STUDU 38
KÁNTIKU 25 Un nason spesial
Bu ta presta atenson na avizus?
“Un ta lebadu i kel otu ta bandonadu.” — MATEUS 24:40.
ASUNTU PRINSIPAL
Nu sta ben pâpia di três ilustrason ki Jizus faze i odja modi ki es ta aplika na ténpu di julgamentu ki ta ben kontise na fin di kel mundu li.
1. Kuzê ki ka ta dura Jizus ta ben faze?
NU STA vive na un ténpu ki mudansas grandi sta pa ben kontise! Falta poku pa Jizus ben julga tudu algen na téra. Jizus splika-nu alguns kuza ki ta ben kontise antis di dia di julgamentu, kantu el fla se disiplus kel “sinal” di se prezénsa i di “fin di es mundu”. (Mat. 24:3) Nu ta atxa kel sinal na livru di Mateus kapítlu 24 i 25 i na livru di Markus kapítlu 13 i Lukas kapítlu 21.
2. Kuzê ki nu sta ben pâpia di el na kel studu li, i pamodi ki el ta djuda-nu?
2 Jizus uza três ilustrason pa djuda-nu sta priparadu. Es ta sirbi di avizu pa nos. El uza ilustrasons di ovelhas ku kabritus, di kes vírjen prudenti i kes tola i di taléntus. Kada un di kes ilustrason ta djuda-nu intende ma Jizus ta ben julga un algen ku bazi na kuzê ki el faze. Timenti nu ta pâpia di kes ilustrason, nu ta odja kuzê ki nu pode prende i modi ki nu pode faze sima nu prende. Kel primeru ilustrason ki nu sta ben pâpia di el é kel di ovelhas ku kabritus.
KES OVELHA I KES KABRITU
3. Na ki ténpu ki Jizus ta ben julga pesoas?
3 Na kel ilustrason di ovelhas ku kabritus, Jizus fla ma el ta ben julga pesoas ku bazi na modi ki es reaji kantu ki es obi notísias sábi i si es djuda kes skodjedu ku spritu santu ô nau. (Mat. 25:31-46) Duránti “grandi tribulason”, Jizus ta ben disidi si es é ovelhas ô kabritus poku ténpu antis di Armajedon. (Mat. 24:21) Sima un pastor ta sipara se ovelhas di kabritus, Jizus ta ben sipara kes ki ta apoia di manera lial kes skodjedu ku spritu santu, di kes ki ka ta faze kel-la.
4. Sima sta na Isaías 11:3, 4, pamodi ki nu pode ten serteza ma Jizus ta ben julga pesoas di manera justu? (Odja fotus ku dizenhus.)
4 Profesias di Bíblia ta mostra ma Jizus, kel Juís ki Jeová skodje, ta ben julga ku justisa. (Lé Isaías 11:3, 4.) El ta ben analiza kuzê ki pesoas faze, pensa i fla. Tanbê, el ta ben analiza modi ki es trata se irmons skodjedu ku spritu santu. (Mat. 12:36, 37; 25:40) Jizus ta ben sabe kenha ki djuda se irmons skodjedu ku spritu santu.a Un di kes manera más inportanti ki un algen ta djuda kes irmon di Kristu, é óras ki nu ta apoia trabadju di pregason. Kes ki faze si, Jizus ta ben atxa ma es é “justu” i es ta ben ten xansi di ten “vida pa tudu ténpu” na téra. (Mat. 25:46; Apo. 7:16, 17) Kel-li é un rekonpensa rei di sábi pa kes algen ki mante lial! Pamodi es mante lial duránti grandi tribulason i dipôs, ses nómi ta kontinua na “livru di vida”. — Apo. 20:15.
