Kunfia na kel ‘Juís di téra interu’ ki ten mizerikórdia!

1. Ki lison inportanti Jeová inxina Abraon?

ABRAON tevi un konbérsu ki nunka el ka skese. Jeová uza un anju pa fla Abraon ma el staba ta bai distrui sidadis di Sudoma ku Gumora. Enbóra Abraon tinha un fé fórti, kel-li foi un kuza difísil di el intende. El pergunta: ‘Bu sta pensa própi na distrui kes algen justu djuntu ku kes algen mau? Juís di téra interu ka ta faze kel ki é justu?’ Ku paxénxa Jeová djuda se amigu, ki el ta amaba txeu, prende un lison inportanti ki ta djuda-nu i konsola-nu ti dia di oji: Deus nunka ka ta distrui kes algen justu. — Gén. 18:23-33.

2. Kuzê ki ta da-nu serteza ma Jeová ta julga ku justisa i mizerikórdia?

² Modi ki nu pode ten serteza ma óras ki Jeová ta julga pesoas, sénpri el ta faze-l ku justisa i mizerikórdia? Pamodi nu sabe ma ‘Jeová ta odja korason’ di pesoas. (1 Sam. 16:7) Na verdadi, el konxe ‘korason di tudu algen’. (1 Reis 8:39; 1 Cró. 28:9) Kel-li é un verdadi sábi dimás. Jeová ten mutu más sabedoria di ki nos. Pur isu, alvês nu ka ta konsigi intende dretu pamodi ki el ta toma alguns disizon. Apóstlu Paulu fla kel-li sobri Jeová Deus: “Ningen ka ta pode intende se julgamentu”! — Rom. 11:33.

3-4. Kuzê ki alvês nu pode pergunta, i kuzê ki nu sta ta ben odja na kel studu li? (Juan 5:28, 29)

³ Enbóra nu sabe ma Jeová sénpri ta faze kel ki é dretu, alvês nu pode faze alguns pergunta sima Abraon faze. Talvês nu pode pergunta: ‘Ten speransa pa kes algen ki Deus distrui na Sudoma ku Gumora? Alguns di kes algen ta ben resusitadu na “resureison di kes algen... injustu”?’ — Atus 24:15.

⁴ Nu ben odja kuzê ki nu sabe sobri resureison. Ka dura li nu resebe un novu intendimentu sobri “resureison di vida” i “resureison di julgamentu.”a (Lé Juan 5:28, 29.) Kel-li djuda-nu faze mudansas na manera ki nu ta intendeba otus kuza. Na kel studu li i na kel otu studu nu ta ben pâpia sobri kes mudansa li. Primeru, nu sta ben odja kuzê ki nu ka sabe sobri julgamentu justu di Jeová i dipôs nu ta ben odja kuzê ki nu sabe.

KUZÊ KI NU KA SABE

5. Na pasadu, kuzê ki nos publikasons fla sobri kes algen ki distruídu na Sudoma ku Gumora?

⁵ Na pasadu, nos publikasons fla kuzê ki ta ben kontiseba ku pesoas injustu óras ki Jeová ben faze julgamentu. Nu ta flaba ma kes algen ki distruídu na Sudoma ku Gumora ka ta ben ser resusitadu. Má dipôs di studa ku kuidadu i faze más orason sobri kel asuntu li, nu odja ma nu ka pode fla kel-li ku serteza. Pamodi?

6. Da alguns izénplu di julgamentu ki Jeová faze kóntra pesoas injustu. Kuzê ki nu ka sabe sobri es?

⁶ Ten txeu stória na Bíblia ki ta mostra julgamentus ki Jeová faze kóntra kes algen injustu. Pur izénplu, na Dilúviu Jeová distrui tudu algen, ménus Nué i se família. Tanbê, el uza israelitas pa distrui 7 nason ki ta moraba na kel téra ki el prometeba es. I el uza un anju pa distrui 185 mil trópa di Asíria na un noti. (Gén. 7:23; Deut. 7:1-3; Isa. 37:36, 37) Na kes kazu li, Bíblia ka ta fla klaru ma Jeová disidi ma kada un di kes algen ki distruídu nunka más ka ta ben ser resusitadu. Pamodi ki nu pode fla kel-li?

7. Kuzê ki nu ka sabe sobri kes algen ki distruídu na dilúviu i kes ki distruídu kantu israelitas toma téra di Kanan? (Odja dizenhu na kapa.)

