Amor i gratidon pa Jeová ta poi algen ta batiza

1-2. Sima sta na Atos 8:27-31, 35-38, kuzê ki poi kel ómi di Itiópia ta batiza?

BU KRÊ batiza i bira un disiplu di Kristu? Txeu algen toma kel disizon li, pamodi amor i gratidon ki es ten pa Jeová. Nu ben odja izénplu di un ómi ki ta trabadjaba pa rainha di Itiópia.

² Kel ómi di Itiópia batiza lógu dipôs ki el prende kuzê ki Skrituras ta flaba. (Lé Atos 8:27-31, 35-38.) Kuzê ki pô-l ta batiza? Di sertéza, el ta daba txeu valor pa Palavra di Deus, pamodi el staba ta lé un párti di livru di Isaías timenti el staba ta volta di Jiruzalen pa Itiópia. I kantu Filipi pâpia ku el, kel ómi xinti gratidon pa kuzê ki Jizus faze pa el. Má pamodi ki kel ómi di Itiópia bai Jiruzalen? Pamodi dja el tinha amor pa Jeová. Modi ki nu sabe kel-li? Nu sabe kel-li pamodi el bai adora Jeová na Jiruzalen. Talvês, kel ómi muda di relijion i el kumesa ta adora Deus verdaderu djuntu ku Se povu didikadu. É kel mésmu amor pa Jeová ki pô-l ta faze kel otu kuza inportanti, ki é batiza i bira un disiplu di Kristu. — Mat. 28:19.

3. Kuzê ki pode ka dexa un algen batiza? (Odja kuadru “Bu korason é sima kal di kes txon?”)

³ Amor ki bu ten pa Jeová pode pô-u ta batiza. Má amor tanbê pode ka dexa-u faze kel-li. Modi? Pensa na alguns izénplu. Talvês bu ten txeu amor pa bus família i amigus ki é ka Tistimunha di Jeová, i bu pode xinti medu ma si bu batiza, es ta fika kóntra bo. (Mat. 10:37) Ô bu pode gosta txeu di algun ábitu ki bu sabe ma Deus ta ôdia, i sta difísil bu larga-l. (Sal. 97:10) Ô talvês, bu kria ta faze alguns komemorason ki sta ligadu ku relijion falsu. Bu pode lenbra ku alegria di kes komemorason ki bu ta fazeba antis. Pur isu, bu ta atxa difísil bandona kes komemorason ki Jeová ka gosta. (1 Cor. 10:20, 21) Nton, bu debe pergunta bu kabésa: “Kuzê ô kenha ki N ta ama más txeu?”

KEN KI NU DEBE AMA MÁS TXEU

4. Kal ki é razon más inportanti ki ta pô-u ta batiza?

⁴ Pode ten txeu kuza sábi ki bu ta ama i ki ta pô-u ta xinti gratidon. Pur izénplu, mésmu antis di bu studa Bíblia ku Tistimunhas di Jeová, talvês bu ta daba txeu valor pa Bíblia. I talvês bu prende ama Jizus. Gósi ki dja bu konxe Tistimunhas di Jeová, bu pode gosta txeu di sta djuntu ku es. É bon ama kes kuza li, má es ka ta txiga pa pô-u ta krê da bu vida pa Jeová i batiza. Razon más inportanti ki ta pô-u ta batiza é kel amor ki bu ten pa Jeová. Óras ki bu ta ama Jeová más di ki kalker otu kuza, ka ten nada ô ningen ki ta inpidi-u di sirbi-l. I mésmu dipôs ki bu batiza, é kel amor pa Jeová ki ta djuda-u kontinua ta anda na verdadi.

5. Kuzê ki nu sta ben odja na kel studu li?

⁵ Jizus fla ma nu debe ama Jeová di tudu nos korason, alma, menti i forsa. (Mar. 12:30) Kuzê ki bu pode faze pa bu ten txeu amor i ruspetu pa Jeová? Pensa txeu na modi ki Jeová mostra amor pa nos. Kel-li ta pô-nu ta ama-l tanbê. (1 João 4:19 ) Na kel studu li nu sta ben odja alguns kuza ki ta djuda-nu ama Jeová. Tanbê nu sta ben odja otus kuza ki nu ta faze i nu ta xinti óras ki nu prende ama Jeová.b

6. Di akordu ku Romanos 1:20, kal ki é un manera ki bu pode prende sobri Jeová?

⁶ Prende sobri Jeová através di kuzas ki el kria. (Lé Romanos 1:20; Apo. 4:11) Pensa modi ki plantas i animal ki Jeová faze ta mostra ma el ten txeu sabedoria. Prende un poku sobri kel manera spetakular ki nos korpu ta funsiona. (Sal. 139:14) Tanbê, pensa na tudu puder ki Jeová poi na sól, ki é sô un di kes bilhon di strélas ki ten.c (Isa. 40:26) Óras ki bu ta pensa na kes kuza li, es ta pô-u ta ten mutu más ruspetu pa Jeová. Má, sô sabe ma Jeová ten sabedoria i ma el é poderozu ka ta txiga. Kes-li é sô alguns di kes kuza ki ta djuda-u ser se amigu. Pa bu ten un amizadi fórti ku Jeová, bu meste konxe-l más dretu.

