STUDU 38
Aji ku sabedoria na ténpu di pas
‘Téra staba na pas i ka kontise géra kóntra el duránti kes anu, dja ki Jeová daba el diskansu.’ — 2 CRÓNICAS 14:6.
KÁNTIKU 60 Mensaji ki ta salva vida
KUZÊ KI NU STA BEN STUDAa
1. Na ki situason pode ser difísil sirbi Jeová?
KI TÉNPU ki bu ta atxa ma pode ser más difísil bu sirbi Jeová? Óras ki bu sta pasa pa prublémas difísil ô óras ki bu vida sta trankilu? É faxi nu kunfia na Jeová óras ki nu tene prublémas. Má, kuzê ki nu ta faze óras ki tudu kuza sta kóre dretu na nos vida? Nu pode skese modi ki é inportanti sirbi Deus? Jeová aviza israelitas ma kel-li podia kontiseba. — Deut. 6:10-12.
Rei Aza toma un puzison firmi kóntra adorason falsu (Odja parágrafu 2.)c
2. Ki izénplu Rei Aza dexa?
2 Rei Aza é un grandi izénplu di algen ki aji ku sabedoria pamodi el kunfia sénpri na Jeová. El sirbi Jeová ka sô na ténpus difísil, má tanbê na ténpus di pas. Duránti tudu se vida, ‘korason di Aza éra konplétu pa Jeová’. (1 Reis 15:14, nóta di rodapé) Un di kes manera ki Aza mostra ma el ta sirbiba Deus di tudu se korason, foi kantu el kaba ku adorason falsu na Judá. Bíblia ta fla ma el ‘tra kes altar di kes deus stranjeru i kes altu sagradu, i el kebra kes kuluna sagradu i el bota kes pósti sagradu na txon.’ (2 Cró. 14:3, 5) Aza ti tra Maaká, ki éra se avó, di un puzison inportanti ki el tinha. Pamodi? Pamodi el sta ta insentivaba povu pa faze adorason falsu i adora un imaji. — 1 Reis 15:11-13.
3. Kuzê ki nu sta ben odja na kel studu li?
3 Aza ka kaba sô ku adorason falsu. Tanbê, el djuda povu di Judá pa torna adora Jeová sima el ta krê. Pur isu, Jeová abênsua Aza i kes israelita ku un ténpu di pas.b Duránti 10 anu di govérnu di Aza, ‘téra staba na pas’. (2 Cró. 14:1, 4, 6) Na kel studu li, nu sta ben odja modi ki Aza uza kel ténpu di pas. Dipôs, nu sta ben odja izénplu di kes kriston di ténpu di apóstlus ki pruveta dretu ses ténpu di pas, sima Aza. Na fin, nu sta ben responde kel pergunta li: si bu ta mora na un país ki ten liberdadi di adorason, modi ki bu pode uza dretu kel ténpu di pas?
MODI KI AZA UZA KEL TÉNPU DI PAS
4. Sima sta na 2 Crónicas 14:2, 6, 7, modi ki Aza uza dretu kel ténpu di pas?
4 Lé 2 Crónicas 14:2, 6, 7. Aza fla povu ma é Jeová ki da-s ‘diskansu di tudu inimigus ki staba na ses vólta.’ Aza ka atxa ma kel ténpu di pas éra un ténpu pa relaxa. Má, el uza kel ténpu pa faze sidadis, paredis altu, toris i portons. Aza fla povu di Judá: ‘Téra inda sta na nos puder’. Kuzê ki el krê flaba? El krê flaba ma povu podia andaba livri na kel téra ki Deus daba es i fazeba konstruson, pamodi ka tinha ninhun inimigus ki podia inpidiba es. Aza insentiva povu pa uza dretu kel ténpu di pas.
