Modi ki orason pode djuda-u

Kantu Pamela fika ta sabe ma el tinha kánser, el djobe ajuda na dotor. Má tanbê, el faze orason pa Deus ta pidi forsa pa djuda-l aguenta kel situason difísil. Má, faze orason djuda-l?

Pamela splika: “Duránti nha tratamentu di kánser, N ta xintiba txeu medu. Má óras ki N ta fazeba orason pa Jeová Deus, N ta xintiba un kalma déntu mi i N ta konsigi aguentaba kel situason sen fika ku medu dimás. Inda N ta xinti txeu dór, má simé faze orason ta djuda-m lida ku nha situason di midjór manera. Óras ki pesoas ta pergunta-m modi ki N sta xinti, N ta fla: ‘N sta duenti, má N sta kontenti!’”

É klaru ki nu ka meste spera ti ki un prubléma gravi kontise, pa nu kumesa ta faze orason. Nos tudu nu ta pasa pa prublémas, grandi i pikinoti, i txeu bês nu ta meste ajuda pa lida ku es. Orason ta pode djuda-nu?

Bíblia ta fla: ‘Lansa bu karga na Jeová, i el ta apoia-u. Nunka el ka ta dexa pa algen justu kai.’ (Salmo 55:22) Fórti palavras ki ta konsola-nu! Nton, modi ki orason pode djuda-u? Óras ki bu ta faze orason di manera ki Deus ta krê, el ta da-u kuzê ki bu meste pa bu konsigi lida ku bus prubléma. — Odja kuadru “Bensons ki bu pode resebe óras ki bu ta faze orason”.

Bensons ki bu pode resebe óras ki bu ta faze orason

Pas déntu bo

“Sénpri nhos agradese-l. Si nhos faze si, kel pas di Deus ki nu ka ta konsigi intende, ta proteje nhos korason i nhos menti, através di Kristu Jizus.” (Filipensis 4:6, 7) Óras ki bu ta konta Deus bus prubléma, el ta djuda-u fika kalmu i aji ku sabedoria na kalker situason.

Sabedoria di Deus

“Si algun di nhos tene falta di sabedoria, pa el kontinua ta pidi Deus, i el ta dadu el, pamodi Deus ta da tudu algen el avontádi, i el ka ta fika xatiadu ku kel ki ta pidi-l.” (Tiagu 1:5) Óras ki nu sta pasa pa un situason difísil, alvês nu pode toma un mau disizon. Si bu faze orason ta pidi sabedoria, Deus pode djuda-u lenbra di bons konsedju ki sta skrebedu na se Palavra, Bíblia.

Forsa i konsolu

“Pa tudu kuza N ten forsa grasas-a kel ki ta da-m puder.” (Filipensis 4:13) Dja ki Jeová é kel Deus Tudu-Poderozu, el pode da-u kel forsa ki bu meste pa lida ku prublémas ô pa bu aguenta-s. (Isaías 40:29) Bíblia tanbê ta txoma Jeová di “Deus di tudu konsolu”. El ta pode konsola-nu “na tudu nos prubléma”. — 2 Koríntius 1:3, 4.