Uza vídius pa inxina bus studanti di Bíblia

Kes feraménta ki nu ta uza pa inxina, sima dizenhus ô fotus, ta poi algen ku más interesi i ta djuda-s ntende i lenbra di kuzê ki es prende. Nos Grandiozu Instrutor Jeová, uza imajis i otus kuza pa inxina lisons inportanti. (Gén 15:5; Je 18:1-6) Jizus tanbê ki é kel Grandi Instrutor, ta fazeba mésmu kuza. (Mt 18:2-6; 22:19-21) Vídiu é un di kes feraménta ki nu resebe na es últimus anu i ki sta ta da bons rezultadu. Bu sta ta uza kes vídiu dretu óras ki bu ta inxina bus studanti di Bíblia?

Dja priparadu 10 vídiu ki ta djuda-nu inxina kes lison di bruxura Notísias sábi di Deus pa bo!. Normalmenti kada téma di vídiu ten aver ku un di kes pergunta ki sta antis di parágrafus na bruxura. Bruxura ki sta na formatu dijital ten links ki ta lenbra-nu na undi ki nu pode mostra kada vídiu. Tanbê, ten otus vídiu ki nu pode uza ku kes otu publikason di studu ki ta faze párti di nos Feraméntas prinsipal pa inxina.

Bu sta ta studa un asuntu ku bu studanti ki pode ser difísil pa el ntende? Ô bu studanti sta ta lida ku algun prubléma? Djobe algun vídiu ki sta na site jw.org® i JW Broadcasting®, ki pode djuda-l. Talvês nhos pode odja un di kes vídiu djuntu i dipôs pâpia sobri el.

Tudu mês, ta sai novus vídiu. Óras ki bu ta odja kes vídiu, pensa modi ki bu pode uza-s pa inxina otus algen.