LISON 37

Kuzê ki Bíblia ta fla sobri trabadju i dinheru

Formatu di livru na papel

Dja bu kustuma fika preokupadu pamodi trabadju ô dinheru? Pode ser difísil kuida di kes kuza ki nu meste i omésmu ténpu da Jeová kel adorason ki el merese. Bíblia ta da-nu bons konsedju ki pode djuda-nu.

1. Kuzê ki Bíblia ta fla sobri trabadju?

Deus krê pa nu gosta di nos trabadju. Bíblia ta fla ma ‘ka ten nada midjór pa un ómi di ki goza di se trabadju duru.’ (Eclesiastes 2:24) Jeová ta trabadja duru. Óras ki nu ta imita Jeová na ser un bon trabadjador, nu ta pô-l kontenti i nu ta fika kontenti tanbê.

Nos tudu nu meste trabadja. Má nu ka debe dexa nos trabadju bira más inportanti di ki nos adorason pa Jeová. (João 6:27) Jeová ta promete ma si nu pô-l na primeru lugar na nos vida, el ta da-nu tudu kes kuza ki nu meste pa nu vive.

2. Modi ki bu pode pensa di manera ikilibradu sobri dinheru?

Bíblia ta fla ma ‘dinheru é un proteson’, má tanbê el ta aviza-nu ma nu ka ta konsigi ser filís sô ku dinheru. (Eclesiastes 7:12) Pur isu, el ta insentiva-nu pa nu ka ama dinheru, má pa nu ‘fika kontenti ku kes kuza ki nu ten.’ (Lé Hebreus 13:5.) Óras ki nu sta kontenti ku kes kuza ki nu ten, nu ka ta fika dizanimadu pamodi nu ka konsigi ten tudu kes kuza ki nu krê. Nu ta ivita faze dívida sen nisisidadi. (Provérbios 22:7) Tanbê nu ka ta faze pósta i nen otus kuza pa tenta bira riku faxi.

3. Modi ki nu pode mostra ma nu ka ta uza nos dinheru sô pa nos interesi?

Jeová é un Deus ki gosta di da. Nu ta imita-l óras ki nu ta ‘gosta di da’, i nu sta ‘prontu pa dividi nos kuza ku otus’. (1 Timóteo 6:18) Nu pode uza nos dinheru pa djuda kongregason i tanbê pa djuda kes algen ki meste, inda más nos irmons na kongregason. Jeová ka sta interesadu na kantu ki nu ta da, má pamodi ki nu ta da. Óras ki nu ta da di korason, nu ta fika kontenti i nu ta poi Jeová kontenti tanbê. — Lé Atos 20:35.

SABE MÁS

Odja pamodi ki é inportanti nu poi trabadju na se lugar i sta kontenti ku kes kuza ki nu ten.

4. Onra Jeová na manera ki bu ta trabadja

Nos amizadi ku Jeová debe influensia kuzê ki nu ta pensa sobri trabadju. Odja VÍDIU, i dipôs pâpia sobri kes pergunta li:

VÍDIU: Trabadja di tudu alma pa Jeová (4:39)

Na vídiu, kuzê ki dexa-u dimiradu na manera ki Djeison aji na trabadju?
Kuzê ki el faze pa el kontinua ta poi trabadju na se lugar?

Lé Colossenses 3:23, 24, i dipôs pâpia sobri kel pergunta li:

Pamodi ki é inportanti nu poi trabadju na se lugar?

Dizenhus: Un ómi ta poi se trabadju na primeru lugar na vida. 1. El sta ta trabadja duránti dia na skritóriu. 2. El sta kontinua ta trabadja ti noti. 3. El sta kontinua ta trabadja dipôs ki se kolégas dja bai kaza. 4. El sta ta djanta el sô na kaza.

Nos tudu nu meste trabadja. Má nunka nu ka debe dexa nos trabadju bira más inportanti di ki nos adorason pa Jeová.

