LISON 29

Kuzê ki ta kontise óras ki nu móre?

Formatu di livru na papel

Dja kustuma more-u algun algen ki bu ta ama? Na kel momentu difísil la, talvês bu pergunta: ‘Kuzê ki ta kontise ku nos óras ki nu móre? Algun dia nu pode torna ben odja kes algen ki nu ta ama ki dja móre?’ Na kel lison li i na kel otu, nu ta ben odja respósta di Bíblia ki ta konsola-nu.

1. Kuzê ki ta kontise ku nos óras ki nu móre?

Jizus konpara mórti ku sónu. Un algen ki sta na un sónu pizadu ka sabe kuzê ki sta kontise na se vólta. Pamodi ki mórti ta konparadu ku sónu? Dipôs ki un algen móre, el ka ta xinti dór i nen el ka ta sufri más. Bíblia ta fla: ‘Mortus ka sabe di más nada’. — Lé Eclesiastes 9:5.

2. Pamodi ki sabe verdadi sobri mórti ta djuda-nu?

Txeu algen ten medu di móre, i tanbê es ten medu di algen mortu! Má kuzê ki Bíblia ta fla sobri mórti ta konsola-nu. Jizus fla: ‘Verdadi ta liberta nhos.’ (João 8:32) Alguns relijion ta inxina ma óras ki un algen móre ten un párti di el ki ta kontinua bibu. Má é ka kel-li ki Bíblia ta inxina. Pur isu, ningen ka ta sufri dipôs ki el móre. Tanbê, dja ki mortus ka sabe kuzê ki sta kontise, es ka ta pode prujudika-nu. Nton, nu ka meste sigi ninhun tradison ki sta ligadu ku mortus, sima faze orason pa es ô sende véla.

Alguns algen ta fla ma es ta pode pâpia ku mortus. Má é simé? Sima dja nu prende mortus ‘ka sabe di más nada’. Kes algen ki ta atxa ma es ta pode pâpia ku ses família ô amigus ki dja móre, na verdadi es sta ta pâpia ku dimónis ki ta finji ser kel algen ki móre. Nton, sabe verdadi sobri mórti ta proteje-nu di dimónis. Jeová ta aviza-nu pa nu ka tenta pâpia ku mortus pamodi el sabe ma nvolve ku dimónis ta prujudika-nu. — Lé Deuteronómio 18:10-12.

SABE MÁS

Prende más sobri kuzê ki ta kontise óras ki un algen móre. Tanbê prende ma un Deus di amor nunka ka ta tormentaba kes algen ki dja móre. Sabe kel-li ta djuda-u bira bu fé na Jeová más fórti.

Un ómi ku se dôs fidju sta xintadu na un banku na funeral di se mudjer i mai di se fidjus. Amigus i famílias sta djuntu ku es ta konsola-s i ta djuda-s.

3. Prende kuzê ki Bíblia ta fla sobri mortus

Na mundu interu, pesoas ten ideias diferenti sobri kuzê ki ta kontise óras ki nu móre. É klaru ki é ka tudu kes ideia ki é verdadi.

Na undi bu ta mora, kuzê ki pesoas ta atxa ma ta kontise ku un algen óras ki el móre?

Pa bu sabe kuzê ki Bíblia ta inxina, odja VÍDIU.

VÍDIU: Kuzê ki ta kontise ku nos óras ki nu móre? — sô un párti (1:19)

Un párti di vídiu ‘Kuzê ki ta kontise ku nos óras ki nu móre? — sô un párti’. Dizenhus: 1. Un algen mortu na kama di un ospital. 2. Un ómi sta ta durmi na meiu di dôs algen timenti es sta viaja na konboiu.

Lé Eclesiastes 3:20, i dipôs pâpia sobri kes pergunta li:

Di akordu ku kel versíklu li, kuzê ki ta kontise ku un algen óras ki el móre?
Ten algun párti di nos ki ta kontinua bibu dipôs ki nu móre?

Bíblia ta fla-nu sobri mórti di Lázaru, ki éra un grandi amigu di Jizus. Sima bu ta ba ta lé João 11:11-14, repara kuzê ki Jizus fla ma kontise ku Lázaru. Dipôs pâpia sobri kes pergunta li:

Ku kuzê ki Jizus konpara mórti?
Kuzê ki kel konparason li ta inxina-nu sobri kuzê ki ta kontise óras ki un algen móre?
Bu ta konkorda ku kuzê ki Bíblia ta fla sobri mórti? Pamodi?

