Pamodi ki é inportanti sabe si ta izisti un Kriador

Pamodi ki é inportanti sabe si ten un Kriador ô nau? Si kes próva konvense-u ma ta izisti un Deus Tudu-Poderozu, talvês tanbê bu ta krê izamina kes próva ma Bíblia ben di Deus. I si bu kunfia na kel ki Bíblia ta inxina, el pode djuda-u di alguns manera.

Bu pode ten un vida más filís

BÍBLIA TA FLA: “[Deus] faze kuzas dretu... kantu el da nhos txuba di séu i ténpu di bon kodjéta. El da nhos txeu kumida i el intxi nhos korason di alegria.” — Atus 14:17.

KUZÊ KI KEL-LI KRÊ FLA: Tudu kes kuza ki bu gosta ki ten na naturéza é un prezenti di nos Kriador. I bu pode xinti más gratidon pa kes prezenti li óras ki bu diskubri ma nos Kriador ta preokupa ku bo.

Bu ta atxa bons konsedju ki pode djuda-u gósi

BÍBLIA TA FLA: ‘Bu ta intende kuzê ki é sértu, justu i dretu, i bu ta intende tudu bon kaminhu.’ — Provérbios 2:9.

KUZÊ KI KEL-LI KRÊ FLA: Deus é bu Kriador, pur isu el sabe tudu kel ki bu meste pa bu ser filís. Si bu studa Bíblia, bu pode prende txeu kuza ki ta djuda-u na bu vida.

Bu ta atxa respósta pa bus pergunta

BÍBLIA TA FLA: ‘Bu ta atxa konhisimentu di Deus.’ — Provérbios 2:5.

KUZÊ KI KEL-LI KRÊ FLA: Óras ki bu diskubri ma ta izisti un Kriador, kel-li pode djuda-u atxa respósta pa perguntas inportanti, sima: Kal ki é obijetivu di vida? Pamodi ki ten txeu sufrimentu? Kuzê ki ta kontise óras ki nu móre? Bu pode atxa bons respósta na Bíblia.

Bu ta ten un speransa pa futuru

BÍBLIA TA FLA: ‘Jeová fla: “N sabe dretu kuzê ki N sta pensa pa nhos. N krê pa nhos ten pas envês di disgrasa. N krê da nhos un futuru i un speransa.”’ — Jeremias 29:11.

KUZÊ KI KEL-LI KRÊ FLA: Deus promete ma na futuru el ta ben kaba ku maldadi, sufrimentu i ti mórti. Óras ki bu ta kunfia na kes promésa di Deus, bu ta konsigi infrenta kes prubléma di dia-dia ku koraji.

Bensons ki alguns algen resebe pamodi es kridita ma ten un Kriador

“Sénpri N ta fika dimiradu óras ki N ta odja modi ki Deus ta djuda-nu na txeu situason di nos vida. El ta djuda-nu sabe kuzê ki é más inportanti na vida, modi ki nu pode da dretu ku otus algen i modi ki nu pode ser se amigu.” — Cyndi, Mérka.

“Kridita na un Kriador ta poi nha vida ta ten más sentidu i ta ser más interesanti. Dja ki N ta kridita na un Kriador, nunka N ka ta fika infadadu pamodi ten txeu kuza bunitu pa prende sobri el, sobri se kriason i sobri se Palavra.” — Elise, Fransa.

“Faze kuzê ki nos Kriador ta inxina-nu na Bíblia ta djuda-m ser un algen más filís. Kel-li ta djuda-m ka kritika dimás, da más atenson pa otus algen i sta kontenti ku kes kuza ki N ten. Tanbê el djuda-m ser un pai midjór.” — Peter, Olanda.

“Antis di N prende sobri Deus, tudu kel ki N ta fazeba éra kume, durmi i sforsa pa txiga na trabadju na óra. N ta staba txeu stresadu! Gósi N ta odja vida sima un grandi prezenti, un prezenti ki nu debe pruveta i da valor.” — Liz, Stónia.

“Ami é un algen ki ta fika preokupadu faxi. Sabe ma un dia maldadi, injustisa i sufrimentu ta ben kaba, ta djuda-m lida midjór ku es prubléma ki N ten.” — Adrien, Fransa.