Tudu algen na kongregason pode djuda un studanti faze prugrésu i batiza

1-2. Ken ki pode djuda un studanti di Bíblia faze prugrésu i batiza?

“N GOSTABA txeu di kuzê ki N staba ta prende na nha studu di Bíblia. N sabia ma éra verdadi. Má é sô dipôs ki N kumesa ta sta djuntu ku irmons, ki N faze kes mudansa na nha vida ki N mesteba i N disidi batiza”. É kel-li ki Amy, un irman ki ta mora na Fidji, fla. Se palavras ta distaka un verdadi inportanti: Ten más xansi di un studanti di Bíblia faze prugrésu i batiza, óras ki el ta resebe ajuda di otus irmon na kongregason.

² Kada publikador pode djuda un studanti bira párti di kongregason. (Efé. 4:16) Un pionera ki txoma Leilani, ki ta mora na Vanuatu, fla: “Pa kria un mininu ta mestedu tudu algen na se zóna. N ta atxa ma ta meste mésmu kuza na faze disiplu. Normalmenti, ta mestedu un kongregason interu pa traze un algen pa verdadi.” Pa djuda un kriansa bira un adultu, ta mestedu ajuda di mai ku pai, otus algen di família, amigus i profesoris. Es ta faze kel-li óras ki es ta nkoraja kel kriansa i es ta inxina-l lisons inportanti. Di mésmu manera, kes ki é publikador pode da konsedju, nkoraja i da un bon izénplu pa kes studanti di Bíblia. Asi, es ta djuda-s faze prugrésu i batiza. — Pro. 15:22.

3. Kuzê ki bu prende ku komentárius di Ana, Dorin, i Leilani?

³ Tudu algen na kongregason pode djuda un studanti. I kel publikador ki ta faze kel studanti studu debe fika kontenti pamodi kel-li. Odja kuzê ki Ana, ki é un pionera spesial na Moldávia, fla: “É txeu difísil pa un algen sô, konsigi da un studanti di Bíblia tudu ajuda ki el ta meste óras ki el kumesa ta faze prugrésu.” Tanbê un pioneru spesial ki txoma Dorin, ki ta sirbi na Moldávia, fla: “Txeu bês, otus publikador ta fla un kuza ki ta toka korason di studanti. Alvês é un kuza ki nunka N ka pensaba na fla.” Leilani inda ta da un otu razon pamodi ki nu debe fika kontenti ku ajuda di otus. El fla: “Óras ki un studanti ta xinti amor i karinhu di otus irmon na kongregason, el ta ntende ma nos é própi povu di Jeová.” — João 13:35.

4. Kuzê ki nu sta ben odja na kel studu li?

⁴ Má, talvês bu ta pergunta: ‘Modi ki N ta djuda un studanti di Bíblia faze prugrésu i batiza si é ka mi ki é se instrutor?’ Na kel studu li, nu sta ben odja kuzê ki nu pode faze óras ki nu ta konvidadu pa nu bai ku un algen faze un studu di Bíblia. Tanbê, nu sta ben odja kuzê ki nu pode faze óras ki un studanti kumesa ta sisti runion. Dipôs, nu ta ben odja kuzê ki ansions pode faze pa djuda studantis faze prugrésu i batiza.

ÓRAS KI BU KONVIDADU PA UN STUDU DI BÍBLIA

5. Si bu konvidadu pa un studu di Bíblia, kal ki debe ser bu obijetivu?

⁵ Ken ki ten responsabilidadi di djuda un studanti ntende Palavra di Deus, é se instrutor. Si un instrutor konvida-u pa un studu di Bíblia, bu debe lenbra ma bo é se kunpanheru. Bu obijetivu é djuda-l. (Ecl. 4:9, 10) Má, kuzê ki bu pode faze duránti kel studu di Bíblia pa djuda kel instrutor?

6. Si bu konvidadu pa un studu di Bíblia, modi ki bu pode aplika kel konsedju ki sta na Provérbios 20:18 ?

⁶ Pripara pa kel studu di Bíblia. Primeru, pidi kel instrutor pa fla-u algun kuza sobri kel studanti. (Lé Provérbios 20:18.) Bu pode pergunta-l: “Bu pode konta-m algun kuza sobri bu studanti? Ki asuntu ki bu sta ba studa ku el? Kal ki é obijetivu di kel studu li? Ten algun kuza ki N pode fla ô ka fla duránti kel studu? Kuzê ki pode djuda kel studanti faze prugrésu?” É klaru ki kel instrutor ka ta da-u ninhun informason sobri kel studanti ki bu ka debe sabe. Un misionária, ki txoma Joy, ta kustuma pâpia sobri kes asuntu li ku kes algen ki el ta konvida pa se studus di Bíblia. El fla: “N gosta di pâpia di kes asuntu li ku kes algen ki N ta konvida pa nhas studu. Kel-li ta pô-s ta ten interesi na kes studanti i sabe modi ki es pode djuda-s.”

