PÁRTI 2

Nhos ser lial pa kunpanheru

‘Kel ki Deus djunta ómi ka debe sipara.’ — Marcos 10:9

Jeová krê pa nu ‘ama lialdadi’. (Miqueias 6:8 ) Kel-li é más inportanti inda na kazamentu, pamodi si ka ten lialdadi, ka ten kunfiansa. I kunfiansa é inportanti pa amor bira más txeu.

Oji, txeu algen krê vive livri sen ninhun konpromisu na kazamentu. Pa bu proteje bu kazamentu, bu debe sta disididu na faze dôs kuza.

1 POI BU KAZAMENTU NA PRIMERU LUGAR

KUZÊ KI BÍBLIA TA FLA: ‘Nhos konfirma kuzê ki é más inportanti’. (Filipenses 1:10 ) Bu kazamentu é un di kes kuza más inportanti di bu vida. El merese sta na primeru lugar.

Jeová krê pa bu konsentra na kel algen ki bu sta kazadu ku el i pa nhos ‘goza vida’ djuntu. (Eclesiastes 9:9 ) El ta mostra klaru ma nunka bu ka debe dexa di da atenson pa kel algen ki bu sta kazadu ku el. Má, pa nhos tudu dôs djobe maneras di poi kunpanheru filís. (1 Coríntios 10:24 ) Poi kel algen ki bu sta kazadu ku el ta xinti ma bu meste-l i ma el ten txeu valor pa bo.

Un maridu ta leba se mudjer un bebida kenti; un maridu sta ta txiga kaza i el ta atxa se mudjer ta faze kumida

KUZÊ KI BU PODE FAZE:

Tra ténpu pa nhos sta sénpri djuntu, i da kel algen ki bu sta kazadu ku el tudu atenson ki el merese.
Pensa na “nos” envês di “ami”.

2 PROTEJE BU KORASON

KUZÊ KI BÍBLIA TA FLA: ‘Tudu kel ki kontinua ta odja pa un mudjer, ti ki el xinti paxon pa el, dja el faze adultériu ku el na se korason.’ (Mateus 5:28 ) Si un algen fika ta pensa na kuzas mariadu, nu pode fla ma el ka sta ser fiel pa se maridu ô pa se mudjer.

Jeová ta fla ma bu meste ‘proteje bu korason’. (Provérbios 4:23; Jeremias 17:9 ) Pa faze kel-li, bu meste toma kuidadu ku bus odju. (Mateus 5:29, 30 ) Sigi izénplu di un xéfi di família ki txomaba Jó. El faze un kontratu ku se odjus pa nunka el ka odjaba ku dizeju pa otu mudjer. (Jó 31:1 ) Sta disididu pa nunka bu ka odja pornografia i nen ka bu mostra ninhun interesi mariadu pa un algen ki é ka bu maridu ô bu mudjer.

Un maridu ku fotu di se mudjer na se méza di trabadju

KUZÊ KI BU PODE FAZE:

Dexa klaru pa otus algen ma bo é konprometidu sô ku bu maridu ô bu mudjer.
Mostra ma bu ta preokupa ku kuzê ki kel algen ki bu sta kazadu ku el ta xinti. Si el ka sta xinti sábi ku algun amizadi ki bu ten, kaba ku el kel óra.