Paredis di Jiruzalen

Nu ben pâpia di un ténpu antis di konpodu paredis di Jiruzalen. Neemias, ki éra ajudanti di Rei Artaxerxis, tanbê éra un israelita ki ta viveba na sidadi di Suzan, na Pérsia. Irmon di Neemias traze un notísia ka sábi di Judá: ‘Povu ki volta pa Jiruzalen ka sta suguru. Ningen inda ka konpo paredis ku portons ki trópas di Babilónia distruíba.’ Neemias fika uma tristi. El krê bai djudaba es, nton el ora pa rei dexa-l bai.

Un dia, rei repara ma Neemias staba tristi. Rei fla-l: ‘Nunka N ka odja-u asi. Kuzê ki bu ten?’ Neemias fla-l: ‘Modi ki N ka ta sta tristi si Jiruzalen, nha sidadi, sta tudu distruídu?’ Rei pergunta-l: ‘Kuzê ki bu krê pa N faze pa bo?’ Kel óra Neemias ora déntu di el. Dipôs el fla rei: ‘Favor, dexa-m bai Jiruzalen pa N bai konpo kes paredi.’ Rei Artaxerxis fla Neemias ma el pode bai i el faze di tudu pa nada ka mexeba ku Neemias na se viaji. Tanbê el poi Neemias ta governa Judá i el da-l madera pa faze portons di sidadi.

Kantu Neemias txiga Jiruzalen, el bai djobe modi ki paredis di sidadi staba. Dipôs el djunta saserdótis ku governantis i el fla-s: ‘Kel-li é un tristéza. Nu meste kumesa ta trabadja.’ Povu konkorda i es kumesa ta faze kes paredi otu bês.

Má alguns israelita ki éra ses inimigu kumesa ta faze-s trósa i ta fla-s: ‘Ti un rapoza pode ronba kes paredi ki nhos sta ta faze.’ Kes trabadjador ka liga ses trósa i es kontínua ses trabadju. Paredi fika altu i fórti.

Dipôs, inimigus di otus lugar djunta pa es bai ataka Jiruzalen di surpréza. Kantu judeus diskubri ses planu, es fika ku medu. Má Neemias fla povu: ‘Ka nhos xinti medu. Jeová sta ku nos.’ El poi guardas pa proteje kes trabadjador i kes inimigu ka xinti koraji di ataka-s.

Na 52 dia, paredis ku portons di Jiruzalen dja staba tudu prontu. Neemias leba tudu levitas pa Jiruzalen pa bai komemora trabadju ki dja staba prontu. El organiza-s na dôs grupu di kantoris. Kes dôs grupu subi na skada ki ta fikaba na Porton di Fonti i es da vólta na Jiruzalen riba paredi. Un grupu anda na un direson i kel otu grupu anda na otu direson. Es toka tronbéta, sínbalu ku arpa i es kanta pa Jeová. Esdras bai ku un grupu i Neemias bai ku un otu grupu, ti ki es nkontra na ténplu. Tudu algen, ómis, mudjeris ku mininus, oferese sakrifisius pa Jeová i es faze un grandi fésta. Di lonji algen podia obiba ses gritu di alegria.