Falta poku pa Jizus ben julga si un algen é sima un ovelha ô un kabritu (Odja parágrafu 4)
5. Kuzê ki nu ta prende ku kel ilustrason di ovelhas ku kabritus, i kenha ki el ta djuda?
5 Mostra ma bo é un algen fiel i lial. Kel ilustrason ki Jizus konta di ovelhas i kabritus ta kunpri primeru na kes ki ten speransa di vive na téra. Es ta mostra ma es ten fé óras ki es ta djuda irmons di Kristu na trabadju di pregason i óras ki es ta sigi di manera lial kes orientason di Skravu Fiel i Prudenti, ki é kes ómi ki Jizus skodje. (Mat. 24:45) Má kes ki ten speransa di ba vive na séu tanbê meste presta atenson na kel avizu di kel ilustrason di ovelhas ku kabritus. Pamodi? Pamodi Jizus ta repara kuzê ki es ta faze, pensa i fla. Es tanbê es meste prova ma es é fiel. Na verdadi, Jizus konta más dôs ilustrason di avizu ki ta aplika na kes ki é skodjedu ku spritu santu. Tanbê nu ta atxa kes ilustrason li na Mateus kapítlu 25. Gósi nu sta ben pâpia di kel ilustrason di kes vírjen prudenti i tola.
KES VIRJEN PRUDENTI I KES TOLA
6. Modi ki sinku di kes 10 vírjen mostra ma es éra prudenti? (Mateus 25:6-10)
6 Na kel ilustrason di kes vírjen, Jizus pâpia di 10 vírjen ki bai inkontra ku un noivu. (Mat. 25:1-4) Es tudu staba ta spera ma es ta kunpanhaba kel noivu na se fésta di kazamentu. Jizus fla ma sinku di es éra “prudenti” i ma kes otu sinku éra “tola”. Kes vírjen prudenti staba priparadu i es staba sienti. Es staba prontu pa spera noivu ténpu ki mesteba, ti mésmu si el binha tardi di noti. Pur isu, es leba óliu pa es poi na ses lánpida asi pa es ka fika na sukuru. Ti es leba óliu amás si pur akazu noivu txigaba atrazadu. Nton, es staba priparadu pa es kontinuaba ku ses kanderu sendedu. (Lé Mateus 25:6-10.) Kantu kel noivu txiga, kes vírjen prudenti entra djuntu ku el na fésta di kazamentu. Di mésmu manera, kes skodjedu ku spritu santu ki prova ma es mante sienti i lial ti ki Jizus Kristu ben, es ta resebe ses rekonpensa ki é di djunta ku Noivu ki é Jizus, na se Reinu na séu.b (Apo. 7:1-3) Má kuzê ki kontise ku kes sinku vírjen tola?
7. Kuzê ki kontise ku kes sinku vírjen tola, i pamodi?
7 Diferenti di kes vírjen prudenti, kes sinku vírjen tola ka staba prontu kantu noivu txiga. Ses lánpida staba ta paga i es ka lebaba más óliu na frasku ku es. Kantu ki es da kónta ma noivu staba kuazi ta txiga es tevi ki bai kunpra óliu. Má es ka konsigi volta antis di noivu txiga. Kantu el txiga, “kes vírjen ki staba prontu, entra ku el pa fésta di kazamentu, i fitxadu pórta.” (Mat. 25:10) Kantu kes vírjen tola volta i es pidi pa es entra, noivu fla-s: “N ka konxe nhos.” (Mat. 25:11, 12) Kes vírjen ka staba priparadu pa speraba noivu kantu ténpu ki mesteba. Kuzê ki kes skodjedu ku spritu santu ta prende?
8-9. Kuzê ki kes irmon skodjedu ku spritu santu pode prende di kel ilustrason di kes vírjen? (Odja fotu ku dizenhu.)
8 Mostra ma bu sta priparadu i ma bu sta sienti. Jizus ka staba ta fla ma ta ben tinha dôs grupu di irmons skodjedus ku spritu santu: un ki ta staba priparadu ti fin di kel mundu li i otu ki ka ta staba priparadu. Envês di kel-li, el staba ta splika kuzê ki pode kontise ku kes irmon skodjedu ku spritu santu si es ka kontinua priparadu pa aguenta firmi di manera fiel ti fin di es mundu. Si es ka kontinua priparadu, es ka ta resebe ses rekonpensa. (Juan 14:3, 4) Kel-li é un asuntu txeu sériu! Ka ta inporta si nu ten speransa di bai vive na séu ô na téra, nos tudu nu debe presta atenson na kel izénplu di avizu di kes vírjen. Kada un di nos meste kontinua sienti i sta priparadu, prontu pa aguenta firmi ti fin. — Mat. 24:13.