5. Pamodi ki Aza bira se trópas más fórti?
5 Aza tanbê uza kel ténpu di pas pa bira se trópas más fórti. (2 Cró. 14:8) Má kel-li krê fla ma el ka tinha fé na Jeová? Nau. Dja ki Aza éra rei, el sabia ma el tinha obrigason di pripara povu pa kalker prubléma ki podia kontiseba na futuru. Aza sabia ma kel ténpu di pas na Judá ka ta duraba pa tudu ténpu. I é kel-li própi ki kontise.
MODI KI KRISTONS DI TÉNPU DI APÓSTLUS UZA KES TÉNPU DI PAS
6. Modi ki kristons di ténpu di apóstlus uza kes ténpu di pas?
6 Kes kriston di ténpu di apóstlus, sufri txeu pirsigison. Má tanbê es tevi alguns ténpu di pas. Kuzê ki es faze duránti kes ténpu? Kes ómi ku mudjeris fiel, uza kes ténpu pa prega notísias sábi sen para. Livru di Atos ta fla ma es ta ‘andaba ku grandi ruspetu pa Jeová’. Es kontinua ta prega notísias sábi, pur isu es ‘kontinua ta bira más txeu.’ Kel-li ta mostra ma Jeová abênsua zelu di kes kriston duránti kes ténpu di pas. — Atos 9:26-31.
7-8. Kuzê ki Polu i otus kriston ta fazeba óras ki ta parseba oportunidadi? Splika.
7 Kes kriston di ténpu di apóstlus ta pruvetaba tudu oportunidadi pa spadja notísias sábi. Pur izénplu, apóstlu Polu fla ma un pórta largu di atividadi abri pa el timenti el staba na Éfezu. El uza kel oportunidadi pa prega i faze disiplus na kel sidadi. — 1 Cor. 16:8, 9.
8 Otu oportunidadi ki parse pa Polu i otus kriston, kontise na anu 49 kantu rezolvedu kel asuntu di sirkunsizon. (Atos 15:23-29 ) Dipôs ki kongregasons fika ta sabe di kel disizon, kes disiplu trabadja duru pa prega ‘notísias sábi di palavra di Jeová.’ (Atos 15:30-35 ) Kal ki foi rezultadu? Bíblia ta fla ma ‘kes kongregason ba ta fika más fórti na fé i es ba ta omenta kada dia.’ — Atos 16:4, 5.
UZA KES TÉNPU DI PAS GÓSI
9. Kal ki é situason na txeu país oji i ki pergunta nu debe faze nos kabésa?
9 Na txeu país oji, nu pode prega sen ninhun prubléma. Bu ta vive na un país ki ten liberdadi di adorason? Si ten, nton pergunta bu kabésa: ‘Modi ki N sta ta uza kel liberdadi li?’ Na es ténpu di fin, sta kontise txeu kuza sábi na organizason di Jeová. El sta ta faze un kanpanha di prega i inxina más grandi ki es mundu dja odja. (Mar. 13:10) Un monti pórta sta abértu pa povu di Jeová.
Txeu irmon ku irmans resebe txeu benson pamodi es apoia pregason na otus país ô pamodi es prega na un otu língua (Odja parágrafus 10 ti 12.)d
10. Kuzê ki 2 Timóteo 4:2 ta insentiva-nu pa nu faze?
10 Modi ki bu pode uza dretu kes ténpu di pas? (Lé 2 Timóteo 4:2.) Pamodi ki bu ka ta djobe bu situason? Pur izénplu, abo ô algen di bu família pode faze más na trabadju di pregason, talvês pa sirbi di pioneru fíksu? Gósi é ka ténpu di djunta rikéza i kuzas material. Kes kuza li ka ta pasa djuntu ku nos na grandi tribulason. — Pro. 11:4; Mat. 6:31-33; 1 João 2:15-17.
11. Kuzê ki txeu publikador sta ta faze pa konsigi prega notísias sábi pa mutu más algen?
11 Txeu publikador sta ta prende otu língua pa es pode uza-l pa prega i inxina. Pa djuda kes irmon, organizason sta ta faze publikasons ku bazi na Bíblia na un monti língua. Pur izénplu, na anu 2010 nu ta fazeba publikasons na uns 500 língua. Oji, nu sta ta faze na más di 1.000 língua!
