Un ómi di géra i un minininha

Na téra di Síria, tinha un minininha ki staba lonji di se família. Trópas di Síria tra-l di se família i el fika ta trabadja pa mudjer di un xéfi di trópas ki txomaba Naaman. Kel minininha ta adoraba Jeová, nbóra kes algen ki ta staba djuntu ku el ka ta adoraba.

Naaman tinha un duénsa gravi di péli i el ta xintiba dór tudu óra. Kel minininha krê djudaba el. El fla mudjer di Naaman: ‘N konxe un algen ki pode poi bu maridu midjora. Na Israel ten un proféta di Jeová ki txoma Elizeu. El pode kura bu maridu.’

Mudjer di Naaman fla se maridu kuzê ki minininha fla-l. El ta fazeba kalker kuza pa el midjoraba, pur isu el bai kaza di Elizeu na Israel. Naaman pensaba ma Elizeu ta resebeba el kómu un algen inportanti. Má Elizeu nen ka bai pâpia ku el, el manda se ajudanti kunprimenta-l i pa fla-l: ‘Bai bu laba 7 bês na Riu Jurdon. Dipôs bu ta fika kuradu.’

Naaman fika xatiadu pamodi el ka sta speraba kel-la. El fla: ‘N pensaba ma kel proféta li ta txomaba se Deus i el ta kuraba mi di manera spesial. Má envês di kel-la, el fla-m pa N bai pa un riu na Israel. Na Síria nu ten rius mutu más midjór. Pamodi ki N ten ki bai laba na Riu Jurdon?’ Naaman fika xatiadu i el sai di kaza di Elizeu.

Ajudantis di Naaman djuda-l pensa midjór. Es fla-l: ‘Bu ka ta fazeba kalker kuza pa bu kuraba? Kel ki proféta fla-u pa bu faze é un kuza sinplis. Pamodi ki bu ka ta faze-l?’ Naaman obi ku es. El bai pa Riu Jurdon i el murgudja na agu 7 bês. Dipôs di 7 bês Naaman sai tudu kuradu. El fika rei di kontenti i el volta pa agradise Elizeu. Naaman fla: ‘Gósi N sabe ma Jeová é Deus verdaderu.’ Modi ki bu atxa ma kel minininha israelita xinti kantu Naaman volta kuradu?