⁷ Na kes izénplu ki nu pâpia di el, nu ka sabe modi ki Jeová julga kada un di kes algen, nen nu ka sabe si kes algen ki distruídu tevi oportunidadi di prende sobri Jeová i rapende. Óras ki Bíblia ta pâpia sobri kel ténpu di Dilúviu, el ta fla ma Nué éra “pregador di justisa”. (2 Ped. 2:5) Má Bíblia ka ta fla ma timenti el staba ta faze kel arka grandi, omésmu ténpu el staba ta tenta prega pa kada algen na téra. Di mésmu manera, nu ka sabe si tudu kes algen mau ki ta viveba na téra di Kanan tevi oportunidadi di prende sobri Jeová i muda ses konportamentu.

8. Kuzê ki nu ka sabe sobri pesoas di Sudoma ku Gumora?

⁸ I kes algen ki Jeová distrui na Sudoma ku Gumora? Ló, ki éra un ómi justu, ta moraba na Sudoma. Má nu ka sabe si Ló prega pa tudu kes algen ki ta moraba la. É verdadi ma es éra pesoas mau, má nu ka sabe si kada un di es sabia kuzê ki éra sértu i kuzê ki éra mariadu. Lenbra ma Bíblia ta fla ma un monti di ómi di kel sidadi tenta viola vizitas di Ló. Entri es tinha kes ómi ‘más novu i kes más bédju.’ (Gén. 19:4; 2 Ped. 2:7) Má nu pode fla ku serteza ma Jeová, ki é un Deus di mizerikórdia, disidi ma ninhun di kes algen ka ta ser resusitadu? Nau, nu ka pode fla kel-li! Jeová da Abraon serteza ma ka tinha nen 10 ómi justu na kel sidadi. (Gén. 18:32) Nton, kes algen éra injustu i Jeová tinha direitu di distrui-s. Má nu pode fla ku serteza ma ninhun di es ka ta ben ser resusitadu na “resureison di kes algen... injustu”? Nau, nu ka pode fla kel-li ku serteza!

9. Kuzê ki nu ka sabe sobri Salumon?

⁹ Tanbê, na Bíblia nu ta atxa stórias di pesoas ki éra justu, má ki bira injustu. Un izénplu di kel-li é rei Salumon. El sabia dretu kenha ki Jeová éra i modi ki el devia adoraba el. I Jeová abênsua-l txeu. Má dipôs, Salumon kumesa ta adora deus falsu. Kel-li poi Jeová txeu xatiadu ku el i nason interu di Israel sufri senténas di anu pamodi kes pekadu di Salumon. É verdadi ki Bíblia ta fla ma Salumon ‘diskansa ku se gentis grandi’, ki ta inkluiba ómis fiel sima rei Davidi. (1 Reis 11:5-9, 43; 2 Reis 23:13) Má kel-li krê fla ma Jeová ta ben resusita Salumon? Bíblia ka ta fla. Alguns algen pode atxa ma Salumon ta ser resusitadu pamodi Bíblia ta fla ma “óras ki algen móre se pekadu dja purduadu.” (Rom. 6:7) Má kel-li ka krê fla ma tudu algen ki móre ta ben resusitadu. É ka sô pamodi un algen móre ki el ten direitu di vive otu bês. Resureison é un prezenti di nos Deus ki ta ama-nu. El ta da kel prezenti li pa kes algen ki el krê da oportunidadi di sirbi-l pa tudu ténpu. (Jó 14:13, 14; Juan 6:44) Salumon ta ben ganha kel prezenti li? É sô Jeová ki sabe. Má nu pode ten serteza ma Jeová sénpri ta faze kel ki é justu.

KUZÊ KI NU SABE

10. Modi ki Jeová ta xinti óras ki el ten ki distrui un algen? (Ezequiel 33:11) (Odja dizenhu.)

¹⁰ Lé Ezequiel 33:11. Jeová ta fla-nu modi ki el ta xinti óras ki el ten ki faze un julgamentu kóntra un algen. Jeová uza apóstlu Pedru pa fla kes mésmu palavra ki proféta Ezekiel fla. Apóstlu Pedru fla: “Jeová... ka krê pa ningen ser distruídu”. (2 Ped. 3:9) Kes palavra li ta konsola-nu. Nu sabe ma Jeová ka ta distrui ningen pa tudu ténpu si el ka ten un bon motivu pa faze kel-li. Jeová é xeiu di mizerikórdia i el ta mostra se mizerikórdia sénpri ki ta da.

