Sforsa pa djuda pesoas bira disiplus

Kuzê ki Jizus faze

VÍDIU: Jizus inxina Nikodemus

1. Odja VÍDIU, ô lé Juan 3:1, 2. Dipôs pensa i responde kes pergunta li:

1. Pamodi ki Nikodemus ba inkontra ku Jizus di noti? — Odja Juan 12:42, 43.

2. Kantu Jizus inkontra ku Nikodemus di noti, modi ki el mostra ma el staba disididu na faze disiplus?

Kuzê ki nu ta prende ku Jizus?

2. Nu ta mostra ma nu ta ama pesoas óras ki nu sta disididu na djuda-s bira disiplus.

Imita Jizus

3. Studa na un óra i na un lugar ki é midjór pa bu studanti di Bíblia. El pode pidi pa studa na un dia i na un óra ki é midjór pa el. El pode xinti midjór si el studa na se lugar di trabadju, na se kaza ô na un lugar públiku. Faze tudu ki bu ta pode pa bu muda bu prugrama pa studa na óra i na lugar ki é midjór pa bu studanti.

4. Studa sénpri. Si bu ka ta konsigi ba faze kel studu, ka bu dismarka. Envês di kel-li, djobe kes opson li:

1. Bu ta pode faze kel studu na un otu dia duránti kel simana?

2. Bu ta pode faze kel studu pa tilifóni ô pa xamada ku vídiu?

3. Bu ta pode pidi otu algen pa ba faze kel studu?

5. Ora pa bu ten un bon atitudi. Pidi Jeová pa djuda-u ka dizisti di bu studanti, mésmu ki el ka sta ta studa tudu simana, ô si el sta ku difikuldadi na aplika kuzê ki el sta ta prende. (Flp. 2:13) Bu studanti pode ten bons kualidadi, pur isu ora ta pidi ajuda pa bu konsentra na se kualidadis.