Bu futuru sta na bu mô!

BU PODE SKODJE MODI KI BU FUTURU TA SER? Alguns algen ta kridita ma é sórti ô distinu ki ta kontrola nos vida, envês di kes disizon ki nu ta toma. Óras ki ses planu ka ta da sértu, es ta fla: “Ka staba pa kontise.”

Otus perde speransa pamodi preson ô injustisa di kel mundu li. Talvês ti es tenta midjora ses vida, má txeu bês ses planu ka da sértu pamodi géra, krimi, disgrasa ô duénsa. Pur isu, es ta pensa: ‘Ka bale péna tenta.’

É verdadi ki nu ka ta konsigi sabe alguns kuza ki sta pa kontise i kel-li pode trapadja planus ki nu tene gósi. (Eclesiastes 9:11) Má, sobri modi ki bu futuru ta ben ser, disizons ki bu ta toma é txeu inportanti. Na verdadi, Bíblia ta mostra ma disizons ki bu ta toma, ta mostra modi ki bu futuru ta ben ser.

Odja kuzê ki kontise ku nason di Israel di ténpu antigu, kantu es staba ta entra na téra ki Deus prometeba es. Muizés, ki éra líder di kes israelita, fla-s kuzê ki Jeová dja flaba: ‘N poi bu dianti vida ku mórti, benson ku maldison. Nhos skodje vida pa nhos kontinua bibu, anhos ku nhos disendentis, i pa kel-la nhos ten ki ama Jeová, nhos Deus, nhos ten ki obi se vós i pega na El’. — Deuteronómio 30:15, 19, 20.

‘N poi bu dianti vida ku mórti, benson ku maldison. Nhos skodje vida’. — Deuteronómio 30:19.

Deus liberta kes israelita di ser skravu na Ijitu i el da-s oportunidadi di mora filís na kel téra ki el prometeba es. Má pa es resebeba kel tipu di vida li, es meste fazeba un kuza. Es tinha ki skodjeba vida. Modi ki es ta fazeba kel-li? Es tinha ‘ki ama Jeová, ses Deus, obi se vós i pega na El’.

Oji, bu meste faze un kuza sima kel-li. I disizon ki bu ta toma ta mostra modi ki bu futuru ta ben ser. Óras ki bu skodje ama Deus, obi se vós i pega na El, bu sta ta skodje vive pa tudu ténpu li na téra, na un paraízu. Má modi ki bu pode faze kada un di kes kuza li?

SKODJE AMA DEUS

Amor é kel kualidadi más inportanti ki Deus ten. Apóstlu Juan fla: ‘Deus é amor.’ (1 João 4:8) É pur isu, ki Jizus fla ma kel mandamentu más grandi i más inportanti é: ‘Ama Jeová, bu Deus, di tudu bu korason, di tudu bu alma i di tudu bu menti.’ (Mateus 22:37) Un amizadi verdaderu ku Deus, ka debe ten bazi na medu ô na obi ku el sen pensa, má el debe ten bazi na amor. Má modi ki nu ta skodje ama Deus?

Amor ki Deus ten pa nos é sima kel ki un pai ku un mai ten pa ses fidjus. Es ta inxina, es ta nkoraja, es ta apoia i es ta koriji ses fidjus. Es ta faze kel-li pamodi es krê pa ses fidjus ser filís i pa es ten bons rezultadu na vida. I kuzê ki pai ku mai ta spéra di ses fidjus? Es ta spéra ma ses fidjus ta ama-s i ma es ta faze tudu kes kuza ki es inxina-s pa es pode ten bons rezultadu na vida. Nton, bu ka atxa ma é normal pa nos Pai na séu spéra pa nu mostra-l amor i pa nu da valor pa tudu kuza ki dja el faze pa nos?

OBI SE VÓS

Na língua ki Bíblia skrebedu, palavra ‘obi’ tanbê krê fla obidese. I é ka kel-li ki nu ta krê fla óras ki nu ta fla un mininu: “Obi ku bu pai i ku bu mai”? Nton, obi ku vós di Deus krê fla prende sobri el i obidese-l. É verdadi ki nu ka ta pode obi vós di Deus, má nu pode obi kuzê ki el ta fla-nu óras ki nu ta lé se Palavra, Bíblia i nu ta faze sima el ta fla. — 1 João 5:3.

Pa mostra modi ki é inportanti obi ku vós di Deus, Jizus fla: ‘Ómi ka debe vive sô di pon, má di tudu palavra ki ta ben di bóka di Jeová.’ (Mateus 4:4) Nu sabe ma kume é un kuza txeu inportanti. Má prende sobri Deus é más inportanti inda. Pamodi? Rei Salumon, ki tinha txeu sabedoria, fla: ‘Sabedoria é un proteson, sima dinheru é un proteson. Má, vantaji di konhisimentu é kel-li: sabedoria ta proteje vida di kel algen ki ten el.’ (Eclesiastes 7:12) Sabedoria i konhisimentu ki Deus ta da-nu pode proteje-nu désdi gósi. Kes kuza li tanbê pode djuda-nu toma bons disizon gósi i na futuru es pode da-nu vida pa tudu ténpu.

PEGA NA EL

Na kel artigu ki pasa, nu odja ma Jizus fla kel-li: ‘Kel porton stretu i kel strada pertadu ta leba pa vida, i é poku algen ki ta atxa-l.’ (Mateus 7:13, 14) Si nu staba ta viaja na un strada sima kel-li, di sertéza ta sérba bon ten un gia ku spiriénsia djuntu ku nos. Tanbê nu ta meste un gia ku spiriénsia pa djuda-nu txiga na kel lugar ki nu krê, ki é vida pa tudu ténpu. É pur isu, ki nu meste fika pértu di Deus. (Salmo 16:8) Modi ki nu pode faze kel-li?

Tudu dia nu ten txeu kuza pa faze i txeu otus kuza ki nu ta gostaba di faze. Kes kuza li pode pô-nu txeu okupadu ô distraídu ki nu ta fika ku poku ô ninhun ténpu pa pensa na kes kuza ki Deus krê pa nos. É pur isu ki Bíblia ta fla: ‘Nhos mante txeu sienti pa nhos ka anda sima algen tolu, má sima algen ki ten sabedoria, ta uza nhos ténpu di midjór manera ki nhos pode, pamodi nu sta vive na ténpu mau.’ (Efésios 5:15, 16) Óras ki nu ta poi nos amizadi ku Deus na primeru lugar, nu ta pega na El. — Mateus 6:33.

DISIZON É DI BO

Muda bu pasadu é un kuza ki bu ka pode faze, má bu pode skodje un futuru rei di sábi pa bo i pa kes algen ki bu ta ama. Bíblia ta mostra ma nos Pai na séu, Jeová, ta ama-nu txeu. I el ta djuda-nu sabe kuzê ki nu debe faze. Odja kuzê ki proféta Mikeias fla:

‘Ó ómi, dja el fla-u, sobri kuzê ki é bon. I kuzê ki Jeová ta pidi di bo? Sô pa bu faze justisa, ama lialdadi i anda di manera modéstu ku bu Deus!’ — Miqueias 6:8.

Bu ta seta konviti di Jeová pa anda ku el i pa ten vida pa tudu ténpu xeiu di kuzas sábi? Disizon é di bo!