Óras ki kontise un dizastri na naturéza

“Na komésu nu fika dizusperadu. Txeia i téra ki disliza kaba ku tudu kuzas ki nu tinha.” — André, Séra Lioa.

“Dipôs di kel furakon, nu volta pa nos kaza. Tudu kuza staba distruídu. Nu fika sen sabe kuzê ki nu ta flaba. Nha fidju-fémia da ku duedju na txon i el kumesa ta txora.” — Davidi, Ilhas Vírjen.

SI ALGUN bês dja bu pasa pa un dizastri na naturéza, talvês bu sabe kuzê ki é fika spantadu, ka ta krê kridita, ka ta ntende, preokupadu i ten pezadélu.Txeu algen ki salva na un dizastri na naturéza ta fika dizanimadu i kansadu di tal manera ki nen es ka ta krê tenta rekupera.

Si dja bu perde tudu kuza pamodi un dizastri na naturéza, talvês bu ta xinti ma bu sta kuazi ta txiga na bu limiti. Talvês ti dja bu kumesa ta perde alegria di vive. Má Bíblia ta splika ma bale péna kontinua ta vive i ma bu pode ten bons motivu pa ten speransa di un futuru midjór.

KUZÊ KI BÍBLIA TA FLA TA DA-NU SPERANSA

Eclesiastes 7:8 ta fla: ‘Fin di un asuntu é midjór di ki se komésu.’ Óras ki bu sta ta kumesa ta rekupera di un dizastri na naturéza, pode parse ma bu ka ten ninhun speransa. Sima bu ta ba ta tenta rekupera bu vida ku paxénxa, kuzas pode midjora.

Bíblia ta fla ma ta ben un ténpu ki ‘nunka más ka ta obidu son di txoru nen un gritu di frónta.’ (Isaías 65:19) Kel-li ta ben kontise óras ki Reinu di Deus ben poi Téra ta bira un paraízu. (Salmo 37:11, 29) Dizastris na naturéza ka ta ben kontise más. Kalker lenbransa kasábi ô dór ta ben kaba pa tudu ténpu pamodi kel Deus Tudu-Poderozu promete: ‘I kuzas ki dja pasa ka ta ben lenbradu más, i nen es ka ta ben pasa pa korason.’ — Isaías 65:17.

Pensa na kel-li: Kriador krê da-u ‘un futuru i un speransa’, un vida sábi dibaxu di se govérnu ki é perfeitu. (Jeremias 29:11) Sabe kel-li pode djuda-u rekupera bu alegria di vive. Suzana, ki dja nu papiaba di el antis, fla: “Pensa na tudu kuza sábi ki Reinu di Deus ta ben faze pa nos na futuru pode djuda-u skese di pasadu i konsentra na prezenti.”

Pamodi ki bu ka ta prende más sobri kuzê ki Reinu di Deus ta ben faze pa algen li na Téra na futuru? Faze kel-li pode da-u sertéza ma sikrê bu sufri pamodi un dizastri na naturéza, bale péna kontinua ta vive gósi, timenti bu tene gana pa txiga kel ténpu ki ka ta ben ten dizastri na naturéza más. Má timenti kel-li ka kontise, Bíblia ta da bons konsedju ki pode djuda-u lida ku rezultadus di un dizastri na naturéza. Odja alguns izénplu.

Testus di Bíblia ki pode djuda-u

Diskansa dretu.

‘É midjór ten un mô xeiu di diskansu di ki ten dôs mô xeiu di trabadju duru i ta kóre tras di béntu.’ — Eclesiastes 4:6.

Piskizas ta mostra ma óras ki un algen pasa pa un disgrasa, el ta xinti más piór i el ta ten más prubléma si el ka diskansa dretu. Pur isu, é bon diskansa dretu.

Pâpia sobri kuzê ki bu sta xinti.

‘Preokupason dimás é un karga pa korason di un ómi, má un palavra sábi ta poi korason fika kontenti.’ — Provérbios 12:25.

Pâpia ku un família ô un amigu di kunfiansa. Alén di obi-u, el pode da-u koraji i djuda-u na kel ki bu meste.a

Pensa ma kuzas ta midjora.

‘Ta ben ten séu novu ku un Téra novu, ki nu sta ta spéra sima [Deus] promete, i na es ta ben ten justisa.’ — 2 Pedro 3:13.

a Un algen ki dja dura ta xinti stress ô preokupason dimás, talvês meste djobe ajuda di un dotor.