ki bu ta pensa i ki bu ta fla-s, mésmu ki alvês es ka ta konkorda ô seta tudu kuza ki bu ta fla-s.”

Dja ki bu fidju krê resebe bu orientason faze tudu ki bu pode pa djuda-l. Pasa ténpu ku bu fidju, fla-l modi ki bu sta xinti, kuzê ki bu ta pensa sobri kuzas diferenti, kuzê ki é más inportanti pa bo i kuzê ki dja bu prende na bu vida.

Skodje un algen ki pode ser un bon izénplu pa bu fidju.

PRINSÍPIU DI BÍBLIA: ‘Ken ki ta anda ku algen ki ten sabedoria, ta ganha sabedoria’. — Provérbios 13:20.

Pensa na un algen más grandi ki pode ser un bon izénplu pa bu fidju. Kuzê ki bu ta atxa di insentiva bu fidju pa faze amizadi ku el? Kel-li ka krê fla ma kel otu algen ta ser responsável pa bu fidju. Má amizadi ku un algen más grandi ki é di kunfiansa pode konpleta kel orientason ki bu ta da-l. Bíblia ta mostra ma Timótiu, mésmu kantu el staba grandi, kel amizadi ki el tinha ku Paulu djuda-l i kel amizadi li tanbê djuda Paulu. — Filipenses 2:20, 22.

Oji txeu kriansa ka ta pasa ténpu ku ses avó, ses tiu, ses tia ô otus algen di ses família, pamodi es ta mora lonji di es. Si kel-li sta ta kontise ku bu família, djobe oportunidadi pa bu fidju prende ku kes algen más grandi ki ten kualidadis ki bu ta gostaba pa bu fidju ten.