7. Si bu konvidadu pa un studu, pamodi ki é bon bu sta priparadu?

⁷ Si bu konvidadu pa un studu di Bíblia, ta sérba bon si bu konsigi pripara antis kel matéria ki sta ba papiadu di el. (Esd. 7:10) Dorin, ki dja nu papiaba di el antis, fla: “N gosta txeu óras ki nha kunpanheru di pregason ta pripara dretu pa kel studu. Di kel manera li, el ta konsigi da bons komentáriu.” Tanbê, si kel instrutor sta ben priparadu sima se kunpanheru, kel studanti ta da kónta i kel-li ta ser un bon izénplu pa el. Má sikrê bu ka konsigi pripara kel matéria dretu, tra peloménus un ténpu pa bu ntende kes pontu prinsipal di kel matéria.

8. Kuzê ki pode djuda-u óras ki bu ta faze un orason na un studu di Bíblia?

⁸ Orason é un párti inportanti na studu di Bíblia. Pur isu, pensa antis na kuzê ki bu ta fla, si kel instrutor pidi-u pa bu faze orason. Asi, bu orason pode toka korason di kel studanti. (Sal. 141:2) Odja kuzê ki kontise ku Hanae, ki ta mora na Japon. Kantu el éra studanti di Bíblia, alvês se instrutora ta konvidaba un otu irman pa se studu. Ti oji, Hanae ta lenbra di orasons di kel irman. El fla: “N ta konsigi odjaba ma el tinha un amizadi fórti ku Jeová i N krê sérba sima el. I tudu bês ki el ta flaba nha nómi na orason, N ta xintiba ma el tinha amor pa mi.”

9. Sima sta na Tiago 1:19, kuzê ki bu pode faze pa djuda un instrutor duránti un studu?

⁹ Djuda instrutor duránti studu. Un pionera spesial na Nijéria, fla: “Un bon kunpanheru di studu, é kel ki ta presta txeu atenson. El ta da bons komentáriu duránti studu. Má, el ka ta pâpia dimás pamodi el sabe ma é kel instrutor ki debe faze kel studu.” Nton, ki óra ki bu debe fla algun kuza? I kuzê ki bu debe fla? (Pro. 25:11) Presta txeu atenson timenti kel instrutor ku kel studanti sta ta pâpia. (Lé Tiago 1:19.) É sô si ki bu ta konsigi djuda na óra sértu. Má é klaru ki bu debe pensa antis di bu pâpia. Pur izénplu, bu ka meste pâpia txeu, korta instrutor konbérsu timenti el sta splika un kuza ô muda di asuntu. Má bu pode djuda kel studanti ntende kel pontu prinsipal ku un komentáriu brévi, un ilustrason ô un pergunta. Ten alguns momentu ki bu pode atxa ma bu ka sta djuda txeu na studu. Na kes kazu li, ilôjia kel studanti i mostra ma bu ta preokupa ku el. Sô kel-li dja, pode djuda kel studanti faze prugrésu.

10. Modi ki bus spiriénsa pode djuda un studanti di Bíblia?

¹⁰ Konta bus spiriénsa. Bu pode konta-l di manera brévi modi ki bu prende verdadi, modi ki bu vense un dizafiu ô modi ki dja bu xinti ajuda di Jeová na bu vida. (Sal. 78:4, 7) Bus spiriénsa pode ser kel ki studanti meste obi. El pode djuda-l ten un fé más fórti i insentiva-l pa el faze prugrésu i batiza. I talvês, bus spiriénsa pode djuda-l vense un dizafiu ki el sta ta pasa pa el. (1 Ped. 5:9) Gabriel, ki ta mora na Brazil i ki oji é pioneru, ta lenbra di kuzê ki djuda-l kantu el éra un studanti di Bíblia. El fla: “Óras ki N ta obiba spiriénsa di irmons, N ntende ma Jeová ta odja kes dizafiu ki nu ta pasa pa el. I si es konsigi vense kes dizafiu, ami tanbê N ta podeba.”