Dizenhu: Kel mésmu ómi ta tra ténpu pa kes kuza ki é más inportanti. 1. El sta ta trabadja duránti dia na skritóriu. 2. El sta sai di trabadju na fin di dia. 3. El sta labanta mô na runion. 4. El sta ta djanta ku se mudjer i ses dôs fidju.

5. Sta kontenti ku kel ki nu ten é bon pa nos

Txeu algen ta tenta djunta monti dinheru. Má Bíblia ta da-nu un konsedju diferenti. Lé 1 Timóteo 6:6-8, i dipôs pâpia sobri kel pergunta li:

Kuzê ki Bíblia ta insentiva-nu pa nu faze?

Sikrê nu ka ten txeu kuza, nu pode ser filís. Odja VÍDIU, i dipôs pâpia sobri kel pergunta li:

VÍDIU: ‘Fika kontenti ku kuzas ki bu ten’ (3:20)

Nbóra kes família ka tinha txeu dinheru, kuzê ki pô-s kontenti?

Má i si nu ten txeu i simé nu krê más? Jizus konta un stória ki ta mostra kel prigu li. Lé Lucas 12:15-21, i dipôs pâpia sobri kel pergunta li:

Kuzê ki bu prende ku ilustrason di Jizus? — Odja versíklu 15.

Lé i konpara Provérbios 10:22 ku 1 Timóteo 6:10, i dipôs pâpia sobri kes pergunta li:

Kuzê ki bu ta atxa ma é más inportanti? Ten un amizadi fórti ku Jeová ô ten txeu dinheru? Pamodi?
Kal ki é prubléma di kóre tras di dinheru?

6. Jeová ta da-nu kel ki nu meste

Prublémas ki nu pode ten pamodi trabadju ô falta di dinheru, ta djuda-nu sabe si nu ta kunfia na Jeová ô nau. Odja VÍDIU pa bu prende kuzê ki nu pode faze óras ki nu sta lida ku kes tipu di prubléma li. Dipôs pâpia sobri kes pergunta li:

VÍDIU: Jeová ta da-nu kel ki nu meste (6:21)

Na vídiu, ki prublémas kel irmon pasa pa el?
Kuzê ki el faze pa el konsigi lida dretu ku kes prubléma?

Lé Mateus 6:25-34, i dipôs pâpia sobri kel pergunta li:

Kuzê ki Jeová promete faze pa kes algen ki ta pô-l na primeru lugar?

ALGUNS ALGEN TA FLA: “N ta trabadja kansadu pa N sustenta nha família. Ka ta da pa sisti tudu runion.”

Ki testu di Bíblia ta da-u sertéza ma poi Jeová na primeru lugar é kel midjór disizon?

REZUMU

Nu meste trabadja i ganha dinheru, má nunka nu ka debe dexa kes kuza la inpidi-nu di sirbi Jeová.

Perguntas di rezumu

Kuzê ki pode djuda-u pensa di manera ikilibradu sobri trabadju?
Modi ki sta kontenti ku kes kuza ki bu ten ta djuda-u?
Modi ki bu pode mostra ma bu ta kunfia ma Jeová ta kuida di se povu sima el promete?

Dia ki N tirmina kel lison li:

Sprimenta faze kel-li

Para i pensa si na kes últimu mês, bu trabadju pô-u ta falta txeu runion. Si kel-la sta kontise, odja kuzê ki bu pode faze pa midjora.

Sprimenta tanbê:

Otu kuza pa bu sprimenta

DJOBE MÁS

Odja si Bíblia ta fla ma dinheru é mariadu.

“É dinheru ki ta traze tudu prubléma?” (Artigu na jw.org)

Prende modi ki nu pode uza dinheru di un manera ki ta agrada Deus.

“Kuzê ki Bíblia ta fla sobri da?” (Artigu na jw.org)

Djuga dinheru é mariadu?

“Kuzê ki Bíblia ta fla sobri djuga dinheru?” (Nhos korda!, marsu di 2015)

Odja kuzê ki poi un ómi ki ta fazeba pósta i ki ta furtaba muda se vida.

“N gostaba txeu di korida di kabalu” (Sentinéla, 1 di novenbru di 2011)