Kornéliu resebe spritu santu

Na sidadi di Sizarea, tinha un xéfi di trópas romanu ki txomaba Kornéliu. Judeus ta ruspetaba el, nbóra el ka éra judeu. El ta djudaba póbris i kes algen ki tinha nisisidadi. Kornéliu ta kriditaba na Jeová i sénpri el ta oraba pa el. Un dia, un anju parse pa Kornéliu i el fla-l: ‘Deus obi bus orason. Manda ómis pa sidadi di Jopi, undi Pedru sta i pidi-l pa el ben ku es.’ Kel óra, Kornéliu manda três ómi pa Jopi, ki ta fikaba uns 50 Km pa sul.

Má Pedru, ki staba na Jopi, tevi un vizon. Na kel vizon, el odja txeu animal ki judeus ka podia kumeba i el obi un vós ta fla-l pa el kume. Pedru nega kume i el fla: ‘Nunka N ka kume ninhun animal inpuru na nha vida.’ Nton vós fla-l: ‘Ka bu txoma kes animal li di inpuru. Deus dja bira-s puru.’ Pedru tanbê fladu: ‘Sta três ómi na bu pórta. Bai ku es.’ Pedru bai pa pórta i el pergunta kes ómi pamodi ki es staba la. Es responde: ‘Kornéliu ki manda-nu. El é xéfi di trópas romanu. El fla pa bu bai se kaza na Sizarea.’ Pedru konvida-s pa es fika ku el kel noti. Kel otu dia, el bai ku es pa Sizarea, djuntu ku alguns irmon di Jopi.

Kantu Kornéliu odja Pedru, el poi duedju na txon se frenti. Má Pedru fla-l: ‘Labanta! Ami é un ómi sima bo. Sikrê judeus ka ta bai kaza di kenha ki é ka judeu Deus fla-m pa N ben bu kaza. Agó fla-m pamodi ki bu manda buska-m.’

Kornéliu fla Pedru: ‘Dja ten kuatu dia ki N sta oraba pa Deus i un anju fla-m pa N manda buska-u. Favor, inxina-nu sobri Jeová.’ Pedru fla: ‘N prende ma Deus ka ta faze skodjénsa. El ta seta kalker algen ki krê adora-l.’ Pedru inxina-s monti kuza sobri Jizus. Nton, spritu santu dixi riba Kornéliu i kes ki staba djuntu ku el i tudu es batizadu.