ÓRAS KI UN STUDANTI DI BÍBLIA KUMESA TA SISTI RUNION

11-12. Pamodi ki nu debe resebe dretu un studanti di Bíblia ki sta kumesa ta sisti runion?

¹¹ Pa un studanti di Bíblia faze prugrésu i batiza, el meste sisti tudu runion. Kel-li ta djuda-l ser más amigu di Jeová. (Heb. 10:24, 25) Di sertéza é se instrutor ki ta konvida-l pa kel primeru runion. Óras ki el ben Salon di Reinu, nos tudu nu pode insentiva-l pa el kontinua ta sisti runion. Má modi ki nu pode faze kel-li?

¹² Resebe kel studanti dretu. (Rom. 15:7) Si kel studanti xinti ma el resebedu dretu, di sertéza el ta krê ba Salon di Reinu otu bês. Sen pô-l ta xinti sen jetu, kunprimenta-l i aprizenta-l pa otus algen. Pâpia ku el, pamodi talvês se instrutor inda ka txiga ô el sta ta kuida di algun responsabilidadi na Salon di Reinu. Presta txeu atenson na kuzê ki studanti ta fla i mostra ma bu ta preokupa ku el. Si bu resebe kel studanti dretu, modi ki el ta xinti? Odja kuzê ki kontise ku Dmitrii. Dja ten poku anus ki el batiza i oji el é ajudanti di kongregason. Ta lenbra di se primeru runion, el fla: “N staba txeu preokupadu ta spéra fóra di Salon di Reinu. Un irmon odja-m i ku bondadi el kunpanha-m ti déntu di Salon. Txeu irmon ben kunprimenta-m. N fika dimiradu i ti N pensa: ‘N ta krê pa tinha runion tudu dia.’ Nunka N ka xintiba si na ninhun otu lugar.”

13. Modi ki bu bon konportamentu pode djuda un studanti di Bíblia?

¹³ Da un bon izénplu. Bu konportamentu pode djuda un studanti di Bíblia ten sertéza ma dja el atxa verdadi. (Mat. 5:16) Vitalii, ki oji é pioneru na Moldávia, fla: “N ta prestaba atenson na manera ki otus irmon di kongregason ta viveba, ta pensaba i ta ajiba. Kel-li pô-m ta ten sertéza ma Tistimunhas di Jeová, ta anda ku Deus própi.”

14. Modi ki bu izénplu pode djuda algen kontinua ta faze prugrésu?

¹⁴ Antis di batiza, un studanti meste aplika kes kuza ki el sta prende. Kel-li nen sénpri é ka fásil. Má óras ki studanti ta odja-u ta aplika prinsípius di Bíblia i ma kel-li sta ta djuda-u, el ta xinti vontadi di faze mésmu kuza. (1 Cor. 11:1) Odja izénplu di Hanae, ki dja nu papiaba di el antis. El fla: “Kes irmon na kongregason ta fazeba kes kuza ki N staba ta prende. N prende modi ki N ta anima otus, modi ki N pode púrdua i mostra amor. Irmons sénpri ta papiaba ben di kunpanheru. N krê sérba sima es.”

15. Sima sta na Provérbios 27:17, pamodi ki nu debe faze amizadi ku studantis?

¹⁵ Faze amizadi ku kel studanti. Sima un studanti ta kontinua ta sisti runion, mostra ma bu ta preokupa ku el di verdadi. (Fil. 2:4) Tra ténpu pa bu pâpia ku kel studanti. Sen mete na se asuntus, ilojia-l pa tudu mudansas ki dja el faze. Pergunta-l sobri se studu di Bíblia, se família i se trabadju. Kes tipu di konbérsu li ta djuda nhos ten un bon amizadi. I kel-li pode djuda kel studanti xinti vontadi di batiza. (Lé Provérbios 27:17.) Oji Hanae é pionera fíksu. Ta lenbra sobri kel ténpu ki el kumesa ta sisti runion, el fla: “Sima N ba ta ranja amigus na kongregason, N ta fikaba ku gana di baba runion. I mésmu óras ki N ta staba kansadu N ta baba Salon di Reinu. N ta gostaba di sta djuntu ku nhas novus amigu. I kel-li djuda-m kaba ku amizadi ku kes algen ki ka ta sirbiba Jeová. N krê sérba kada bês más amigu di Jeová i di irmons di kongregason. Nton N disidi batiza.”

