Un Reinu ki ta ben fika pa tudu ténpu

Un dia di noti, Rei Nabukudunuzor sunha ku un kuza stranhu. Kel sonhu preokupa-l tantu txeu ki ka dexa-l durmi. El txoma ómis ki ta fazeba majia i el fla-s: ‘Nhos splika-m kuzê ki N sunha ku el.’ Es fla-l: ‘Sinhor rei, nhu fla-nu kuzê ki nhu sunha ku el, nu ta splika nho é kuzê ki el siginifika.’ Má Nabukudunuzor fla-s: ‘Nau! Nhos ta fla-m kuzê ki N sunha ku el, ô nton N ta mata nhos.’ Es fla-l otu bês: ‘Fla-nu kuzê ki nhu sunha ku el, dipôs nu ta splika nho kuzê ki el siginifika.’ El fla: ‘Nhos krê ngana-m. Nhos fla-m kuzê ki N sunha ku el!’ Es fla rei: ‘Ka ten ninhun ómi ki ta konsigi faze kel-la. Kuza ki nho sta pidi-nu ka ten ningen ki ta faze-l.’

Nabukudunuzor fika uma xatiadu ki el manda mata tudu májikus ku ómis di sabedoria. Daniel, Sadraki, Mizaki ku Abidinegu tanbê staba na meiu di kes ki éra pa matadu. Daniel pidi rei un ténpu. Nton el ku se amigus ora pa Jeová i es pidi-l ajuda. Kuzê ki Jeová faze?

Na un vizon, Jeová mostra Daniel kuzê ki Nabukudunuzor sunha ku el i kuzê ki el siginifikaba. Na kel otu dia, Daniel bai atxa ajudanti di rei i el fla-l: ‘Ka bu mata ningen. N ta konsigi splika rei se sonhu.’ Nton kel ajudanti leba Daniel pa Nabukudunuzor. Daniel fla rei: ‘Deus sta ta mostra nho kuzê ki sta pa kontise. Sonhu di nho é si: nhu odja un státua grandi ku kabésa di oru, petu ku brasu di prata, bariga ku koxa di kóbri, pérnas di féru i pé di féru misturadu ku arjila. Dipôs un pédra ben di un monti i el da na pé di kel státua. Státua kebra, el fika en farinha i el bai na béntu. Kel pédra bira un monti grandi ki intxi téra.’

Dipôs Daniel fla: ‘Sonhu di nho siginifika kel-li: Kabésa di oru é reinu di nho. Prata é un reinu ki ta ben dipôs di nho. Dipôs ta ben un otu reinu sima kóbri, ki ta governa Téra interu. Dipôs ta ben más un reinu ki ta ser fórti sima féru. Na fin ta ben ten un reinu divididu: un párti ta ser fórti sima féru i kel otu párti ta ser fraku sima arjila. Kel pédra ki ben di monti é Reinu di Deus. El ta ben distrui tudu kes reinu i el ta ben fika pa tudu ténpu.’

Nabukudunuzor nbaxa na frenti di Daniel ku róstu na txon. El fla: ‘Bu Deus ki fla-u kuzê ki N sunha. Ka ten ninhun Deus sima El.’ Envês di mata Daniel, Nabukudunuzor pô-l ta ser governanti di Babilónia i xéfi di tudu kes ómi di sabedoria. Bu konsigi odja modi ki Jeová responde orason di Daniel?