KUZAS STA BIRA KARU — KUZÊ KI NU PODE FAZE?

Ten kuzas ki nu ka ta konsigi kontrola

Óras ki présu di kuzas sta ta subi poku-poku, é más difísil nu da kónta prinsipalmenti si nos saláriu sta ta subi tanbê. Má óras ki présu omenta txeu i nos saláriu kontinua kel mê nu pode fika preokupadu i stresadu, prinsipalmenti si nu ten família pa kuida di el.

Nu ka ta pode inpidi kuzas di fika más karu. Má óras ki nu ta seta ma ten kuzas ki nu ka ta konsigi kontrola, ta ser más fásil lida ku kel situason.

PAMODI KI KEL-LI É INPORTANTI?

Ten kuzas ki é más fásil pa kes algen ki ta seta ma es ka ta konsigi kontrola présu di kuzas. Pur izénplu:

es ta kontinua kalmu. Óras ki nu ta kontinua kalmu, nu ta pode pensa midjór i nu ta pode toma bons disizon.
es ta gasta dinheru na kuzas ki es meste envês di na kuzas ki es ka meste. Sima pur izénplu, paga agu ku lus na óra.
es ta ivita diskuti ku ses família sobri dinheru.
es ta disidi kes kuza ki es meste i kantu ki es ta gasta pa kunpra kes kuza ki es meste envês di kes kuza ki es ka meste.

KUZÊ KI BU PODE FAZE?

Sta prontu pa adapta. Óras ki kuzas fika karu di un óra pa kel otu, é bon tenta gasta más poku. Alguns algen ta tenta mante un stilu di vida ki es ka ta pode ten i kel-li é sima nada kóntra korenti. Pamodi kel-li, es ta fika kansadu dimás. É klaru ki bu ta krê kuida di bu família i da-s kes kuza ki es meste. Má lenbra di kel-li: kuzê ki más bu família ta meste é pa bu mostra-s amor i da-s atenson.

“Kal di nhos, ki ta konsigi omenta un sugundu na nhos vida pamodi nhos sta preokupadu dimás?” — Lukas 12:25.

“Nunka ka nhos fika preokupadu dimás ku dia di manhan, pamodi dia di manhan ta ten ses própi preokupason. Kada dia ten ses prubléma.”— Mateus 6:34.

Tenta mante un stilu di vida ki bu ka ta pode ten é sima tenta nada kóntra korenti