12. Pamodi ki é bon pâpia ku pesoas di mensaji di Reinu na ses língua? Da un izénplu.
12 Modi ki pesoas ta xinti óras ki es ta obi verdadi di Palavra di Deus na ses língua? Odja izénplu di un irman ki sisti un kongrésu, na Mérka. Se língua di korason é kiniaruanda, ki ta papiadu más txeu na Ruanda, na Kongu (Kinxasa) i na Uganda. Prugrama di kongrésu fazedu na kel língua. Dipôs di kongrésu, kel irman fla: “Dja ten 17 anu ki N sta mora na Mérka, má kel-li é primeru bês ki N konsigi ntende dretu tudu prugrama di kongrésu.” Di sertéza kel irman fika txeu kontenti di obi kel prugrama na se língua. Si bu situason ta da, bu ta pode prende un otu língua pa djuda otus algen na bu tiritóriu? Talvês na bu tiritóriu ten pesoas ki ta xinti más avontádi si es pâpia na un otu língua. Kel-li ka ta motiva-u pa bu prende un otu língua? É verdadi ki ta iziji sforsu, má bale péna!
13. Modi ki nos irmons na Rúsia uza ses ténpu di pas?
13 É ka tudu nos irmons ku irmans ki ten liberdadi di prega. Na alguns lugar, nos irmons ka ten liberdadi di prega pamodi govérnus ka ta dexa. Pur izénplu, pensa na nos irmons na Rúsia. Dipôs di txeu anu di pirsigison, es ganha liberdadi di adorason na marsu di 1991. Na kel ténpu, tinha uns 16 mil publikador na Rúsia. Dipôs di 20 anu, nunbru di publikador omenta pa más di 160 mil! Kel-li ta mostra ma nos irmons aji ku sabedoria i es pruveta kel ténpu di liberdadi pa prega. Kel ténpu di pas ka dura txeu. Má sikrê ku kel mudansa di situason, irmons kontinua ku txeu zelu pa adorason verdaderu. Es kontinua ta faze tudu kel ki es pode pa sirbi Jeová.
TÉNPU DI PAS KA TA BEN DURA TXEU
Dipôs ki Rei Aza faze orason di korason, Jeová djuda povu di Judá ganha un inimigu fórti (Odja parágrafus 14 i 15.)
14-15. Modi ki Jeová mostra se puder pa djuda Aza?
14 Na ténpu di Aza, kel ténpu di pas kaba. Más di 1 milhon di trópa, ben di Itiópia. Ses komandanti éra Zerá i el tinha sertéza ma se trópas ta ganhaba Judá. Má Rei Aza ka kunfia na kantu trópa ki el tinha, má na se Deus Jeová. Aza faze orason i el fla: ‘Djuda-nu, ó Jeová nos Deus, pamodi nu ta kunfia na bo, i é na bu nómi ki nu ben kóntra es monti di algen.’ — 2 Cró. 14:11.
15 Kes trópa di Itiópia éra kuazi dôs bês más txeu di ki trópas di Aza. Má Aza sabia ma Jeová tinha puder i kapasidadi di djudaba Se povu. I é kel-li ki Jeová faze; kes trópa di Itiópia perde géra feiu. — 2 Cró. 14:8-13.
16. Modi ki nu sabe ma ténpu di pas ka ta ben dura?
16 Nu ka sabe tudu kuza ki ta ben kontise ku kada un di nos na futuru. Má nu sabe ma kalker ténpu di pas ki povu di Jeová tene ka ta dura pa tudu ténpu. Na verdadi, Jizus dja flaba ma na ténpu di fin se disiplus ‘ta sérba odiadu pa tudu nasons’. (Mat. 24:9) Apóstlu Polu tanbê dja flaba ma ‘tudu kes ki krê uza ses vida pa adora Deus, unidu ku Kristu Jizus, tanbê ta sérba pirsigidu.’ (2 Tim. 3:12) Satanás sta ‘xeiu di raiba’. Pur isu, si nu pensa ma nu ten algun manera di skapa di se raiba nu sta nganadu. — Apo. 12:12.
