Gósi N ta xinti ma N pode djuda otus algen

MODI KI ÉRA NHA VIDA ANTIS:

N nase na Akul, un sidadi ki ta fika izoladu na montanhas na Guatemala. Nha família ta faze párti di povu Ixil, ki é un rasa ki ben di povu Maia. N ta pâpia spanhol i désdi mininu N ta pâpia ixil, ki é língua di nha povu. Kantu mi éra pikinoti, staba ta kontise kel ténpu difísil di géra sivil na Guatemala ki dura 36 anu. Na kel ténpu txeu algen di povu Ixil móre.

Kantu N tinha kuatu anu, nha irmon más grandi, ki tinha 7 anu, staba ta brinka ku un bonba ki spludi dirapenti. Pamodi kel-li, N fika ségu. N ta xinti tristi di fla ma nha irmon móre. Dipôs di kel-li, N bai fika na un organizason ki ta djuda mininus ségu na sidadi di Guatemala, undi ki N prende braili. N ka ntende pamodi, má kes algen ki ta trabadjaba la inpidi-m di pâpia ku kes otu mininu i nhas koléga ta ivitaba mi. N ta xintiba mi sô i N ta tinha gana pa txigaba kes dôs mês na anu ki N ta baba pa kaza i ki N ta staba ku nha mai, ki sénpri éra dretu i ta trataba algen ku karinhu. Infilismenti el móre kantu N tinha 10 anu. N fika uma tristi pamodi N perde kel úniku algen na mundu ki ta amaba mi.

Kantu N tinha 11 anu, N volta pa nha sidadi undi ki N nase. N bai mora ku nha irmon sô pa ladu pai i se família. Es ta kuidaba di mi i es ta daba mi tudu kuza ki N meste. Má ningen ka ta daba mi kel amor ki N staba ta meste. Alvês N ta perguntaba Deus: “Pamodi ki nha mai móre? Pamodi ki N ten ki ser ségu?” Pesoas ta flaba mi ma kes disgrasa li éra vontadi di Deus. N fika ta atxa ma Deus é mau i injustu. Sô N ka mata kabésa pamodi N ka tinha manera di faze kel-la.

Pamodi mi é ségu, kalker kuza ta maguaba nha korason i N ka tinha manera di proteje nha kabésa di otus prigu. Kantu mi éra mininu, N sufri abuzu seksual txeu bês. Nunka N ka kexa ningen, pamodi N ta atxaba ma es ka ta preokupaba ku mi. Éra difísil pesoas papiaba ku mi i N ka ta papiaba ku ningen. Mi éra diprimidu, N ta xintiba mi sô i N ka ta kunfiaba na ningen.

MODI KI BÍBLIA MUDA NHA VIDA:

Kantu N tinha 13 anu, un kazal di Tistimunhas di Jeová ben pâpia ku mi, timenti N staba na intervalu di skóla. Un profesora ki tinha péna di nha situason, ki pidiba es pa es pâpia ku mi. Es pâpia ku mi sobri promésa di Bíblia ma kes algen ki dja móre ta ben resusitadu i ma un dia kes algen ki é ségu ta bira ta odja otu bês. (Isaías 35:5; João 5:28, 29 ) N gosta di kuzê ki es inxina-m, má N atxa difísil ten un konbérsu ku es pamodi N ka staba kustumadu ku pâpia. Sikrê mi éra tímidu, es trata-m ku bondadi i paxénxa i es kontinua ta vizita-m i ta inxina-m sobri Bíblia. Kel kazal ta andaba más di 10 kilómetru i es ta pasaba na meiu di montanhas pa es txigaba na nha sidadi.

Nha irmon sô pa ladu pai fla ma kel kazal ta bistiba dretu, nbóra es ka tinha txeu dinheru. Má simé, sénpri es ta preokupaba ku mi di verdadi i es ta trazeba mi prezentis pikinoti. N ta atxaba ma é sô kristons verdaderu ki pode mostra kel tipu di amor li.

N studa Bíblia ku ajuda di publikasons na braili. Nbóra N ta ntendeba kuzê ki N staba ta prende, tinha alguns kuza ki éra difísil di N seta. Pur izénplu: N sforsa txeu pa N kridita ma Deus ta preokupaba ku mi i ma otus algen pode amaba mi sima Deus ta amaba mi. N ta ntendeba pamodi ki Jeová ta dexa kuzas mariadu ta kontise pa un ténpu. Má N ta atxaba difísil odja-l sima un Pai ki ta ama-nu.a

Ku ténpu, kuzê ki N prende di Bíblia djuda-m muda nha manera di pensa. Pur izénplu, N prende ma Deus ta poi na nos lugar óras ki nu ta sufri. I sobri se sérvus ki staba ta ser maltratadu, Deus fla: ‘Di sertéza N odja frónta di nha povu. I N sabe dretu modi ki es sta ta sufri.’ (Êxodo 3:7 ) Kantu N kumesa ta da valor pa kes kualidadi bunitu ki Jeová ten, N disidi da nha vida pa el. Na anu di 1998 N batizadu kómu Tistimunha di Jeová.

Más ô ménus un anu dipôs ki N batiza N faze un kursu pa ségu pértu di sidadi di Escuintla. Un ansion di kel kongregason di zóna undi ki N ta moraba da kónta di difikuldadi ki N tinha pa sisti runion. Kongregason más pértu ta fikaba na ladu di kel montanha ki kel kazal ta pasaba na el pa ba studaba ku mi. Pa mi éra txeu difísil di faze kel viaji la. Pa djuda-m, kel ansion atxa un família di Tistimunhas di Jeová na Escuintla ki krê resebeba mi na ses kaza pa djuda-m sisti runions. Ti oji, es ta kuida di mi sima ki mi é ses família.

N pode kontaba txeu otus izénplu di amor di verdadi ki irmons na kongregason mostra-m. Tudu kel-li ta da-m sertéza ma pamodi mi é Tistimunha di Jeová N sta na meiu di kristons di verdadi. — João 13:34, 35.

BENSONS KI N RESEBE:

N ka ta xinti sen valor más ô un algen sen speransa. Nha vida oji ta faze sentidu. Ami é ministru pa ténpu interu na trabadju ki Tistimunhas di Jeová ta faze pa inxina Bíblia. Asi N ta konsentra na inxina pesoas verdadis di Bíblia envês di N konsentra na nha prubléma. N ten priviléjiu di ser ansion na kongregason i N ta faze diskursu pa públiku na kongregasons di kel sidadi. Ti N tevi priviléjiu di faze diskursu ku bazi na Bíblia pa milharis di algen na kongrésus.

Na 2010, N kursa Escola de Treinamento Ministerial (ki gósi ta txomadu Skóla pa Pregadoris di Reinu) ki fazedu na El Salvador. Kel skóla li, pripara-m pa N kuida di nhas responsabilidadi na kongregason di midjór manera. Kel trenamentu ki N resebe li pô-m ta xinti ma N ten txeu valor pa Jeová Deus i ma el ta ama-m. Jeová pode da kalker algen kapasidadi pa faze se trabadju.

Jizus fla: ‘É más sábi da di ki toma.’ (Atos 20:35 ) Gósi, N pode fla ma mi é filís di verdadi, i N ta xinti ma N pode faze kuzas ki nunka N ka pensaba ma N ta konsigi fazeba. Má gósi N ta xinti ma N pode djuda otus algen.