Ser un algen dretu ta da-nu un futuru midjór?

Dja ten txeu ténpu ki monti di algen ta kridita ma pa nu ten un futuru midjór, nu meste ser un algen dretu. Pur izénplu, txeu algen na Ázia ta sigiba ideia di Konfúsiu, ki éra un filózofu i instrutor, ki vive entri anus 551 ti 479 A.J. El fla: “Ka bu faze otus algen kuzê ki bu ka krê pa otus faze-u.”a

KUZÊ KI TXEU ALGEN TA FAZE

Txeu algen inda ta kridita ma faze kuzas dretu ta da-s un futuru midjór. Es ta tenta ruspeta tudu algen, ser idukadu, ser onéstu, mante un konsénsia linpu i kunpri ses responsabilidadi na família i na sosiadadi. Un mudjer ki txoma Lin, ki ta mora na Vietnan, fla: “Sénpri N ta kriditaba ma si N ser un algen onéstu, N ta tinha un vida dretu.”

Kel mésmu mudjer ta da kes algen póbris i kes ki ka ten kaza kumida.

Alguns algen ta tenta faze kuzas dretu pamodi ses relijion. Un ómi ki ta vive na Taiuan, ki txoma Suiun, fla: “N inxinadu ma si un algen faze kuzas dretu, el ta abensuadu dipôs ki el móre. Má si el faze kuzas mariadu, el ta sufri pa tudu ténpu dipôs ki el móre.”

KUZÊ KI NU TA ODJA TA KONTISE?

Kel mudjer na fin di dia sta tristi i kansadu, ku se fidju na brasu.

Óras ki nu ta faze kuzas dretu pa otus algen, kel-li tanbê ta djuda-nu. Má txeu algen da kónta ma pa más ki es tenta faze kuzas dretu i di korason, nen sénpri es ka ta tratadu di mésmu manera. Un mudjer ki txoma Siu Ping, ki ta mora na Hong Kong, fla: “N prende ma kes algen ki ta faze kuzas dretu nen sénpri ka ta rekonpensadu pa kel ki es ta faze.” Tanbê el fla: “N faze di tudu pa N ser un algen dretu i pa N kuida dretu di nha família. Má simé, nha kazamentu kaba, nha maridu bandona-m i el dexa-m mi sô ku nha fidju.”

Txeu algen dja repara ma é ka tudu algen ki ta sta na relijion ki ta faze kuzas dretu. Un mudjer ki ta mora na Japon, ki txoma Etsuko, fla: “N entra na un relijion i N kumesa ta organiza atividadis pa jóvens. Má N fika diziludidu di odja ma alguns algen di nha relijion ta konportaba mariadu, ta konpitiba ku otus algen pa ten más puder i es ka ta uzaba dinheru di igreja ku onestidadi.”

“N faze di tudu pa N ser un algen dretu i pa N kuida dretu di nha família. Má simé nha kazamentu kaba, nha maridu bandona-m i el dexa-m mi sô ku nha fidju.” — SIU PING, HONG KONG.

Alguns algen ki ta leba ses relijion asériu i ki ta tenta faze kuzas dretu, ta fika diziludidu pamodi kuzas mariadu ki ta kontise ku es. Éra asi ki Van, un mudjer di Vietnan ta xintiba. El fla: “Tudu dia N ta kunpraba fruta, flor i kumida pa N ba ofereseba na altar di nhas família ki dja móre. N ta atxaba ma si N fazeba kel-la, N ta resebeba bensons na futuru. Nbóra N tevi txeu anu ta faze kel-la, nha maridu duense riju. Dipôs nha fidju-fémia móre jóven, kantu el staba ta studa na un otu país.”

PAMODI KI SÔ SER UN ALGEN DRETU KA TA TXIGA?

É inportanti nu ser un algen dretu, má sô kel-li ka ta txiga pa nu ten un futuru midjór. Pamodi? Nu ben odja kuzê ki un livru sagradu ta fla sobri kel-li.

É KA TUDU ALGEN KI TA SKODJE FAZE KUZAS DRETU

‘Sô un pekador ta konsigi distrui txeu kuza dretu.’ — ECLESIASTES 9:18.

Sikrê bu sforsa txeu pa bu ser un algen dretu, kes pesoas ki ta pensa sô na ses kabésa pode faze kuzas ki ta prujudika-u. Pur izénplu, imajina ma sta un duénsa ki sta spadja na mundu interu i bu sta sforsa pa sigi kes orientason di autoridadi i bu ta ivita fika pértu di otus algen. Má i si otus algen ka sta sigi kes orientason? Es pode prujudika saúdi di kes algen ki sta tenta faze kuzas dretu.

PESOAS PODE KONFUNDI KUZÊ KI É DRETU I KUZÊ KI É MARIADU

‘Ten un kaminhu ki ómi ta atxa ma é dretu, má na fin el ta leba pa mórti.’ — PROVÉRBIOS 14:12.

Ten txeu izénplu di pesoas ki staba ta faze kuzas ki es tinha sertéza ma éra dretu, má dipôs es da kónta ma es staba mariadu. Mésmu ki un algen ten bons intenson, el pode sufri simé, pamodi rezultadu di kes disizon mariadu.

NINGEN KA SABE KUZÊ KI PODE KONTISE NA FUTURU

‘Nhos ka sabe modi ki ta ser nhos vida manhan.’ — TIAGO 4:14.

Ti mésmu kes algen dretu pode móre di un óra pa kel otu. Pur izénplu, duránti duénsa di COVID-19, txeu di kes algen ki staba ta djuda otus, perde ses vida. Tanbê odja spiriénsa di Liting, un mudjer ki ta mora na Xina, ki se pai móre na un asidenti di karu. El fla: “N ka sta konsigi ntendeba pamodi ki un disgrasa di kel-li kontise ku un algen dretu sima nha pai. Nha pai éra un algen trabadjador, umildi i onéstu. El é úniku algen na kel karu ki móre.”

Sima dja nu odja, sô ser un algen dretu ka ta txiga pa nu ten un futuru midjór. Nton, é kuzê? Pa nu sabe kel-li, nu meste atxa respóstas di kunfiansa pa nos perguntas ki pode djuda-nu ten un futuru midjór. Undi ki nu pode atxa kes respósta?

a Pa más informason sobri kuzê ki Konfúsiu ta inxinaba, odja kapítlu 7, parágrafus 31 ti 35, di livru O Homem em Busca de Deus, publikadu pa Tistimunhas di Jeová i ki sta na internet na www.jw.org.