Jeová manda Jeremias prega

Jeová skodje Jeremias pa ser proféta di povu di Judá. El fla-l pa el bai pâpia ku povu i pa aviza-s ma es meste dexaba di faze kuzas mariadu. Jeremias fla Jeová: ‘Má Jeová, ami é sô un rapás. N ka sabe modi ki N ta pâpia ku povu.’ Jeová fla-l: ‘Bu ka meste ten medu. N ta fla-u kuzê ki bu ta fla. N ta djuda-u.’

Jeová fla Jeremias pa djunta ansions di povu, pa el kebra un jaru di baru na ses frenti i pa el fla-s: ‘Jiruzalen ta ben kabadu ku el sima kel jaru li.’ Kantu Jeremias faze sima Jeová fla-l, ansions fika uma xatiadu. Pazur, ki éra saserdóti, sota Jeremias i el prende-l mô ku pé na tronku. Jeremias ka ta podia mexeba duránti noti interu. Pazur dexa-l sai kel otu dia di sédu. Jeremias fla: ‘N ka sta aguenta más. N sta para di prega pa povu’. Má el dizisti mê? Nau. Kantu Jeremias pensa más un bokadinhu, el fla: ‘Mensaji di Jeová é sima un lumi déntu mi. N ka pode para di prega.’ Jeremias kontínua ta aviza povu.

Algun ténpu dipôs, Judá tinha un novu rei. Saserdótis ku falsus proféta ta odiaba mensaji di Jeremias. Es fla prínsipis: ‘Kel ómi li ka pode fika bibu.’ Jeremias fla: ‘Si nhos mata-m, nhos sta ta mata un ómi ki ka ten kulpa. Kuza ki N sta ta fla é ka di meu, é di Jeová’. Kantu prínsipis obi kel-li, es fla: ‘Nau! Kel ómi li ka pode móre.’

Jeremias kontínua ta prega i asi prínsipis fika xatiadu tanbê. Es pidi rei pa mata Jeremias. Rei fla ma es pode faze kel ki es krê ku Jeremias. Es leba Jeremias i es bota-l déntu di un posu fundu xeiu di lama, ku ideia ma el ta moreba la. Jeremias kumesa ta bai pa fundu na lama.

Dipôs, un ómi ki txomaba Ebedi-Mileki, ki ta trabadjaba na palásiu, fla rei: ‘Prínsipis dja bota Jeremias déntu di un posu! Si nu ka tra-l di la, el ta móre.’ Rei manda Ebedi-Mileki leba 30 ómi djuntu ku el pa es ba tra Jeremias di posu. Bu ka ta atxa ma nu debe ser sima Jeremias, ki ka para di prega?