Kel di riba, é un párti di livru di Izaías ki atxadu na Rolus di Mar Mortu. Kel di baxu, é un traduson modérnu di livru di Izaías na árabi. Mensaji di Palavra di Deus kontinua kel mê ti oji.
Palavra di Deus mudadu?
Alguns algen ta kridita ma talvês Palavra di Deus mudadu. Má, proféta Izaías fla ma Palavra di Deus ‘ta dura pa tudu ténpu.’ (Isaías 40:8 ) Modi ki bu pode ten sertéza ma Palavra di Deus ka mudadu?
Deus ten puder di proteje se Palavra, asi pa ningen ka muda-l. Na ténpu antigu, pesoas ta fazeba kópia ku mô. Kes algen ki ta kopiaba Palavra di Deus, ta kontaba kada létra di testu sagradu, pa es pode tinha sertéza ma nada ka podu, ka mudadu ô ka tradu. Má simé, es éra inperfetu, i alguns di es fadja na kuzas pikinoti.
MODI KI NU PODE TEN SERTÉZA MA KES SKRITURA SAGRADU KI NU TEN OJI TEN KEL MENSAJI DI DEUS?
Ten milharis di kópia antigu di Skrituras Sagradu. Si na un kópia parse algun diferénsa pikinoti, ta da pa konpara kel kópia ku un otu kópia, pa odja kal ki éra kel testu orijinal. — Pa sabe más sobri kel asuntu li, odja artigu “Bíblia mudadu?” na jw.org.
Odja izénplu di alguns dukumentu antigu ki ta txomadu Rolus di Mar Mortu, ki atxadu na kavérnas pértu di Mar Mortu na anu 1947. Kes dukumentu antigu ten pártis di Skrituras Sagradu di más di 2 mil anu. Kes algen ki ta piskiza kes asuntu li, konpara kes dukumentu ku kes Skritura Sagradu ki nu ten oji. Kuzê ki es diskubri?
Es djobe kes dukumentu antigu i es konfirma ma kel mensaji di Deus ki nu ten oji, é kel mésmu ki sta na kes skritura orijinal.a Nu pode ten sertéza ma Deus proteje kel mensaji di Skrituras Sagradu pa kontinua kel mê ti nos ténpu.
Pur isu, nu pode lé Palavra di Deus ku tudu kunfiansa i ku sertéza ma el ka mudadu. Nton, nu ben odja gósi kuzê ki profétas pode inxina-nu sobri Deus.
a The Complete Dead Sea Scrolls in English (Rolus di Mar Mortu konplétu na inglês), di Geza Vermes, pájina 16.