Pamodi ki pesoas ten falta di ruspetu pa família?

PAMODI KI É INPORTANTI MOSTRA RUSPETU PA FAMÍLIA?

Óras ki kes algen na família ta mostra ruspetu pa kunpanheru, kel-li ta djuda pa ten un bon anbienti, undi ki maridu, mudjer i fidjus ta xinti suguru.

Livru Sete Princípios para o Casamento Dar Certo, ta fla ma óras ki maridu ku mudjer ta ruspeta kunpanheru, es ta mostra karinhu pa kunpanheru, “ka sô na kes kuza grandi, má tanbê na kes kuza pikinoti na ses dia-dia.”
Piskizas ta mostra ma kriansas ki prende ruspeta otus algen ta xinti dretu ku es mê, es ta da dretu ku ses pai i ku ses mai i es ta ten ménus prubléma mental.

MODI KI BU PODE MOSTRA RUSPETU PA FAMÍLIA?

Faze un planu djuntu ku bu família. Primeru, ten serteza ma tudu algen na bu família ta intende kuzê ki “mostra ruspetu” krê fla. Sugundu, skrebe kuzê ki bu krê pa kes algen di bu família faze, i kuzê ki es ka debe faze. Tirseru, nhos pâpia djuntu sobri kel planu, asi pa tudu algen sabe kuzê ki el pode faze pa mostra ruspetu.

‘Planus di un algen ki ta sforsa, di serteza ta ten bons rezultadu’. — Provérbios 21:5.

Da izénplu. Bu ta kritika kes algen di bu família pamodi ses fadja? Bu ta trosa di ses opinion ô bu ta iginora-s? Bu ta korta-s konbérsu óras ki es ta pâpia ku bo?

Sujiston: Mostra ruspetu pa bu maridu ô bu mudjer i pa bus fidju, ka ta inporta si bu ta atxa ma es ta merese-l ô nau.

“Nhos ser primeru na da ónra pa kunpanheru.” — Romanus 12:10.

Mostra ruspetu mésmu óras ki bu ka ta konkorda ku kel otu algen. Óras ki bu ta da bu opinion, ivita fla kuzas sima: “Abo sénpri” ô “Abo nunka”. Komentárius sima kes-li pode mágua i ofende kel algen di bu família i poi un dizentendimentu ta fika más piór.

‘Un respósta mansu ta branda raiba, má un palavra duru ta omenta raiba.’ — Provérbios 15:1.

Un jóven sta ta odja un vídiu na jw.org.

MODI KI TISTIMUNHAS DI JEOVÁ TA INPENHA PA TEN RUSPETU PA FAMÍLIA?

Tistimunhas di Jeová ta insentiva tudu algen na família pa trata kunpanheru ku ruspetu. Kel téma li ta parse txeu bês na nos artigus, livrus, revistas i vídius. Tudu es é di grasa.

PA KES KI É KAZADU: Kel grupu di artigu Ajuda pa família pode djuda maridu ku mudjer...

sta sénpri prontu pa obi kunpanheru
ka dexa di pâpia ku kunpanheru
para di diskuti

(Djobe párti “Ajuda pa família”, na jw.org)

PA PAI KU MAI: Kel grupu di artigu Ajuda pa família pode djuda pai ku mai trena ses fidjus pa...

ser obidienti
djuda faze trabadju na kaza
fla “pur favor” i “obrigadu”

(Djobe párti “Kriason di fidjus” i “Kriason di jóvens”, na jw.org)

Tanbê djobe apéndisi “Perguntas ki pai ku mai ta faze”, na livru Bons respósta pa perguntas ki jóvens ta faze — Volumi 1. (Djobe párti “Perguntas ki pai ku mai ta faze”, na jw.org)

PA KES KI É JÓVEN: Kel párti Jóvens na jw.org ten artigus, vídius i tabélas ki pode djuda jóvens...

da dretu ku ses pai i ku ses mai i ku ses irmon
pâpia ku ses pai i ku ses mai ku ruspetu sobri ses régra
ganha kunfiansa di ses pai ku ses mai

(Djobe párti “Jóvens”, na jw.org)

Bu pode uza jw.org di grasa. Bu ka meste inskreve, kria un kónta i nen paga nada pa entra na el. Tanbê, bu ka ta pididu ninhun informason sobri bo.