Pamodi ki pesoas ten falta di ruspetu pa otus algen?

PAMODI KI É INPORTANTI MOSTRA RUSPETU PA OTUS ALGEN?

Óras ki nu ta ruspeta otus algen, nu pode ivita pa un situason konplikadu bira piór.

Un provérbiu di Bíblia ta fla: ‘Un respósta mansu ta branda raiba, má un palavra duru ta omenta raiba.’ (Provérbios 15:1) Pâpia i aji di manera ki ta mostra falta di ruspetu é sima poi lenha na lumi, txeu bês kel-li ta traze maus rezultadu.
Jizus fla: “Bóka ta pâpia di kel ki korason sta xeiu.” (Mateus 12:34) Óras ki nu ta mostra falta di ruspetu, na verdadi kel-li ta mostra kuzê ki nu ta xinti pa pesoas ki é di otu rasa, tribu i país ô pa pesoas ki ten skóla diferenti di kel di nos.

Na un piskiza ki fazedu ka dura li na 28 país, partisipa 32 mil algen i 65 pursentu di es fla ma nunka es ka odjaba pesoas ta mostra falta di ruspetu sima gósi.

MODI KI BU PODE MOSTRA RUSPETU PA OTUS ALGEN?

Ka ta inporta si bu sta na skóla ô na trabadju, ruspeta tudu algen, sikrê nhos ka ten mésmu opinion. Djobe kuzas ki nhos pode konkorda ku kunpanheru. Kel-li ta ba djuda-u ka fika ta kritika ô julga otus algen.

“Nhos para di julga, asi pa nhos ka julgadu.” — Mateus 7:1.

Trata otus algen sima bu ta gostaba pa es trataba bo. Si bu trata otus algen ku bondadi i justisa, talvês es ta ba trata-u di mésmu manera.

“Sima nhos krê pa otus algen faze nhos, nhos faze-s di mésmu manera.” — Lukas 6:31.

Sta prontu pa púrdua. Ka bu atxa ma kel algen krê maguaba bo si el fla ô el faze algun kuza ki ka mostra bondadi.

‘Intendimentu di un ómi ta pô-l ka ta xatia faxi, i é un kuza bunitu di se párti dexa un ofénsa pasa.’ — Provérbios 19:11.

Un Salon di Reinu di Tistimunhas di Jeová. Antis di un runion di kongregason, pesoas di idadi i kultura diferenti sta ta kunprimenta ku amor i es sta ta pâpia ku kunpanheru.

MODI KI TISTIMUNHAS DI JEOVÁ TA INPENHA PA TEN RUSPETU PA OTUS ALGEN?

Tistimunhas di Jeová ta inpenha na mostra ruspetu pa otus algen na undi ki es ta vive i ki es ta trabadja.

Nu ta oferese studu di Bíblia di grasa pa tudu algen, má nu ka ta obrigada ningen pa seta kuzê ki nu ta kridita na el ô nos opinion. Envês di kel-li, nu ta tenta aplika konsedju di Bíblia di pâpia “ku brandura i ku txeu ruspetu” óras ki nu ta pâpia di nos mensajen. — 1 Pedru 3:15; 2 Timótiu 2:24.

Nu ka ta diskrimina ningen i nu ta resebe dretu na nos runion pesoas di tudu rasa ki krê prende kuzê ki Bíblia ta inxina. Nu ta sforsa pa nu “onra pesoas di tudu tipu,” sikrê nu ka ta konkorda ku disizons ki es ta toma. — 1 Pedru 2:17.

Nu ta ruspeta autoridadi di govérnu na undi ki nu ta mora. (Romanus 13:1) Nu ta obi ku lei i nu ta paga inpostu. I enbóra nu ka ta mete na pulítika, nu ta ruspeta direitu ki otus algen ten di toma ses própi disizon na asuntus ki ten aver ku pulítika.