1 | Faze orason ‘Nhos bota tudu nhos preokupason riba di el’

BÍBLIA TA FLA: ‘Nhos bota tudu nhos preokupason riba di Deus, pamodi el ta kuida di nhos.’ — 1 PEDRO 5:7.

Kuzê ki kel-li krê fla

Jeová ta konvida-nu pa nu pâpia ku el sobri kalker kuza ki ta preokupa-nu. (Salmo 55:22) Ninhun prubléma é ka pikinoti dimás ô grandi dimás pa nu pâpia ku Jeová sobri el. Si un kuza é inportanti pa nos el é inportanti pa Jeová. Kel-li é pamodi Jeová ta preokupa ku nos i ku modi ki nu ta xinti. Pâpia ku el na orason é un kuza inportanti ki nu pode faze pa nu ten pas na nos menti. — Filipensis 4:6, 7.

Modi ki kel-li pode djuda-nu

Óras ki nu ta lida ku un duénsa ki ta afeta nos menti, nu pode xinti ma nu sta nos sô. Otus algen nen sénpri ka ta intende dretu kuzê ki nu sta pasa pa el. (Provérbios 14:10) Má, óras ki nu abri nos korason i nu fla Deus na orason modi ki nu sta xinti, sénpri el ta obi-nu ku bondadi i el ta intende-nu. Jeová ta odja-nu, el konxe nos dór i nos luta. I el krê pa nu faze orason sobri kalker kuza ki ta preokupa-nu. — 2 Crónicas 6:29, 30.

Pâpia ku Jeová na orason ta pô-nu ta ten más kunfiansa ma el ta preokupa ku nos. Nu pode xinti sima kel salmista ki fla na orason: ‘Bu ta odja nha sufrimentu; bu konxe kel tristéza grandi ki N ta xinti’. (Salmo 31:7) Sô di sabe ma Jeová ta da kónta di kuzê ki nu sta pasa pa el, pode djuda-nu kontinua ta aguenta kel situason difísil. Má, el ta faze más di ki sô da kónta di nos prubléma. El ta intende kuzê ki nu sta pasa pa el, midjór di ki kalker otu algen, i el ta djuda-nu atxa konsolu i inkorajamentu na Bíblia.

Modi ki Bíblia sta ta djuda Julian

Modi ki ansiadadi ta afeta-m

“N ta luta ku ansiadadi i ku ideias negativu ki ta pô-m ta xinti mariadu. Ta parse ma kel ansiadadi li ta afeta-m na óra ki N ka ta sta ta spéra. Ten óra ki N ta sta dretu i di un óra pa kel otu, N ta fika preokupadu dimás sen ninhun motivu. Kuzê ki ta dexa-m más preokupadu é óras ki N ta sta djuntu ku otus algen. N ta fika preokupadu dimás ku kuzê ki es ta pensa di mi.

“Nhas amigu ki sabe ma N ten kel prubléma li, ta faze ses midjór pa djuda-m. N ten ki rekonhese ma alvês kuzê ki es ta fla é ka kel ki N ta gostaba di obi. Má N agradese-s txeu pamodi es ta tenta djuda-m.

“Alvês é difísil N konsigi faze orason pamodi nha ansiadadi i kes ideia negativu ki N ten. N ten ki sforsa txeu pa N konsentra nha menti i pa N pâpia ku Jeová na orason. N ta pensa na un monti kuza omésmu ténpu i N ta fika baradjadu. Óras ki N ka ta konsigi kontrola nhas pensamentu, ta fika difísil fla Jeová kuzê ki N sta pensa na el ô ki N sta xinti.”

Modi ki Bíblia sta djuda-m

“Na studa Bíblia, N prende ma pa Deus seta nos orason, el ka meste ser kunpridu ô ku palavras difísil. Óras ki N ka ta konsigi fla kuzê ki N sta xinti, N ta fla sô: ‘Jeová, favor djuda-m’. Sikrê na kes momentu li, N ta xinti ma Jeová ta intende-m i ma el ta da-m kel ki N meste na kel óra. Alén di faze orason, N djobe ajuda di un dotor. N sta kontenti di fla ma pamodi kes dôs kuza li, N midjora txeu. Bale péna faze sforsu pa djobe ajuda na nha Pai ki sta na séu i xinti se amor i se ajuda.”