LISON 19

Tistimunhas di Jeová é kristons verdaderu?

Formatu di livru na papel

Anos, Tistimunhas di Jeová, nu ta kridita ma nos é kristons verdaderu. Pamodi? Kes kuza ki nu ta kridita na el ten bazi na kuzê? Pamodi ki nos nómi é Tistimunhas di Jeová? Modi ki nu ta mostra ma nu ta ama kunpanheru? Na es lison, nu ta ben responde kes pergunta li.

1. Kes kuza ki Tistimunhas di Jeová ta kridita na el ten bazi na kuzê?

Jizus fla: ‘Palavra di Deus é verdadi.’ (João 17:17) Sima Jizus, kes kuza ki Tistimunhas di Jeová ta kridita na el ten bazi na Palavra di Deus. Pur izénplu, odja stória di Tistimunhas di Jeová ki antis éra konxedu pa Studantis di Bíblia. Pa vólta di anu 1870, es kumesa ta studa Bíblia ku kuidadu. Óras ki es ta ntendeba un kuza na Bíblia es ta setaba el, sikrê igreja ta inxinaba otu kuza. Dipôs, es kumesa ta pâpia sobri kes verdadi di Bíblia ku otus algen.a

2. Pamodi ki nos nómi é Tistimunhas di Jeová?

Jeová ta txoma kes algen ki ta adora-l di se tistimunhas pamodi es ta pâpia verdadi sobri el. (Hebreus 11:4–12:1) Pur izénplu, na ténpu antigu, Deus fla se povu: ‘Anhos é nhas tistimunha’. (Lé Isaías 43:10.) Jizus ta txomadu di ‘kel Tistimunha Fiel’. (Apocalipse 1:5) Pur isu, na anu 1931 nu pasa ta uza kel nómi Tistimunhas di Jeová. Nu ten orgulhu di ten es nómi.

3. Modi ki Tistimunhas di Jeová ta mostra amor sima Jizus?

Jizus gostaba tantu di se disiplus ki es éra sima un família pa el. (Lé Marcos 3:35.) Di mésmu manera, Tistimunhas di Jeová sta unidu sima un família na mundu interu. É pur isu ki nu ta txoma kunpanheru di irmon ku irman. (Filémon 1, 2) Tanbê nu ta obi ku kel órdi li: ‘Nhos ten amor pa nhos irmons na mundu interu’. (1 Pedro 2:17) Tistimunhas di Jeová ta mostra kel amor li di un monti manera. Pur izénplu, nu ta djuda nos irmons na mundu interu óras ki es sta pasa pa prublémas.

SABE MÁS

Prende más sobri stória di Tistimunhas di Jeová i odja más próva ma anos é kristons verdaderu.

Dizenhus: Tistimunhas di Jeová ta prega. 1. Un irman ta lé i ta pâpia di un testu di Bíblia ku un mudjer. 2. Un irmon ta pâpia ku un ómi sobri Bíblia na tistimunhu pa públiku ku karinhu. — Kes kuza ki kristons verdaderu ta kridita ten bazi na Bíblia i es ta pâpia di es ku otus algen

4. Kes kuza ki nu ta kridita na el ten bazi na Bíblia

Jeová dja flaba ma nu ta binha ntendeba verdadis di Bíblia más dretu. Lé Daniel 12:4 i nóta di rodapé, i dipôs pâpia sobri kel pergunta li:

Kuzê ki ta ben ‘biraba más txeu’ entri povu di Deus sima es ta ba ta studaba Bíblia?

Odja modi ki un grupu di Studantis di Bíblia, i tanbê Charles Russell, ta studaba Palavra di Deus. Odja VÍDIU, i dipôs pâpia sobri kel pergunta li:

VÍDIU: Es torna atxa kes verdadi di Bíblia (7:45)

Na vídiu, modi ki Charles Russell i kes Studanti di Bíblia ta studaba Bíblia?

Bu sabia?

Dja nu kustuma faze alguns mudansa na kuzas ki nu ta kridita. Pamodi? Sima óras ki sól ta labanta, nu ta konsigi ba ta odja kuzas más klaru, Deus tanbê ta djuda-nu ba ta ntende se Palavra poku-poku. (Lé Provérbios 4:18.) Bíblia ka ta muda, má sima nu ta ba ta ntende-l midjór nu ta muda alguns kuza ki nu ta kridita na el.

5. Nu ta vive di akordu ku nos nómi

Pamodi ki nu pasa ta uza nómi Tistimunhas di Jeová? Odja VÍDIU, i dipôs pâpia sobri kel pergunta li:

VÍDIU: Un nómi ki ta mostra ken ki nos é (2:40)

Pamodi ki Tistimunhas di Jeová é un nómi ki ta konbina ku nos?

Pamodi ki Jeová skodje pesoas pa ser se tistimunhas? Pa es pode difende-l di kes mintira ki ta kontadu sobri el. Pur izénplu, odja dôs di kes mintira.

Alguns relijion ta inxina ma Deus krê pa nu uza imaji pa adora-l. Má kel-li é verdadi? Lé Levítico 26:1, i dipôs pâpia sobri kes pergunta li:

Ki verdadi nu ta atxa na kel testu li? Kuzê ki Jeová ta atxa di imaji?

Alguns xéfi di relijion ta inxina ma Jizus é Deus. Má kel-li é verdadi? Lé João 20:17, i dipôs pâpia sobri kes pergunta li:

Ki verdadi nu ta atxa na kel testu li? Deus ku Jizus é mésmu algen?
Modi ki bu ta xinti di sabe ma Jeová manda se Tistimunhas pa prega verdadi sobri el i se Fidju?

6. Nu ta ama kunpanheru

Bíblia ta fla ma kristons debe sta unidu ku kunpanheru sima pártis di korpu sta unidu. Lé 1 Coríntios 12:25, 26, i dipôs pâpia sobri kes pergunta li:

Kuzê ki kristons verdaderu debe faze óras ki otus kriston sta sufri?
Kuzê ki dja bu odja Tistimunhas di Jeová ta faze ki ta mostra ma es ta ama kunpanheru?

Óras ki Tistimunhas di Jeová ta sufri na algun país, kes otu Tistimunhas di Jeová na mundu interu lógu ta tenta djuda-s. Pa odja un izénplu, odja VÍDIU. Dipôs pâpia sobri kel pergunta li:

VÍDIU: Furakon Mateus ki pasa na Aiti (5:29)

Modi ki ajuda ki Tistimunhas di Jeová ta da óras ki ta kontise un dizastri ta mostra ses amor?

Dôs Tistimunha di Jeová ta djuda un mudjer ku se fidju ki kaba di sufri un dizastri. Es sta ta kubri-s ku un kubérta i es sta ta da-s agu pa bebe. — Kristons verdaderu ta mostra amor pa kes ki meste

ALGUNS ALGEN TA FLA: “Tistimunhas di Jeová é un relijion novu.”

Désdi ki ténpu ki Jeová ta txoma se sérvus di tistimunhas?

REZUMU

Tistimunhas di Jeová é kristons verdaderu. Anos é un família na mundu interu di pesoas ki ta adora Jeová, i kes kuza ki nu ta kridita na el ten bazi na Bíblia. Tanbê nu ta inxina otus algen verdadi sobri Jeová.