Pamodi ki Deus ta dexa sufrimentu kontise?

DEUS TA PREOKUPA KU NOS SUFRIMENTU?

Marta: Oi, Sufia. Tudu dretu?

Sufia: N sta dretu i bo?

Marta: N sta dretu tanbê, obrigadu. N sta kontenti di atxa-u na kaza. Kel últimu bês ki N ben li, nu pâpia sobri modi ki Deus ta xinti óras ki nu ta sufri. Bu flaba mi ma dja ten txeu ténpu ki bu ta faze kel pergunta li, prinsipalmenti dipôs ki bu mai panha asidenti. É simé Sufia, modi ki el sta?

Sufia: Óra dretu, óra mariadu. Má oji el sta más midjór.

Marta: N ta fika kontenti di sabe ma el sta midjór. Debe ser txeu difísil pa bo odja-l ta sufri si.

Sufia: Nen bu ka sabe própi. N ta fika ta pergunta ti ki ténpu el ta kontinua ta sufri si.

Marta: É normal bu xinti si. Talvês bu ta lenbra ma kel últimu bês ki N ben li, N fika di responde-u pamodi ki Deus ta dexa sufrimentu kontise sikrê el ten puder pa kaba ku el.

Sufia: N ta lenbra sin.

Marta: Má antis di nu odja kuzê ki Bíblia ta fla sobri kel-li, nu ben lenbra alguns di kes kuza ki nu pâpia di el na kel otu dia.

Sufia: Ka ten prubléma.

Marta: Primeru nu odja ma ti un ómi fiel, ki vive na ténpu ki Bíblia skrebedu, pergunta Deus pamodi ki el ta dexa-nu sufri, má simé Deus ka xatia ku el i nen El ka fla-l ma el mesteba ten más fé.

Sufia: É simé, nen N ka sabia di kel-li.

Marta: Nu odja tanbê ma Jeová ka gosta di odja-nu ta sufri. Pur izénplu, Bíblia ta fla ma kantu se povu staba ta pasa pa difikuldadis, ‘el sufri djuntu ku es.’a Sabe ma Deus ta preokupa ku nos sufrimentu ta konsola-nu, bu ka ta atxa?

Sufia: Klaru.

Marta: I dipôs nu odja ma Deus ten txeu puder, pur isu el pode kaba ku tudu nos sufrimentu óras ki el krê.

Sufia: É kel-li própi ki N ka ta ntende. Si Deus ten puder pa inpidi sufrimentu, nton pamodi ki el ta dexa-nu sufri?

SATANÁS FLA MA DEUS É MINTIROZU

Marta: Pa nu sabe respósta di kel pergunta li, primeru nu odja kuzê ki kel primeru livru di Bíblia, ki é Génesis, ta fla. Bu konxe kel stória di Adon ku Eva i di kel fruta proibidu?

Sufia: N konxe sin. N prende kel-li na katikezi. Deus flaba es pa es ka kume fruta di un arvi, má es kume simé.

Marta: É kel-la própi. Gósi nu ben odja kuzê ki poi Adon ku Eva ta dizobidese Deus. Respósta pa kel-li ta djuda-nu ntende pamodi ki nu ta sufri. Bu ta gostaba di lé Génesis kapítlu 3, versíklus 1 ti 5?

Sufia: Ok. ‘Kóbra éra kel animal brabu más spértu ki Jeová Deus dja fazeba. Nton el fla mudjer: “É si própi ki Deus fla, ma nhos ka debe kume di tudu arvi na jardin?” Nton mudjer fla kel kóbra: “Nu pode kume di fruta di arvis di jardin. Má sobri kel fruta di kel arvi ki sta na meiu di jardin, Deus fla: ‘Ka nhos kume-l, nau, nen ka nhos toka na el, sinon nhos ta móre.’” Nton kóbra fla mudjer: “É klaru ki nhos ka ta móre. Pamodi Deus sabe, ma na kel dia ki nhos kume-l, nhos odju ta abri i nhos ta bira sima Deus, ta sabe kel ki é dretu i kel ki é mariadu.”’

Marta: Obrigadu. Gósi nu ben analiza kes versíklu li. Primeru repara ma kel kóbra pâpia ku Eva. Otus testu di Bíblia ta mostra ma é Satanás ki uza un kóbra pa el pâpia ku Eva.b Satanás pergunta Eva sobri kel órdi ki Deus da-s. Bu repara kuzê ki Deus fla-s ma ta kontiseba ku es si es kumeba kel fruta?

Sufia: Es ta moreba.

Marta: É kel-la própi. Dipôs Satanás fla un kuza gravi kóntra Deus. Odja kuzê ki el fla: ‘É klaru ki nhos ka ta móre.’ Na verdadi, Satanás staba ta fla ma Deus é mintirozu!

Sufia: Nunka N ka obiba kel-li antis.

Marta: Kel-li éra un kuza gravi ki Satanás fla i ta lebaba ténpu pa el fika rezolvidu. Bu ta ntende pamodi?

