Ki ténpu ki Reinu di Deus kumesa ta governa? — Párti 1

‘KONTINUA TA DJOBE’ NTENDIMENTU

Manuel: Juzé, N sta ta gosta txeu di nos konbérsu sobri Bíblia.a Últimu bês ki nu pâpia bu faze-m un pergunta sobri Reinu di Deus. Bu pergunta-m pamodi ki Tistimunhas di Jeová ta kridita ma Reinu di Deus kumesa ta governa na anu 1914.

Juzé: Sin. É pamodi N staba ta lé un di nhos publikason i la ta fla ma Reinu di Deus kumesa ta governa na anu 1914. N fika ku kuriozidadi pamodi nhos ta fla ma tudu kuza ki nhos ta inxina ten bazi na Bíblia.

Manuel: Kel-la é simé.

Juzé: Bon, dja N lé Bíblia interu, má N ka ta lenbra di ninhun testu ki ta pâpia di anu 1914. Nton, N piskiza “1914” na un Bíblia na internet, má nada N ka atxa.

Manuel: Boa Juzé. N krê ilojia-u pa dôs kuza. Primeru, pamodi dja bu lé Bíblia interu. Ta da pa odja ma bu gosta di Palavra di Deus.

Juzé: N gosta sin. Ka ten ninhun livru sima Bíblia.

Manuel: É simé. Sugundu, N krê ilojia-u pamodi bu sta ta djobe na Bíblia respósta pa bus pergunta. Bu faze sima Bíblia ta fla pa nu faze, ki é ‘kontinua ta djobe’ ntendimentu.b Bu sta faze dretu.

Juzé: Obrigadu. N krê kontinua ta prende. Na verdadi, N piskiza más sobri 1914 na kel livru ki bu da-m pa nu studa i N atxa alguns informason, ki ta pâpia sobri un sonhu ki un rei tevi di un arvi ki kortadu i ki dipôs kria otu bês.

Manuel: Sin. Kel profesia li sta na kapítlu 4 di livru di Daniel. La ta pâpia di un sonhu ki un rei di Babilónia, ki txomaba Nabukudunuzor, tevi.

Juzé: Sin, é kel-la própi. N lé kel profesia un monti bês. Má pa ser sinseru, inda N ka ntende kuzê ki kel profesia li ten aver ku Reinu di Deus i ku anu 1914.

Manuel: Bu sabe un kuza, Juzé? Nen proféta Daniel ka ntende tudu kuza ki Deus manda-l skrebe!

Juzé: Kel-li é simé?

Manuel: Sin. Na Daniel 12:8, el fla: ‘Ami N obi, má N ka konsigi ntende’.

Juzé: Inda ben ki é ka sô mi.

Manuel: Daniel ka ntende pamodi inda ka txigaba ténpu pa Deus mostra siginifikadu di kes profesia. Má gósi nu ta pode ntende-s.

Juzé: Pamodi ki bu sta fla si?

Manuel: Bon, repara kuzê ki versíklu 9 ta fla: ‘Palavra é un segredu pa guarda i pa fika fitxadu ti ki txiga ténpu di fin.’ Kel-li ta mostra ma kel profesia li ta sérba ntendedu sô na ‘ténpu di fin.’ I ka ta dura nu ta ben odja próvas na nos studu ki ta mostra ma nu sta ta vive na ténpu di fin.

Juzé: Ok. Nton, bu ta pode splika-m kel profesia di Daniel?

Manuel: N sta ben tenta.

KEL SONHU DI NABUKUDUNUZOR

Manuel: Pa kumesa, N ta faze-u un rezumu di sonhu di Nabukudunuzor. Dipôs, nu ta ben pâpia sobri kuzê ki kel sonhu li siginifika.

Juzé: Ok.

Manuel: Nabukudunuzor sunha ku un arvi uma grandi ki ta txigaba ti séu. Dipôs el obi un anju di Deus ta manda pa kel arvi kortadu. Má Deus fla pa dexa se toku. Dipôs ki pasaba ‘seti ténpu’ kel arvi ta torna kriaba otu bês.c Kel profesia li kunpri primeru na rei Nabukudunuzor. El éra un rei ki ta distakaba na kel ténpu, sima kel arvi ki ta txigaba ti séu. Má el kortadu ô el tradu di se reinu duránti ‘seti ténpu’. Bu ta lenbra kuzê ki kontise dipôs?

Juzé: Nau.

Manuel: Ka ten prubléma. Bíblia ta mostra ma Nabukudunuzor fika dodu duránti seti ténpu ô seti anu. Na kel ténpu, el ka konsigi governa. Má dipôs, Nabukudunuzor torna fika prontu i el kumesa ta governa otu bês.d

Juzé: Ok. Ti li dja N ntende. Má kuzê ki kel-li ten aver ku Reinu di Deus i anu 1914?

