‘Téra ta ben da kumida; Deus, nos Deus, ta ben abensua-nu.’ — SALMO 67:6
Nos Kriador pode da-u bensons ki ta dura pa tudu ténpu
Deus promete proféta Abraon ma un di se disendentis ta trazeba bensons pa ‘tudu nasons na Téra’. (Génesis 22:18 ) Ken ki ta sérba kel disendenti?
Dja ten kuazi 2 mil anu, ki Deus daba Jizus puder pa faze txeu milagri li na Téra. I Jizus éra un disendenti di Abraon. Kes milagri dexa klaru ma Deus ta ben uzaba Jizus pa kunpri kel promésa ki el faze Abraon di abênsua tudu nasons. — Gálatas 3:14.
Kes milagri ki Jizus faze, djuda pesoas ten sertéza ma el éra kel algen ki Deus skodje pa ben abênsua tudu algen. I kes milagri tanbê mostra kuzê ki Jizus ta ben faze pa kunpri kes promésa di Deus. Nu ben odja modi ki kes milagri di Jizus mostra kes bon kualidadi ki el ten.
Bondadi — Jizus kura kes algen duenti.
Un bês, un ómi ki tinha lépra pidi Jizus pa kura-l. Jizus pô-l mô i el fla: ‘N krê!’ Lógu kel óra lépra dizaparse. — Marcos 1:40-42.
El gostaba di da — Jizus da un monti algen kumida.
Jizus ka kreba pa pesoas fikaba ku fómi. Na dôs situason, el faze un milagri i el poi alguns pon ku pexi ta bira txeu pa milharis di algen kume. (Mateus 14:17-21; 15:32-38 ) Dipôs ki es kume, es tudu fika fartu i inda resta kumida.
Konpaxon — Jizus resusita mortus.
Jizus “xinti txeu dor” di un viúva ki fikaba el sô dipôs ki se úniku fidju matxu móre. Pur isu, Jizus resusita se fidju. — Lúkas 7:12-15, BPK.