7. Pa bu ten un amor fórti pa Jeová, di kuzê ki bu meste ten sertéza?

⁷ Bu meste ten sertéza ma Jeová ta kuida di bo. Bu ta atxa difísil kridita ma Kriador di Séu ku Téra sabe ma bu ta izisti i ma el ta kuida di bo? Si bu ta pensa si, lenbra ma Jeová ‘ka sta lonji di kada un di nos.’ (Atus 17:26-28, Bíblia Na Prugrésu Di Traduson Pa Lingua Kabuverdianu, BPK ) El ‘ta djobe tudu korason’ i el ta promete ma ‘si bu djobe-l, el ta dexa-u atxa-l’. (1 Cró. 28:9) Na verdadi, bu sta ta studa Bíblia gósi pamodi kel ki Jeová fla: ‘N atrai-u pa mi’. (Jer. 31:3) Kada bês ki bu ntende tudu kuza ki Jeová faze pa bo, bu amor pa el ta fika más fórti.

8. Modi ki bu pode mostra bu gratidon pa amor di Jeová?

⁸ Un manera di mostra bu gratidon pa amor di Jeová é óras ki bu ta pâpia ku el na orason. Bu amor pa Deus ta bira más fórti, óras ki bu ta konta-l bus preokupason i agradise-l pa tudu kuza ki el ta faze pa bo. I nhos amizadi ta fika más fórti inda, sima bu ta ba ta odja modi ki el ta responde bus orason. (Sal. 116:1) Bu ta ten sertéza ma el ta ntende-u. Má, pa bu ser más amigu di Jeová, bu meste ntende se manera di pensa. I bu meste sabe kuzê ki el krê pa bu faze. Úniku manera pa bu ten kel konhisimentu li é óras ki bu ta studa Bíblia, ki é se Palavra.

9. Modi ki bu pode mostra ma bu ta da valor pa Bíblia?

⁹ Prende da valor pa Bíblia, ki é Palavra di Deus. É sô Bíblia ki ta konta verdadi sobri Jeová i kuzê ki el krê faze pa bo. Pur isu, lé Bíblia tudu dia, pripara pa bu studu di Bíblia ku bu instrutor i faze tudu kel ki bu prende. Asi, bu ta mostra ma bu ta da valor pa Bíblia. (Sal. 119:97, 99; João 17:17 ) Bu ten un prugrama di leitura di Bíblia? Bu ta konsigi sigi kel prugrama tudu dia?

10. Kuzê ki nu ta atxa sô na Bíblia?

¹⁰ É sô na Bíblia ki nu ta atxa stórias di algen ki odja Jizus. El é úniku livru ki ta splika di manera izatu kuzê ki Jizus faze pa bo. Sima bu ta ba ta prende sobri kuzê ki Jizus fla i faze, bu ta krê ser se amigu.

11. Kuzê ki ta djuda-u ten más amor pa Jeová?

¹¹ Prende ama Jizus, i bu amor pa Jeová ta fika más fórti. Pamodi? Pamodi Jizus imita kualidadis di se Pai di manera perfetu. (João 14:9 ) Pur isu, kada bês ki bu prende sobri Jizus, bu ta bira ta ntende Jeová más dretu i bu ta da-l más valor. Pensa na konpaxon ki Jizus mostra pa kes algen ki éra disprezadu, sima póbris, duentis i kes ki ka tinha algen pa difendeba es. Tanbê, pensa na kes konsedju ki Jizus ta da-u pa bu dia-dia i modi ki bu vida ta fika más midjór óras ki bu sigi-s. — Mat. 5:1-11; 7:24-27.

12. Kada bês ki bu prende sobri Jizus, kuzê ki bu pode xinti gana di faze?

¹² Bu amor pa Jizus ta bira más fórti, óras ki bu ta pensa txeu na sakrifisiu ki el faze pa bus pekadu pode ser purduadu. (Mat. 20:28) Óras ki bu ntende ma Jizus móre pa bo, di livri vontadi, bu pode xinti gana di rapende di bus pekadu i pidi perdon di Jeová. (Atos 3:19, 20; 1 João 1:9 ) I kada bês ki bu amor pa Jizus i pa Jeová bira más fórti, bu ta xinti más gana di sta djuntu ku kes algen ki tanbê ta ama-s.

