Jiruzalen distruídu

Povu di Judá dexa Jeová un monti bês i es bai adora deuzis falsu. Jeová pasa txeu anu ta tenta djuda-s. El manda txeu proféta pa aviza-s, má es ka obi. Envês di es obi, es faze trósa di kes proféta. Modi ki Jeová kaba ku ses adorason di imaji?

Nabukudunuzor, ki éra rei di Babilónia, toma txeu sidadi. Kel primeru bês ki el toma Jiruzalen, el pega Rei Jioiakin, kes prínsipi, kes ómi di géra ku artizons i el leba-s pa Babilónia. Tanbê el leba tizorus di ténplu di Jeová. Dipôs Nabukudunuzor poi otu rei na Judá, ki txomaba Zidikias.

Na komésu, Zidikias ta obiba ku Nabukudunuzor. Má kes povu ki ta staba pértu di el i kes proféta falsu fla Zidikias pa rabela kóntra Babilónia. Jeremias aviza-l: ‘Si bu rabela, ta ten mórti, fómi ku duénsa na Judá.’

Dipôs ki Zidikias governa pa 8 anu, el disidi rabela kóntra Babilónia. El pidi pa trópas di Ijitu djuda-l. Dipôs, Nabukudunuzor manda se trópas pa ataka Jiruzalen i es serka sidadi. Jeremias fla Zidikias: ‘Jeová fla ma si bu dexa Babilónia manda na nhos, bo ku gentis na Jiruzalen ta salva. Má si bu ka dexa, babilónius ta kema Jiruzalen i ta leba nhos prézu.’ Zidikias fla: ‘N ka ta dexa babilónius manda na nos!’

Dipôs di un anu i meiu, trópas di Babilónia ronba paredis di Jiruzalen i es poi lumi na sidadi. Es kema ténplu, es mata un monti algen i es leba milhons di algen prézu.

Zidikias fuji di Jiruzalen, má babilónius bai se tras. Es pega-l pértu di sidadi di Jerikó. Kantu ki es pega-l es leba-l pa Rei Nabukudunuzor. Rei di Babilónia poi Zidikias ta odja se fidjus ta matadu se frenti. Dipôs Nabukudunuzor sega Zidikias, el pô-l na kadiâ i el dexa-l la ti ki el móre. Má Jeová promete povu di Judá: ‘Óras ki pasa 70 anu, N ta dexa nhos volta pa Jiruzalen.’

Kuzê ki kontise ku kes jóven ki lebadu prézu pa Babilónia? Es ta kontinuaba ta ser lial pa Jeová?