9 Dipôs di pâpia di ilustrason di kes vírjen, pa mostra ma é inportanti nu sta priparadu i sienti, Jizus pâpia di kel ilustrason di kes taléntu. Kel ilustrason li ta mostra ma é inportanti nu ser un algen trabadjador.
É inportanti nos tudu nu presta atenson na kel avizu di kel ilustrason di kes vírjen pa nu sta priparadu i sienti, prontu pa aguenta firmi ti fin. (Odja parágrafus 8 i 9.)
KES TALENTU
10. Modi ki kes dôs skravu mostra ma es éra fiel? (Mateus 25:19-23)
10 Na kel ilustrason di kes taléntu, Jizus pâpia di dôs skravu ki foi fiel pa ses dónu i di un ki ka foi fiel. (Mat. 25:14-18) Kes dôs skravu mostra ma es éra fiel kantu ki es sforsa txeu pa es ganha más dinheru pa ses dónu. Antis di el viaja pa fóra, el da ses skravu alguns taléntu ki éra txeu dinheru. Kes dôs skravu fiel foi trabadjador i es uza kel dinheru ku sabedoria. Kal ki foi rezultadu? Kantu kel dónu volta, dja es ganhaba dôs bês más txeu di ki kel dinheru ki el daba es. Kel dónu ilojia-s i fla-s pa es fika “kontenti djuntu ku [el].” (Lé Mateus 25:19-23.) Má kuzê ki kontise ku kel tirseru skravu? Kuzê ki el faze ku kel dinheru ki se dónu daba el?
11. Kuzê ki kontise ku kel skravu “prigisozu”, i pamodi?
11 Kel tirseru skravu dadu un taléntu, má el foi “prigisozu.” Se dónu ta speraba ma el ta uzaba kel un taléntu ku sabedoria. Envês di kel-li, el sukundi-l baxu txon. Kantu kel dónu volta, kel skravu ka tinha más nada pa da-l, alén di kel un taléntu ki se dónu daba el. Kel skravu ka tevi un bon atitudi. Envês di pidi diskulpa pamodi el ka konsigi ganha más dinheru pa se dónu, di manera injustu el fla ma se dónu éra “un ómi izijenti”. Kel skravu ka tevi aprovason di se dónu. Alén di kel-li, se dónu toma kel taléntu ki el daba el i el pô-l pa fóra di se kaza. — Mat. 25:24, 26-30.
12. Kenha ki kes dôs skravu fiel ta reprizenta oji?
12 Kes dôs skravu fiel ta reprizenta kes irmons skodjedu ku spritu santu ki é fiel. Kel dónu ki é Jizus, ta konvida-s pa es “fika kontenti djuntu ku [ses] dónu.” Es ta resebe ses rekonpensa di ba vive na séu, ki é kel primeru resureison. (Mat. 25:21, 23; Apo. 20:5b) Má kel mau izénplu di kel skravu prigisozu é un avizu pa kes irmon skodjedu ku spritu santu. Di ki manera?
13-14. Kuzê ki kes skodjedus ku spritu santu ta prende di kel ilustrason di taléntu? (Odja fotu ku dizenhu.)
13 Mostra ma bo é trabadjador. Sima na kel ilustrason di kes vírjen, tanbê na kel ilustrason di kes taléntu, Jizus ka staba ta fla ma kes skodjedu ku spritu santu ta ben sérba prigisozu. Má el staba ta splika kuzê ki pode kontise si un dia es perde ses zelu. Es pode ka “txomadu” nen “skodjedu”, i es pode ka dexadu entra na Reinu di Séu. — 2 Ped. 1:10.
14 Kes ilustrason ki Jizus pâpia di el sobri kes vírjen i kes taléntu ta mostra klaru ma kes skodjedu ku spritu santu debe sta priparadu i sienti, i tanbê es debe ser trabadjador. Má Jizus fla más algun kuza ki ta sirbi di avizu pa kes skodjedu? Sin, el fla! Nu ta atxa kel-li na Mateus 24:40, 41 ki tanbê ta pâpia di kel últimu julgamentu di kes skodjedu ku spritu santu.
Jizus krê pa kes skodjedu ku spritu santu mostra ma es é trabadjador ti fin. (Odja parágrafus 13 i 14.)d
KENHA KI TA BA “LEBADU”?
