Jizus bira Misías

Juan dja flaba: ‘Algen más inportanti ki mi sta ta ben.’ Kantu Jizus tinha uns 30 anu, el bai di Galilea pa Riu Jurdon, undi ki Juan staba ta batiza pesoas. Jizus kreba pa Juan batiza-l, má Juan fla-l: ‘N ka pode batiza-u. Bo ki debe batiza-m.’ Jizus fla Juan: ‘Jeová krê pa bu batiza-m.’ Nton es bai pa Riu Jurdon i Juan murgudja Jizus déntu di agu.

Dipôs ki Jizus sai di agu, el ora. Na kel óra, Séu abri i spritu santu di Deus dixi pa riba di el sima un ponba. Dipôs Jeová pâpia la di Séu: ‘Bo é nha Fidju, ki N ta ama i ki ta da-m txeu alegria.’

Kantu spritu di Jeová dixi riba di Jizus, el bira Kristu ô Misías. Gósi el ta ben kumesaba trabadju ki Jeová mandaba el pa el faze li na Téra.

Lógu dipôs di se batismu, Jizus bai pa dizértu i el fika la 40 dia. Kantu el volta, el odja Juan. Sima Jizus ben pa el, Juan fla: ‘Bo é Korderu di Deus ki ta ben tra pekadu di mundu.’ Sima Juan fla kel-li, tudu algen fika ta sabe ma Jizus éra Misías. Bu sabe kuzê ki kontise kantu Jizus staba na dizértu? Nu ben odja na kel otu stória.