11. Kenha ki ka ta ben ser resusitadu, i modi ki nu sabe di kel-li?

¹¹ Kuzê ki nu sabe sobri kes algen ki ka ta ben ser resusitadu? Bíblia ta pâpia di poku izénplu.b Jizus fla ma Judas Iskariótis ka ta ben ser resusitadu. (Mar. 14:21; odja tanbê Juan 17:12 i nóta di studu.) Judas sabia ma el staba ta peka kóntra Jeová Deus i Se Fidju, má el peka simé. (Odja Mar. 3:29 i nótas di studu.) Tanbê, Jizus fla ma alguns xéfi di relijion ki pâpia kóntra el ta moreba sen speransa di resureison. (Mat. 23:33; odja Juan 19:11 i nóta di studu “o homem”.) Apóstlu Paulu fla tanbê ma kes algen ki bira kóntra verdadi i ki ka rapende ka ta ben ser resusitadu. — Ebr. 6:4-8; 10:29.

12. Kuzê ki nu sabe sobri mizerikórdia di Jeová? Da izénplus.

¹² Má kuzê ki nu sabe sobri mizerikórdia di Jeová? Modi ki Jeová dja mostra ma el “ka krê pa ningen ser distruídu”? Nu ben odja modi ki Jeová mostra mizerikórdia pa alguns algen ki faze pekadus gravi. Pur izénplu, rei Davidi faze pekadus gravi, ki ta inkluiba adultériu i asasinatu. Má Davidi rapende, pur isu Jeová mostra-l mizerikórdia i el púrdua-l. (2 Sam. 12:1-13) Duránti maior párti di se vida, rei Manasés faze txeu kuza orível. Má, sikrê rei Manasés faze tudu kes pekadu gravi, Jeová mostra-l mizerikórdia i el púrdua-l pamodi el rapende. (2 Cró. 33:9-16) Kes izénplu li ta prova ma Jeová ta mostra mizerikórdia sénpri ki el odja ma ten algun motivu pa faze kel-la. El ta ben resusita kes algen ki faze pekadus gravi má ki rapende di kes kuza mariadu ki es faze.

13. (a) Pamodi ki Jeová mostra mizerikórdia pa kes algen di Nínivi? (b) Kuzê ki Jizus fla sobri kes algen di Nínivi?

¹³ Tanbê nu sabe di mizerikórdia ki Jeová mostra pa kes algen di Nínivi. Deus fla Jonas: ‘N da kónta di ses maldadi.’ Má kantu es rapende di ses pekadu, ku bondadi, Jeová púrdua-s. El mostra más mizerikórdia di ki Jonas. Jonas staba xatiadu, má Jeová lenbra-l ma kes algen di Nínivi ‘ka sabia diferénsa entri kel ki é dretu ku mariadu’. (Jonas 1:1, 2; 3:10; 4:9-11) Dipôs, Jizus uza kel izénplu li pa inxina sobri justisa i mizerikórdia di Jeová. Jizus fla ma kes algen di Nínivi ki rapende ta ben “resusita na julgamentu”. — Mat. 12:41.

14. Kuzê ki “resureison di julgamentu” ta ben siginifika pa kes algen di Nínivi?

¹⁴ Na ki “julgamentu” ki kes algen di Nínivi ta ben “resusita”? Jizus pâpia sobri un “resureison di julgamentu” ki ta ben kontise na futuru. (Juan 5:29) Jizus staba ta pâpia di resureison “di kes algen justu i tanbê di kes algen injustu” ki ta ben kontise duránti se govérnu di mil anu. (Atus 24:15) Pa kes algen injustu, kel-li ta ben ser “un resureison di julgamentu”. Kel-li krê fla ma dipôs ki kes algen ben resusitadu, Jeová i Jizus ta ben odja si es ta obi i faze kes kuza sima es prende. Si un algen di Nínivi ki ben resusitadu nega faze párti di adorason puru, Jeová ka ta ben dexa-l vive. (Isa. 65:20) Tudu kes algen ki skodje adora Jeová di manera fiel ta ben ten xansi di vive pa tudu ténpu! — Dan. 12:2.

15. (a) Pamodi nu ka debe fla ma ninhun di kes algen ki distruídu na Sudoma ku Gumora ka ta ben resusitadu? (b) Modi ki nu pode intende kes palavra ki sta na Judas 7? (Odja kuadru “Kuzê ki Judas krê flaba?”)