13. Kuzê ki Jeová ta da-u?

¹³ Prende ama família di Jeová. Bus família ki é ka Tistimunhas di Jeová i kes amigu ki bu tinha antis, pode ka ntende pamodi ki bu krê da bu vida pa Jeová. Talvês es pode ti fika kóntra bo. Má, Jeová ka ta dexa-u bo sô: el ta da-u irmons ku irmans na kongregason pa ser bu família. Si bu fika sénpri djuntu ku es, es ta da-u amor i ajuda ki bu meste. (Mar. 10:29, 30; Heb. 10:24, 25) Ku ténpu, talvês bus família pode ben sirbi Jeová djuntu ku bo i vive di akordu ku se leis. — 1 Ped. 2:12.

14. Sima sta na 1 João 5:3, kuzê ki bu diskubri sobri leis di Jeová?

¹⁴ Prende ruspeta i sigi leis di Jeová. Talvês, antis di bu konxe Jeová, bu ta disidiba pa bu kabésa kuzê ki éra dretu ô mariadu. Má gósi, dja bu odja ma leis di Jeová é más midjór. (Sal. 1:1-3; lé 1 João 5:3.) Pensa na konsedju ki Bíblia ta da pa maridus, mudjeris, pai ku mai i fidjus. (Efé. 5:22–6:4) Bu ta atxa ma kes konsedju li sta ta djuda bu família ser más filís? Bu bira un algen más midjór pamodi bu sigi konsedju di Jeová sobri ki tipu di amigu bu debe skodje? Abo é un algen más filís? (Pro. 13:20; 1 Cor. 15:33) Pode ser ki bus respósta pa kes pergunta li é sin.

15. Kuzê ki pode djuda-u sabe modi ki bu ta sigi konsedjus di Bíblia?

¹⁵ Alvês, bu pode atxa difísil di sabe modi ki bu ta sigi konsedjus di Bíblia ki bu sta prende. É pur isu ki organizason di Jeová ta faze publikasons ku bazi na Bíblia ki pode djuda-u sabe kuzê ki é dretu ô mariadu. (Heb. 5:13, 14) Óras ki bu ta lé i studa kes informason, bu ta odja modi ki es pode djuda-u i na ki situason di bu vida bu pode sigi-s. Tanbê, es ta djuda-u xinti gana di faze párti di organizason di Jeová.

16. Modi ki Jeová tene se povu organizadu?

¹⁶ Prende ama i apoia organizason di Jeová. Jeová tene se povu organizadu pa kongregasons. Se Fidju Jizus, é kabésa di tudu kongregason. (Efé. 1:22; 5:23) Jizus skodje un grupu pikinoti di ómis pa organiza trabadju ki el krê pa fazedu oji. Jizus txoma kel grupu di ómis di ‘skravu fiel i prudenti’. Tanbê es ta leba asériu ses responsabilidadi di djuda-u ser amigu di Jeová i proteje bu amizadi ku El. (Mat. 24:45-47) Un di kes manera ki skravu fiel ta kuida di bo, é óras ki es ta toma medida pa ten ansions kualifikadu na kongregason pa gia-u i proteje-u. (Isa. 32:1, 2; Heb. 13:17; 1 Ped. 5:2, 3) Ansions krê faze tudu kel ki es pode pa bo. Tanbê es krê konsola-u i djuda-u ten un amizadi fórti ku Jeová. Má, un di kes kuza más inportanti ki es pode faze pa bo é djuda-u inxina otus sobri Jeová. — Efé. 4:11-13.

17. Di akordu ku Romanos 10:10, 13, 14, pamodi ki nu ta pâpia ku otus sobri Jeová?

¹⁷ Djuda otus prende ama Jeová. Jizus fla se sigidoris pa es inxina otus algen sobri Jeová. (Mat. 28:19, 20) Nu pode obiba ku kel mandamentu li sô pamodi obrigason. Má, óras ki bu amor pa Jeová bira fórti, bu ta xinti sima apóstlu Pedru ku Juan, ki fla: ‘Nu ka pode para di pâpia di kes kuza ki nu odja i ki nu obi.’ (Atos 4:20 ) É poku kuza ki ta da-nu txeu alegria sima djuda un algen ama Jeová. Imajina modi ki Filipi fika kontenti kantu el djuda kel ómi di Itiópia prende verdadis ki sta na Skrituras i batiza! Óras ki bu ta imita Filipi i sigi órdi di prega sima Jizus manda, bu ta prova ma bu krê ser un Tistimunha di Jeová. (Lé Romanos 10:10, 13, 14.) Óras ki bu faze kes kuza li, alvês bu pode pergunta sima kel ómi di Itiópia: ‘Kuzê ki ta inpidi-m di batiza?’ — Atos 8:36.

18. Kuzê ki nu ta ben odja na kel otu studu?

¹⁸ Disizon más inportanti ki bu pode toma na bu vida é batiza. Dja ki el é un disizon inportanti, bu meste pensa dretu sobri kuzê ki el siginifika. Kuzê ki bu meste sabe sobri batismu? Kuzê ki bu meste faze antis i dipôs ki bu batiza? Nu ta ben responde kes pergunta li na kel otu studu.