4. Sabe verdadi sobri mórti ta djuda-nu

Óras ki nu prende verdadi sobri mórti, nu ka ta xinti medu di algen mortu más. Lé Eclesiastes 9:10, i dipôs pâpia sobri kel pergunta li:

Algen mortu pode prujudika-nu?

Alguns algen ta atxa ma es meste sigi kes tradison ki ta fazedu pa kes algen mortu, sima faze orason ô sende véla. Má prende kel ki Bíblia ta fla ta djuda-nu fika livri di kes mintira la. Lé Isaías 8:19 i Apocalipse 4:11, i dipôs pâpia sobri kel pergunta li:

Modi ki bu ta atxa ma Jeová ta xinti óras ki un algen ta faze orason ô ta pidi ajuda na un algen ki dja móre?

Dizenhus: Alguns kustumu ligadu ku adorason pa mortus. 1. Un ómi sta ku duedju na txon ta ora na frenti di un kóba ku ofértas di kumida. 2. Três ómi di un tribu ta badja. 3. Pesoas sta ta disfila ku maskra di kadabra i es ta leba na mô kabésa di kadabra na Dia di mortus. — Sabe verdadi sobri mórti ta liberta-nu di kes tradison ki Jeová ka gosta

5. Sabe verdadi sobri mórti ta alivia-nu

Txeu algen inxinadu ma óras ki es móre, es ta kastigadu pamodi kes kuza mariadu ki es fazeba. Má, nu ta xinti aliviadu di sabe ma ningen ka ta sufri dipôs ki el móre, nen kes ki faze kuzas mariadu. Lé Romanos 6:7, i dipôs pâpia sobri kel pergunta li:

Bíblia ta fla ma óras ki un algen móre se pekadu dja purduadu. Nton, bu ta atxa ma un algen mortu sta ta sufri pamodi kes kuza mariadu ki el fazeba?

Sima bu ta ba ta prende más sobri Jeová, bu ta da kónta ma nunka el ka ta tormentaba kes algen ki dja móre. Lé Deuteronómio 32:4 i 1 João 4:8, i dipôs pâpia sobri kes pergunta li:

Un Deus ku kes kualidadi ki nu lé na kes versíklu li, ta tormentaba kes algen ki móre?
Bu ta xinti aliviadu di sabe verdadi sobri mórti? Pamodi?

ALGUNS ALGEN TA FLA: “N ten medu ma algen mortu pode ben faze-m algun kuza.”

Ki testus di Bíblia bu ta uzaba pa djuda kel algen?

REZUMU

Óras ki un algen móre, se vida dja kaba. Kes algen ki sta mortu ka ta sufri i nen es ka ta prujudika kes ki sta bibu.

Perguntas di rezumu

Kuzê ki ta kontise óras ki nu móre?
Modi ki sabe verdadi sobri mórti ta djuda-nu?
Modi ki sabe verdadi sobri mórti ta alivia-nu?

Dia ki N tirmina kel lison li:

Sprimenta faze kel-li

Tenta dikora un testu di Bíblia di kel lison li, pa djuda-u splika kuzê ki ta kontise ku un algen óras ki el móre.

Sprimenta tanbê:

Otu kuza pa bu sprimenta

DJOBE MÁS

Odja kuzê ki palavra ‘alma’ ta siginifika na Bíblia.

“Kuzê ki é alma?” (Artigu na jw.org)

Diskubri si Deus ta tormenta kes algen mau na inférnu.

Deus ta kema algen na inférnu? (3:07)

Nu debe xinti medu di kes algen ki dja móre?

Spritu di algen mortu — Es ta pode djuda-nu ô es ta prujudika-nu? Es ta izisti mê? (bruxura)

Odja modi ki un ómi xinti aliviadu kantu el prende verdadi sobri kuzê ki ta kontise ku nos óras ki nu móre.

“N fika dimiradu ku respóstas klaru ki Bíblia ta da” (Sentinéla, 1 di febreru di 2015)