17. Modi ki nos lialdadi pode ben fika na próva?
17 Ka ta dura, nos tudu ta ben pasa pa situasons ki ta poi nos lialdadi na próva. Mundu sta ben pasa pa ‘un grandi frónta, ki sima kel-la nunka ka kontiseba antis, désdi komésu di mundu ti gósi’. (Mat. 24:21) Duránti kel ténpu, talvês nos família pode fika kóntra nos i pode ser ki nu ka ta ben dexadu prega. (Mat. 10:35, 36) Modi ki bu ta ben reaji? Bu ta ben kunfia na ajuda i proteson di Jeová sima Aza?
18. Sima sta na Hebreus 10:38, 39, kuzê ki ta ben djuda-nu sta priparadu pa fin di ténpu di pas?
18 Jeová dja sta ta pripara-nu pa kuzê ki sta ben kontise. El sta ta orienta ‘skravu fiel i prudenti’ pa da-nu kumida spritual ‘na óra sértu.’ Asi, nu ta pode mante firmi na nos adorason pa Deus. (Mat. 24:45) Má nu meste faze nos párti. Nu debe faze nos midjór pa nu pode ten un fé fórti na Jeová. — Lé Hebreus 10:38, 39.
19-20. Sima sta na 1 Crónicas 28:9, ki perguntas nu debe faze nos kabésa i pamodi?
19 Sima Rei Aza, nu meste ‘buska Jeová’. (2 Cró. 14:4; 15:1, 2) Nu ta kumesa ta buska Jeová óras ki nu ta konxe-l i nu ta batiza. Nu meste pruveta tudu oportunidadi pa bira nos amor pa Jeová más fórti. Pa nu sabe modi ki nu sta ta faze kel-li, nu debe pergunta nos kabésa: ‘N sta ta sisti tudu runion?’ Óras ki nu ta sisti runion, nu ta ganha más forsa pa nu sirbi Jeová i nos irmons ta nkoraja-nu. (Mat. 11:28) Tanbê nu pode pergunta nos kabésa: ‘N ta kustuma studa Bíblia sénpri?’ Si bu ta vive ku bu família, bu ta kustuma faze adorason na família tudu simana? Si bu ta mora bo sô, bu ta tra ténpu simé pa studa sima un família ta faze? Tanbê, bu ta sforsa pa faze bu midjór na trabadju di prega i di faze disiplus?
20 Pamodi ki é bon nu faze kes pergunta li? Bíblia ta fla ma Jeová ta izamina nos pensamentus i nos korason. Nton nu meste faze mésmu kuza. (Lé 1 Crónicas 28:9.) Si nu odja ma nu meste faze alguns mudansa na nos obijetivu, manera di ser ô pensamentu, nu pidi Jeová pa djuda-nu muda. Gósi é ténpu di pripara nos kabésa pa kes próva di fé ki sta pa ben. Ka nu dexa nada inpidi-nu di uza dretu nos ténpu di pas!
KÁNTIKU 62 Kel kántiku novu
a Bu ten liberdadi di adora Jeová na bu país? Si bu ten, modi ki bu sta ta uza es ténpu di pas? Kel studu li sta ben mostra modi ki bu pode imita Aza ki éra rei di Judá i kes kriston na ténpu di apóstlus. Es uza dretu kel ténpu di pas.
b MÁS SPLIKASON: Palavra “pas” é ka sô óras ki ka ten géra. Na ebraiku, tanbê el ta da ideia di bon saúdi, suguransa i ten un vida dretu.
c SPLIKASON DI DIZENHU: Rei Aza tra se avó di kel puzison inportanti ki el tinha pamodi el staba ta adora deus falsu. Kes ki éra lial pa Aza sigi se izénplu i es distrui kes deus falsu.
d SPLIKASON DI FOTUS: Un kazal zelozu ta sinplifika ses vida pa es pode bai sirbi na undi ki ten más nisisidadi.