Nu ta mostra amor óras ki nu ta apoia disiplina ki Jeová ta da

Dizasosiason ta proteje kongregason i tanbê é un disiplina pa kes algen ki peka i ka rapende. (1Co 5:6, 11) Nu ta mostra amor óras ki nu ta apoia kel disiplina li ki Jeová ta da. Má pamodi ki nu pode fla ma dizasosiason é un próva di amor si el ta traze dór pa tudu kes algen nvolvidu, sima família di kel algen i kumison pa julga?

Kel razon más inportanti é: óras ki nu ta apoia dizasosiason nu sta ta mostra ma nu ta ama nómi di Jeová i se leis sobri kes kuza ki é santu ô linpu. (1Pe 1:14-16) Nu ta mostra tanbê ma nu ta ama kel algen ki dizasosiadu, pamodi nbóra disiplina ta traze dór, el pode ‘traze frutu di justisa ki ta da pas’. (He 12:5, 6, 11) Si nu kontinua ta konvive ku un algen dizasosiadu ô ki dizasôsia se kabésa nu ka sta ta apoia disiplina ki Jeová ta da. Nu debe lenbra ma Jeová sénpri ta disiplina se sérvus ‘na medida sértu’. (Je 30:11) Ka nu perde speransa ma kel algen ki dadu disiplina ta volta pa nos Pai ki ten txeu konpaxon. (Is 1:16-18; 55:7) Má timenti kel-li ka kontise, nu kontinua ta apoia disiplina ki Jeová ta da i ta faze tudu kel ki nu pode pa mante nos amizadi fórti ku Jeová.

ODJA VÍDIU MOSTRA LIALDADI DI TUDU KORASON. DIPÔS RESPONDE KES PERGUNTA LI:

• 

  Modi ki pai ku mai ta xinti óras ki un fidju bandona Jeová?

• 

  Modi ki irmons na kongregason pode djuda família di kel algen ki dizasosiadu?

• 

  Ki stória di Bíblia ta mostra ma nu ten ki ser más lial pa Jeová di ki pa nos família?

• 

  Modi ki nu pode mostra ma nos é más lial pa Jeová di ki pa nos família?