Sufia: Mmm. Parse-m ma nau.

Marta: Dexa-m da-u un izénplu pa bu ntende midjór. Imajina ma un dia N ta txiga na bo i N ta fla-u ma mi é más fórti ki bo. Modi ki bu ta provaba ma é kasí?

Sufia: Talvês nu tinha ki faze un testi pa tra próva.

Marta: Sima bu fla. Talvês nu ta skodjeba un kuza pizadu pa nu odja kal di nos dôs ki ta pode labanta-l, asi nu ta traba próva di kenha ki é más fórti.

Sufia: Dja N ntende.

Marta: Má i si envês di N fla-u ma mi é más fórti, N flaba ma bo é ka un algen onéstu. Kel-li gó ta sérba otu kuza ô nau?

Sufia: N ta atxa ma sin.

Marta: Sin, pamodi onestidadi é diferenti di forsa. Nu ka ta pode tra próva di el sô ku un testi sima kel ki nu fla.

Sufia: Kel-la gó é simé.

Marta: Nu tinha ki da ténpu pa otus algen odja si bo é onéstu ô nau, ka simé?

Sufia: Kel-li ta faze sentidu.

Marta: Gósi nu torna odja kuzê ki Génesis ta fla. Satanás fla ma el é más fórti ki Deus?

Sufia: Nau.

Marta: Si éra kel-li ki el flaba, Deus ta provaba kel óra ma el staba mariadu. Envês di kel-li, Satanás fla ma Deus é ka onéstu. Na verdadi, é sima si el fla Eva: ‘Deus é mintirozu, má ami N sta ta fla-u kel ki é verdadi.’

Sufia: Kel-li é interesanti.

Marta: Deus ten txeu sabedoria, pur isu el odja ma midjór manera di rezolve kel asuntu li, éra da ténpu pa prova si kel ki Satanás fla éra verdadi ô nau. Ku ténpu ta fikaba klaru kenha ki staba ta fla verdadi i kenha ki staba ta fla mintira.

SATANÁS DIZÂFIA DEUS

Sufia: Má kantu Eva móre, kel-la ka prova ma Deus staba ta fla verdadi?

Marta: Sin, má kel-la ka ta txigaba pa prova tudu kuza ki staba nvolvidu na kel dizafiu ki Satanás lansa. Odja versíklu 5 otu bês. Bu repara kuzê más ki Satanás fla Eva?

Sufia: El fla-l ma si el kumeba kel fruta, se odju ta abriba.

Marta: Sin, i ma el ta biraba sima Deus ‘ta sabe kel ki é dretu i kel ki é mariadu.’ Nton é sima si Satanás fla ma Deus staba ta stroba algen na Téra di ten kuzas sábi.

Sufia: Ok. Dja N ntende kel-li.

Marta: I kel-li tanbê ka éra un kuza fásil di rezolve.

Sufia: Kuzê ki bu krê fla?

Marta: Kantu Satanás fla kel-li, el da ideia ma Eva i tudu algen na Téra ta sérba más filís si es ka obiba ku Deus. Jeová sabia ma midjór manera di prova ma kel ki Satanás fla staba mariadu, éra dexa-l manda na mundu pa un ténpu. É pur isu ki ten txeu sufrimentu pamodi é Satanás ki sta ta manda na mundu, é ka Deus.c Má ten notísias sábi pa bo.

Sufia: É kal?

Marta: Bíblia ta inxina-nu kes dôs kuza sábi li sobri Deus. Primeru, Jeová ta djuda-nu óras ki nu ta sufri. Pur izénplu, odja kuzê ki rei Davidi fla na Salmo 31:7. Davidi pasa pa txeu sufrimentu na vida, má odja kuzê ki el fla Deus na orason. Bu krê lé kel versíklu li, favor?

Sufia: Sin. El ta fla: ‘N ta ben xinti grandi alegria na bu amor lial, pamodi bu ta odja nha sufrimentu; bu konxe kel tristéza grandi ki N ta xinti.’

Marta: Nton, sikrê Davidi staba ta sufri txeu, el xinti konsoladu pamodi el sabia ma Jeová staba ta odja tudu sufrimentu ki el staba ta pasa pa el. Bu ka ta xinti aliviadu di sabe ma Jeová ta ntende modi ki nu ta xinti óras ki nu ta sufri, sikrê otus algen ka ta ntende?

Sufia: Kel-li ta konsola-nu sin.

Marta: Kel otu kuza rei di sábi, é ki Deus ka ta ben dexa-nu sufri pa tudu ténpu. Bíblia ta fla ma ka ta dura, el ta ben kaba ku govérnu di Satanás i ku tudu kuza kasábi ki ta kontise, i kel-li ta inklui kes kuza ki bo ku bu mai sta ta pasa pa el. Kuzê ki bu ta atxa di N pasa na kel otu simana pa N mostra-u modi ki nu pode ten sertéza ma Deus ta ben kaba ku sufrimentu?

Sufia: Kel-li é bon ideia.