¹⁵ Kantu Jizus pâpia di kes algen di Sudoma ku Gumora, el fla ma ta sérba midjór pa es “na Dia di Julgamentu” di ki pa kes algen ki nega-l i ki ka seta kes kuza ki el inxina. (Mat. 10:14, 15; 11:23, 24; Luk. 10:12) Má, Jizus staba ta izajera kantu el fla ma kes algen di se ténpu éra piór di ki kes algen di Sudoma ku Gumora? Lenbra ma kantu Jizus fla ma kes algen di Nínivi ta resusita na “Dia di Julgamentu” el staba ta fla ma kel-li ta ben kontise própi. Ta parse ma kel “Dia di Julgamentu” ki Jizus pâpia di el pa kes algen di Sudoma ku Gumora é kel mésmu “Dia di Julgamentu” ki el pâpia di el pa kes algen di Nínivi. Sima kes algen di Nínivi, kes algen di Sudoma ku Gumora faze kuzas mariadu. Má, kes algen di Nínivi tevi oportunidadi di rapende. Tanbê, lenbra kuzê ki Jizus fla sobri “resureison di julgamentu”. Kel resureison li ta inklui “kes ki faze kuzas mariadu”. (Juan 5:29) Ta parse ma talvês ten algun speransa pa kes algen di Sudoma ku Gumora. Pode ser ki alguns di kes algen ta ben resusitadu i nu pode ben ten oportunidadi di inxina-s sobri Jeová i Jizus Kristu.

16. Kuzê ki nu sabe sobri modi ki Jeová ta ben disidi kenha ki el ta ben resusita? (Jeremias 17:10)

¹⁶ Lé Jeremias 17:10. Kel versíklu li ta mostra kuzê ki nu sabe sobri manera ki Jeová ta faze julgamentu. Nu sabe ma Jeová sénpri ‘ta izamina kurason i el ta djobe pensamentus la na fundu’. Óras ki el disidi kenha ki el ta ben resusita, el ta ‘rekonpensa kada un di akordu ku se kaminhus’. Jeová ta ben ser firmi óras ki meste, má sénpri ki ta da el ta mostra se mizerikórdia. Pur isu, nunka nu ka debe fla ma un algen ka ta ben ser resusitadu. Sô nu ta fla kel-la si Bíblia da-nu serteza!

‘JUÍS DI TÉRA INTERU TA FAZE KEL KI É JUSTU’

17. Kuzê ki ta ben kontise ku kes algen ki móre?

¹⁷ Désdi ki Adon ku Eva djunta ku Satanás i es rabela kóntra Jeová Deus, bilhons di algen dja móre. Mórti é un “inimigu” kruel! (1 Kor. 15:26) Kuzê ki ta ben kontise ku tudu kes algen ki móre? Un grupu pikinoti di 144 mil sigidor fiel di Jizus ta ben resusitadu pa ba vive pa tudu ténpu na séu. (Apo. 14:1) Un nunbru grandi di ómis ku mudjeris fiel, ki ta ama Jeová, ta ben faze párti di kel “resureison di kes algen justu” i es ta ben vive pa tudu ténpu na téra, si es kontinua justu duránti govérnu di mil anu di Jizus i duránti kel próva final. (Dan. 12:13; Ebr. 12:1) Tanbê, duránti kel govérnu di mil anu, “kes algen injustu”, ki ta inklui kes algen ki nunka ka sirbi Jeová ô ti mésmu kes ki “faze kuzas mariadu”, ta ben ten oportunidadi di muda ses konportamentu i bira sérvus fiel di Jeová. (Luk. 23:42, 43) Má, alguns algen éra mau dimás i es staba disididu na rabela kóntra Jeová i se vontadi, pur isu el disidi ma es ka ta ben ser resusitadu. — Luk. 12:4, 5.

18-19. (a) Pamodi ki nu pode kunfia na julgamentu ki Jeová ta ben faze pa kes algen ki dja móre? (Isaías 55:8, 9) (b) Kuzê ki nu ta ben odja na kel otu artigu?

¹⁸ Nu pode ten tudu serteza ma óras ki Jeová ben julga pesoas, sénpri el ta ben toma un bon disizon? Sin. Sima Abraon intende dretu, Jeová ki é ‘Juís di téra interu’, é perfeitu, el ten tudu sabedoria i el ten mizerikórdia. El trena se Fidju i el da-l responsabilidadi di julga tudu algen. (Juan 5:22) Jeová i Jizus konxe korason di tudu algen. (Mat. 9:4) Óras ki es ben julga kada algen, sénpri es ta ben faze ‘kel ki é justu’!

¹⁹ Nu debe kunfia na Jeová i na tudu disizons ki el ta toma. Nu debe rekonhese ma nu ka sta kualifikadu pa julga, má Jeová sta! (Lé Isaías 55:8, 9.) Pur isu, ku kunfiansa nu ta dexa tudu julgamentu pa Jeová i se Fidju, ki é Rei i ki ta imita justisa i mizerikórdia di se Pai di manera perfeitu. (Isa. 11:3, 4) Kuzê ki nu pode fla sobri modi ki Jeová i Jizus ta ben julga pesoas duránti grandi tribulason? Kuzê ki nu ka sabe? I kuzê ki nu sabe? Kel otu artigu ta ben responde kes pergunta li.