Manuel: É pamodi kel profesia li ta kunpri di dôs manera. Primeru, el kunpri kantu rei Nabukudunuzor para di governa pa un ténpu. El kunpri di kel sugundu manera, kantu govérnu di Deus para di governa pa un ténpu tanbê. Nton, é kel sugundu manera ki kel profesia kunpri ki ten aver ku Reinu di Deus.

Juzé: Modi ki nhos sabe ma kel profesia kunpri di dôs manera i ma el ten aver ku Reinu di Deus?

Manuel: Primeru é pamodi kel profesia própi ta mostra kel-li. Sima sta na Daniel 4:17, kel profesia fazedu ‘asi pa tudu kes ki ta vive sabe ma kel Algen Más Grandi é Governanti na reinu di mundu i ma el ta da-l pa kenha ki el krê.’ Bu repara kes palavra ‘reinu di mundu’?

Juzé: Sin, la ta fla ma ‘kel Algen Más Grandi é Governanti na reinu di mundu’.

Manuel: É kel-la própi. Kenha ki bu ta atxa ma é ‘kel Algen Más Grandi’?

Juzé: N ta atxa ma é Deus.

Manuel: Izatamenti. Nton, kel-li ta mostra ma kel profesia ka ta kunpri sô na Nabukudunuzor. Tanbê el ta kunpri na ‘reinu di mundu’, ki é autoridadi ki Deus ten riba algen na Téra. I nu ta ntende kel-li midjór óras ki nu ta analiza kes kapítlu antis i dipôs.

Juzé: Kuzê ki bu krê fla?

KEL TÉMA PRINSIPAL DI LIVRU DI DANIEL

Manuel: Livru di Daniel ten un téma prinsipal. Txeu bês el ta pâpia sobri kel ténpu ki Reinu di Deus ta ben governaba i ki Jizus ta sérba Rei di kel Reinu. Pur izénplu, nu bai un bokadinhu pa tras, na Daniel 2:44. Bu krê lé favor?

Juzé: Sin. El ta fla: ‘Na dia di kes rei, Deus di Séu ta ben traze un reinu ki ka ta kaba nunka más. I kel reinu li ka ta pasa pa mô di ninhun otu povu. El ta ben disfaze i el ta ben kaba ku tudu kes reinu, i sô el ta ben fika pa tudu ténpu’.

Manuel: Obrigadu. Bu ta atxa ma kes versíklu li sta ta pâpia sobri Reinu di Deus?

Juzé: Mmm. N ka ten sertéza.

Manuel: Repara ma kel testu li ta fla ma kel Reinu ta ben fika ‘pa tudu ténpu’. Bu ta atxa ma kes govérnu di ómi ta dura pa tudu ténpu?

Juzé: N ta atxa ma nau.

Manuel: É sima bu fla. Ten otu profesia na kel livru li ki ta pâpia sobri Reinu di Deus. El sta na Daniel 7:13, 14. El ta pâpia sobri un governanti ki ta ben parseba na futuru i el ta fla: ‘El dadu autoridadi, ónra i un reinu, asi pa povus, nasons i línguas sirbi-l. Se govérnu é un govérnu pa tudu ténpu, ki ka ta kaba nunka más, i se reinu ka ta distruídu.’ Bu odja algun kuza na kel profesia li ki ta parse ku kel otu?

Juzé: Sin, es tudu dôs ta pâpia di un reinu.

Manuel: Boa. Má kel-li é ka kalker reinu. Repara ma kel Reinu li ta ben tinha autoridadi riba ‘povus, nasons i línguas’. Kel-li krê fla ma kel Reinu li ta ben governaba na mundu interu.

Juzé: N ka odjaba kel-la, má é simé. É si ki el ta fla.

Manuel: Alén di kel-li, odja kuzê ki kel profesia ta kontinua ta fla: ‘Se govérnu é un govérnu pa tudu ténpu, ki ka ta kaba nunka más, i se reinu ka ta distruídu.’ Bu ka ta atxa ma kel-li ta parse txeu ku kel ki nu lé na Daniel 2:44?

Juzé: Sin. Bu ten razon.

Manuel: Ok. Nton gósi nu faze un rezumu di kuzê ki nu odja ti li. Kel profesia ki sta na Daniel kapítlu 4, fazedu asi pa algen sabe ma ‘kel Algen Más Grandi é Governanti na reinu di mundu’. Sô kel-li ta mostra ma kel profesia ta kunpri di otu manera inda más inportanti di ki kel manera ki el kunpri na Nabukudunuzor. I livru di Daniel ten txeu profesia sobri Reinu di Deus i sobri kel Rei ki ta ben governa, ki é Fidju di Deus. Bu ta atxa ma kel profesia di Daniel na kapítlu 4 tanbê ten aver ku Reinu di Deus?

