Jeová skodje Juzué

Dipôs ki Muizes kuida di israelitas pa txeu anu, el staba pértu di fin di se vida. Jeová fla-l: ‘É ka bo ki sta bai leba israelitas pa téra ki N promete-s. Má, N ta dexa-u odja kel téra’. Nton Muizes pidi Jeová pa skodje un otu algen pa toma kónta di se povu. Jeová fla-l: ‘Bai na Juzué i fla-l ma é el ki N skodje’.

Muizes fla israelitas ma el staba kuazi ta móre i ma Jeová skodje Juzué pa leba-s pa téra ki el prometeba es. Nton Muizes fla Juzué: ‘Ka bu xinti medu. Jeová ta djuda-u’. Dipôs di kel-li, Muizes subi Monti Nebu, i di la Jeová mostra-l kel téra ki El prometeba Abraon, Izaki ku Jakó. Muizes móre ku 120 anu.

Jeová fla Juzué: ‘Entra na Riu Jurdon i bai pa téra di Kanan. N ta djuda-u sima N djuda Muizes. Ka bu skese di lé nha Lei tudu dia. Ka bu xinti medu. Ten koraji. Bai i bu faze kel ki N manda-u’.

Juzué manda dôs spion pa sidadi di Jerikó. Na kel otu stória, nu ta ben prende más sobri kuzê ki kontise la. Kantu ki es volta, es fla ma kel-la éra un bon momentu pa entra na téra di Kanan. Na kel otu dia, Juzué fla povu pa es labanta kanpamentu. Dipôs, el manda saserdótis ki staba ta karega arka di kontratu pa entra primeru na Riu Jurdon. Riu tinha txeu agu ta kóre i el éra fundu. Má lógu ki saserdótis poi pé na agu, riu para di kóre i el seka! Saserdótis bai ti meiu di riu, es fika paradu timenti israelitas ta pasaba pa otu ladu. Bu ka ta atxa ma kel milagri li ta lenbraba es di kuzê ki Jeová fazeba na Mar Burmedju?

Ti ki enfin, dipôs di tudu kes anu israelitas staba na kel téra ki Deus prometeba es. Es podia fazeba kazas i sidadis. Es podia plantaba na ses txon txeu arvis ki ta daba frutas, sima pé di uva. La tinha txeu kuza sábi pa kume i pa bebe. Pur isu, es ta txomaba kel téra ki Deus prometeba es di téra ki ta daba leti ku mel.