16. Kuzê más ki bu pode faze pa djuda un studanti xinti más avontádi na kongregason?

¹⁶ Sima un studanti ta kontinua ta faze prugrésu i ta faze mudansas, djuda-l xinti ma el ta faze párti di kongregason. Un manera di faze kel-li, é óras ki bu ta konvida-l pa un konvíviu ô pa faze otus kuza. (Heb. 13:2) Ta lenbra di kel ténpu ki el éra un studanti, Denis ki ta mora na Moldávia, fla: “Txeu bês mi ku nha mudjer nu konvidadu pa kes konvíviu ki irmons ta faze. Na kes momentu la, es ta kontaba modi ki Jeová djuda-s i kel-li da-nu txeu koraji. Nu fika ku sertéza ma nu krê sirbiba Jeová i ma nu pode tinha un vida rei di sábi.” Óras ki un studanti bira un publikador, bu pode konvida-l pa nhos sai na pregason djuntu. Diego, ki é un publikador na Brazil, fla: “Txeu irmon konvida-m pa nu trabadja na pregason. Kel-li foi un bon manera di konxe-s dretu. N prende txeu kuza ku kada un di es i N xinti más amigu di Jeová i di Jizus.”

MODI KI ANSIONS PODE DJUDA?

17. Modi ki ansions pode djuda kes studanti di Bíblia?

¹⁷ Tra un ténpu pa studantis. Ansions, amor i interesi ki nhos ta mostra pa studantis, pode djuda-s faze prugrésu i batiza. Kuzê ki bu ta atxa di tra ténpu tudu runion pa pâpia ku kes studanti? Óras ki es kumesa ta da komentáriu, txoma-s pa ses nómi. Asi, es ta xinti ma bu ta preokupa ku es. Di vês en kuandu, tenta sai na pregason ku un publikador ki sta faze un studu. Bu pode konsigi djuda kel studanti más di ki kel ki bu ta imajina. Jackie, ki é un pionera ki ta mora na Nijéria, fla: “Txeu studanti ta fika dimiradu óras ki es da kónta ma un di kes irmon ki staba ku mi na ses studu é un ansion. Un di kes studanti ti fla-m: ‘Nha pastor nunka ka ta fazeba kel-li. El ta vizita sô algen riku i sô si es paga-l!’” Kel studanti li gósi sta sisti runion.

18. Modi ki ansions pode kunpri ses responsabilidadi ki sta na Atos 20:28?

¹⁸ Trena i nkoraja kes instrutor. Ansions, nhos ten un grandi responsabilidadi di djuda kes publikador ser bon na prega i na faze studus di Bíblia. (Lé Atos 20:28.) Talvês un publikador pode xinti vergónha di faze un studu di Bíblia óras ki bu ta sta djuntu ku el. Na kel kazu li, oferese pa faze kel studu. Jackie, ki dja nu papiaba di el antis, fla: “Kes ansion sénpri ta pergunta-m sobri nhas studanti. Óras ki N sta ku difikuldadi na algun studu, es ta da-m bons ideia.” Ansions ten un papel inportanti na nkoraja kes instrutor i djuda-s ka dizisti. (1 Tes. 5:11) Jackie tanbê fla: “N ta fika kontenti óras ki ansions ta nkoraja-m i es ta fla-m ma nha trabadju ten valor pa es. Kes palavra li ta anima-m sima un kópu di agu jeladu na un dia di kalor. Ses ilojiu ta da-m más kunfiansa i ta pô-m ta xinti más alegria óras ki N ta faze studus di Bíblia.” — Pro. 25:25.

19. Ki alegria nos tudu pode ten?

¹⁹ Sikrê gósi bu ka sta faze un studu di Bíblia, bu pode djuda un algen faze prugrésu i batiza. Si bu konvidadu pa un studu di Bíblia, pripara dretu pa bu da bons komentáriu ki ta djuda kel instrutor i toma kuidadu pa bu ka pâpia txeu. Faze amizadi ku kes studanti ki sta kumesa ben Salon di Reinu i da-s bon izénplu. Si bo é un ansion bu pode nkoraja studantis, óras ki bu ta tra ténpu pa pâpia ku es i bu ta nkoraja kes instrutor óras ki bu ta trena-s i ilojia-s. Si nu faze si, nu pode ten txeu alegria di djuda un algen ama i sirbi nos Pai, Jeová.