Juzé: N ta atxa ma sin. Má inda N ka ntende kuzê ki kel-li ten aver ku anu 1914.

‘DEXA PASA SETI TÉNPU’

Manuel: Bon, nu ben torna pâpia di rei Nabukudunuzor. Na kel primeru párti di es profesia ki kunpri, Nabukudunuzor reprizentadu pa un arvi. Kel arvi kortadu i el ka dexadu kria duránti seti ténpu. Kel-li kontise kantu el fika dodu duránti un ténpu. Kes seti ténpu kaba kantu Nabukudunuzor torna bira prontu i el kumesa ta governa otu bês. Na kel sugundu kunprimentu di es profesia, Reinu di Deus para di governa duránti un ténpu tanbê, má é ka pamodi Deus fadja.

Juzé: Kel-li é modi?

Manuel: Na ténpu ki Bíblia skrebedu, kes rei di Israel ta governaba na Jiruzalen, ki éra sima ‘tronu di Jeová’e pamodi es ta reprizentaba govérnu di Deus i es ta governaba se povu. Má maioria di kes rei kaba pa dizobidese Deus i maioria di kes algen ki es ta governaba sigi ses mau izénplu. Dja ki kes israelita ka obi ku Deus, el dexa kes genti di Babilónia tra-s di la na anu 607 A.J. Di la pa dianti, ninhun otu rei ka reprizenta Jeová na Jiruzalen. É na kel sentidu li ki Reinu di Deus dexa di governa pa un ténpu. Bu konsigi ntende ti li?

Juzé: N ta atxa ma sin.

Manuel: Nton, kes seti ténpu kumesa na anu 607 A.J. kantu govérnu di Deus para di governa. Na fin di kes seti ténpu, Deus ta skodjeba un novu governanti pa reprizenta-l, má di es bês ta sérba un governanti na Séu. Kel-li kontise kantu kes otu profesia ki nu lé na Daniel kunpri tanbê. Agó pergunta ki ta fika é: ki ténpu ki kes seti ténpu tirmina? Si nu konsigi responde kel pergunta li, nu ta sabe ki ténpu ki Reinu di Deus kumesa ta governa.

Juzé: Mmm. Parse-m dja N sabe. Kes seti ténpu tirmina na anu 1914?

Manuel: Boa! É kel-la própi.

Juzé: Má modi ki nu ta sabe kel-li?

Manuel: Bon, kantu Jizus staba na Téra, el mostra ma kes seti ténpu inda ka tirminaba.f Kel-li ta mostra ma kes seti ténpu ta duraba txeu. Kes seti ténpu kumesa uns 600 anu antis di Jizus ben pa Téra i es kontinua ti algun ténpu dipôs ki Jizus torna bai pa Séu. Lenbra ma Deus ta djudaba algen ntende siginifikadu di kes profesia di Daniel sô na ‘ténpu di fin’.g É interesanti ki pa vólta di anu 1870, alguns studanti di Bíblia tinha gana di ntende siginifikadu di kes profesia li i di otus, nton es izamina-s ku kuidadu. Es kumesa ta ntende ma kes seti ténpu ta tirminaba na anu 1914. Apartir di kel anu la kontise kuzas inportanti na Téra ki mostra ma Reinu di Deus kumesa ta governa na anu 1914. É na kel anu la ki ténpu di fin kumesa tanbê. N sabe ma kel-li é txeu informason pa ntende di un bês sô. . . 

Juzé: Sin. É simé, N ten ki ben lé tudu kel-li otu bês pa N pode ntende dretu.

Manuel: Má ka bu preokupa. Ami tanbê N leba algun ténpu pa N ntende kel asuntu li. Má N ta spéra ma bu ntende ma tudu kuza ki nu ta inxina ten bazi na Bíblia.

Juzé: Kel-la gó é simé. Sénpri N fika dimiradu ku kel-li própi.

Manuel: Ta da pa odja ma é kel-li ki bu krê faze tanbê. Má sima N fla-u, kel-li é txeu informason pa ntende di un bês sô. Talvês inda bu ten alguns pergunta. Pur izénplu, sima dja nu odja kes seti ténpu ki ten aver ku Reinu di Deus kumesa na anu 607 A.J. Má modi ki nu sabe ma kes seti ténpu tirmina na anu 1914?

Juzé: É kel-la. É na kel-li ki N staba ta pensa própi.

Manuel: Própi Bíblia ta djuda-nu sabe kantu ténpu ki kes seti ténpu ta dura. Bu ta gostaba pa nu pâpia di kel-li na prósimu bês ki N ben?h

Juzé: N ta gostaba sin.