Modi ki fidjus ta muda kazamentu

Óras ki un mininu nase, kel mai ku pai ta fika rei di kontenti i preokupadu omésmu ténpu. Nhos pode fika spantadu di sabe ma gósi ki nhos é mai ku pai, nhos meste uza txeu párti di nhos ténpu i forsa pa kuida di nhos fidju. Noti sen durmi i mudansa di sentimentus pode mexe ku nhos amizadi. Pur isu, nhos ten ki faze mudansas pa nhos pode kuida di nhos fidju i nhos kazamentu tanbê. Modi ki konsedjus di Bíblia pode djuda nhos lida ku kel situason li?

1 NTENDE MODI KI UN MININU TA MUDA NHOS VIDA

KUZÊ KI BÍBLIA TA FLA: ‘Amor ten paxénxa i el é bon.’ Tanbê, amor ‘ka ta djobe sô ses interesi, el ka ta xatia faxi.’ (1 Coríntios 13:4, 5 ) Gósi ki bo é mai, é normal bu konsentra bu atenson na bu fidju. Má, bu maridu pode kumesa ta xinti ma bu ka sta liga-l. Nton, ka bu skese ma el tanbê el meste bu atenson. Ku paxénxa i bondadi, bu pode djuda-l xinti ma bu meste-l, i ma el pode djuda-u kuida di nhos fidju.

‘Anhos maridus, nhos kontinua ta mora ku nhos mudjer di akordu ku konhisimentu.’ (1 Pedro 3:7 ) Bu meste ntende ma bu mudjer ta ben gasta txeu ténpu i forsa na kuida di nhos fidju. Gósi el ten un novu responsabilidadi i el pode xinti kansadu dimás, dizanimadu ô ti diprimidu. Alvês, el pode ti fika xatiadu ku bo, má tenta fika kalmu, pamodi ‘ken ki ka ta xatia faxi é midjór di ki un ómi balenti’. (Provérbios 16:32 ) Tenta ntende-l i djuda-l na tudu kuza ki el meste. — Provérbios 14:29.

KUZÊ KI BU PODE FAZE:

• Pai: Djuda bu mudjer kuida di nhos fidju sikrê di noti. Gasta ménus ténpu ku kes otu kuza, pa bu pode pasa más ténpu ku bu mudjer i ku bu fidju.

• Mai: Óras ki bu maridu krê djuda-u ku mininu, seta se ajuda. Si el ka sta konsigi faze sima bu krê, ka bu kritika-l, má mostra-l ku bondadi modi ki el ta faze-l.

2 NHOS BIRA MÁS AMIGU DI KUNPANHERU

KUZÊ KI BÍBLIA TA FLA: ‘Es ta bira un karni sô.’ (Génesis 2:24 ) Sikrê nhos tene un novu algen na família, ka bu skese ma abo ku kel algen ki bu sta kazadu ku el, inda nhos é ‘un karni sô.’ Faze tudu sforsu pa nhos bira más amigu di kunpanheru.

Mudjer, agradise bu maridu pa ajuda i apoiu ki el ta da-u. Kuzas ki bu ta fla pa agradise-l pode ser sima ‘un kura’ pa bu maridu. (Provérbios 12:18 ) Maridu, fla bu mudjer modi ki bu krê-l txeu i ma el ten txeu valor pa bo. Ngaba-l pa manera ki el ta kuida di família. — Provérbios 31:10, 28.

‘Ki kada algen kontinua ta djobe ka se própi vantaji, má kel di otu algen.’ (1 Coríntios 10:24 ) Faze sénpri bu midjór pa bu maridu ô bu mudjer. Nhos tra un ténpu sô pa nhos dôs, pa nhos pâpia, ilôjia i obi kunpanheru. Na asuntu sobri séksu, ka bu pensa sô na bu kabésa. Pensa na nisisidadis di bu maridu ô di bu mudjer. Bíblia ta fla: ‘Ka nhos nega kunpanheru kel ki nhos ten direitu, sô si é nhos ki konkorda’. (1 Coríntios 7:3-5 ) Pur isu, nhos pâpia klaru ku kunpanheru sobri kel asuntu li. Mostra paxénxa i ntende kunpanheru ta poi nhos amizadi ta fika más fórti.

KUZÊ KI BU PODE FAZE:

• Ka bu skese di tra ténpu sô pa nhos dôs.

• Faze kuzas pikinoti ki ta poi bu maridu ô bu mudjer ta xinti ma bu ta ama-l. Pode ser kuzas sima manda un mensájen ô da-l un prezenti pikinoti.

3 INXINA BU FIDJU

KUZÊ KI BÍBLIA TA FLA: ‘Désdi pikinoti bu konxe skrituras sagradu, ki pode da-u sabedoria pa salvason’. (2 Timóteo 3:15 ) Faze planu di kuzê ki bu pode faze pa bu inxina bu fidju. Mésmu antis di el nase, el ten txeu kapasidadi di prende. Timenti inda el sta na bariga, bu fidju pode konxe bu vós i el pode xinti si bu sta tristi ô kontenti. Kumesa ta lé pa el, sikrê inda el sta pikinoti. Talvês el pode ka ntende kuzê ki bu sta lé, má kel-la pode djuda-l gosta di lé óras ki el bira grandi.

Bu fidju nunka é ka pikinoti dimás pa obi-u ta pâpia di Deus. Dexa-l obi-u ta faze orason pa Jeová. (Deuteronómio 11:19 ) Mésmu óras ki nhos ta brinka djuntu, pâpia ku el sobri kuzas ki Deus faze. (Salmo 78:3, 4 ) Sima bu fidju ta ba ta kria, el ta xinti ma bu ta ama Jeová i el ta prende ama-l tanbê.

KUZÊ KI BU PODE FAZE:

• Na bu orason pidi Jeová sabedoria pa bu inxina bu fidju.

• Ripiti kes kuza ki bu krê pa bu fidju sabe, asi el ta kumesa ta prende désdi pikinoti.