Jizus volta pa Séu

Jizus nkontra ku se sigidoris na Galilea. El da-s un órdi txeu inportanti: ‘Nhos bai i nhos faze disiplus di pesoas di mundu interu. Nhos inxina-s kuzas ki N inxina nhos i nhos batiza-s.’ Dipôs el promete-s: ‘Nhos lenbra ma sénpri N ta sta ku nhos.’

Dipôs ki Jizus resusita, duránti 40 dia, el parse pa txeu di se disiplus na Galilea ku Jiruzalen. El inxina-s lisons inportanti i el faze txeu milagri. Dipôs, Jizus nkontra ku se apóstlus pa últimu bês na Monti di Olivera.

Jizus dja flaba se disiplus: ‘Ka nhos sai di Jiruzalen. Nhos kontinua ta spéra pa kuza ki nha Pai promete nhos.’ Má es ka ntende kuzê ki el kria flaba. Es pergunta-l: ‘É gósi ki bu sta ben ser Rei di Israel?’ Jizus fla: ‘Inda ka txiga ténpu pa Jeová faze-m Rei. Já já, nhos ta ben resebe puder di spritu santu i nhos ta ser nhas tistimunha. Nhos bai prega na Jiruzalen, na Judea, na Samaria i na lugaris más lonji di Téra.’

Dipôs, Jizus subi pa Séu i un núven kubri-l. Se disiplus fika ta djobe pa riba, má Jizus dja baba pa Séu.

Disiplus sai di Monti di Olivera i es bai pa Jiruzalen. Sénpri es ta djuntaba na un sala na un primeru andar i es ta oraba. Es fika ta spéra pa Jizus da-s más orientason.