‘Polu agradise Deus i el ganha koraji’

Kantu kongregason na Roma obi ma Polu staba ta bai pa la, un grupu di irmons viaja uns 64 km pa bai nkontra ku el. Modi ki amor i sakrifisiu di kes irmon nkoraja-l? ‘Kantu Polu odja-s, el agradise Deus, i el ganha koraji.’ (At 28:15, BPK ) Nbóra Polu éra konxedu pa nkorajamentu ki el ta daba pa kes kongregason ki el ta vizitaba, di es bês ki el staba prézu, el ki resebe nkorajamentu. — 2Co 13:10.

Na nos ténpu, enkaregadus di grupu di kongregason ta viaja di un kongregason pa kel otu pa nkoraja irmons ku irmans. Sima tudu algen ki ta sirbi Jeová, alvês es ta xinti kansadu, txeu preokupadu i dizanimadu. Na otu bês ki enkaregadu di grupu i se mudjer vizita bu kongregason, kuzê ki bu pode faze pa djuda-s ten koraji i asi pa tudu nhos ‘nkoraja kunpanheru’? — Ro 1:11, 12.

• 

  Sisti runions pa pregason. Enkaregadu di grupu ta xinti más animadu óras ki irmons ta faze sakrifisiu pa pruveta dretu kel simana di vizita. (1Te 1:2, 3; 2:20) Pensa na ser pioneru ajudanti na mês ki bu kongregason ta resebe vizita. Bu pode sai na pregason ku enkaregadu di grupu i se mudjer, ô leba-s pa sisti un studu di Bíblia? Es gosta di trabadja ku irmons diferenti, sima kes más novu i kes ki meste ajuda pa midjora ses manera di prega.

• 

  Resebe-s dretu. Bu pode oferese un lugar pa es durmi ô oferese-s kumida, sima un almosu? Kel-li ta mostra enkaregadu di grupu i se mudjer ma bu ta ama-s. Es ka ta spéra kuzas difísil di faze. — Lu 10:38-42.

• 

  Obi i sigi orientasons i konsedjus di enkaregadu di grupu. Enkaregadu di grupu di kongregason ku amor, ta djuda-nu odja modi ki nu pode midjora nos trabadju pa Jeová. Alvês, el pode ti da-nu un konsedju fórti. (1Co 5:1-5) El ta fika kontenti óras ki nu ta obi i nu ta faze sima nu prende ku alegria. — He 13:17.

• 

  Mostra-s ma es ten valor. Fla enkaregadu di grupu i se mudjer modi ki kuzas ki es faze djuda-u. Bu pode txiga na es i fla-s ô bu pode skrebe-s un karton. — Col 3:15.