15-16. Modi ki Mateus 24:40, 41 ta mostra ma kes skodjedu ku spritu santu meste mante sienti?
15 Antis di pâpia di kes três izénplu, Jizus pâpia di un últimu julgamentu di kes skodjedu ku spritu santu ki ta ben mostra kenha ki sta aprovadu. El pâpia di dôs ómi ki sta ta trabadja na kanpu i di dôs mudjer ki sta ta trabadja na muinhu di mô. Na kada un di kes situason li, ta parse ma es sta ta faze mésmu trabadju. Má, Jizus fla ma “un ta lebadu i kel otu ta bandonadu.” (Lé Mateus 24:40, 41.) Dipôs el aviza ses disiplus: “Nhos mante sienti pamodi nhos ka sabe ki dia ki nhos Sinhor ta ben.” (Mat. 24:42) Jizus fla un kuza igual kantu el pâpia di kel ilustrason di kes vírjen. (Mat. 25:13) Kes avizu li sta ligadu ku kunpanheru? Ta parse ma sin. É sô kes skodjedu ku spritu santu ki é fiel di verdadi ki ta ben “lebadu” pa sta ku Jizus na se Reinu na séu. — Juan 14:3.
16 Mostra ma bu sta sienti. Kalker irmon skodjedu ku spritu santu ki ka kontinua sienti na sentidu spritual ka ta ben djunta ku kes ki Jizus “skodje”. (Mat. 24:31) I kes ki ten speransa di vive pa tudu ténpu na téra tanbê debe mante sienti i kontinua fiel.
17. Pamodi ki nu ka meste fika preokupadu si na nos ténpu Jeová disidi skodje alguns algen pa ser skodjedu ku spritu santu?
17 Dja ki nu konxe Jeová dretu, nu ta kunfia ma tudu kel ki el ta faze é justu. Nu ka ta fika preokupadu si na nos ténpu Jeová disidi skodje alguns irmon pa ser skodjedu ku spritu santu.c Nu ta lenbra kuzê ki Jizus fla sobri kes trabadjador ki txiga na désimu primeru óra na kel ilustrason di plantason di uva. (Mat. 20:1-16) Kes ki konvidadu pa trabadja tardi na dia na kel plantason di uva resebe mésmu kuantidadi di dinheru ki kes ki kumesa ta trabadja sédu na dia. Di mésmu manera, ka ta inporta na ki ténpu ki un irmon skodjedu ku spritu santu, el ta resebe se rekonpensa pa vive na séu si el mante fiel.
OBI KU KES AVIZU
18-19. Kuzê ki nu ta prende di kes ilustrason ki dja nu pâpia di el?
18 Kuzê ki dja nu pâpia di el? Pa kes ki ten speransa di vive na téra pa tudu ténpu, kel ilustrason di ovelhas ku kabritus ta mostra ma nu meste mante fiel i lial pa Jeová gósi i duránti grandi tribulason ki sta pa ben. Na futuru, Jizus ta ben julga kes ki é fiel pa bai “vive pa tudu ténpu.” — Mat. 25:46.
19 Tanbê nu odja dôs ilustrason ki ta sirbi di avizu pa kes ki é skodjedu ku spritu santu. Na kel ilustrason ki Jizus pâpia di el di kes vírjen prudenti i tola, sinku di es mostra sabedoria. Es staba priparadu i sienti, prontu pa spera noivu ténpu ki mesteba. Má kes vírjen tola ka staba priparadu. Pur isu, noivu ka dexa-s entra na se fésta di kazamentu. Nos tanbê, nu meste sta priparadu ti ki Jizus ben, ka ta inporta kantu ténpu ki dura pa el traze fin di es mundu. Tanbê, na kel ilustrason di Jizus sobri kes taléntu, nu odja kes dôs skravu fiel ki foi trabadjador. Es sforsa txeu pa djuda ses dónu i es ganha se aprovason. Má kel dónu ka aprova kel skravu prigisozu. Kuzê ki nu ta prende? Nu meste mante okupadu na sirvisu di Jeová ti fin di es mundu. Tanbê, nu odja pamodi ki kes skodjedu ku spritu santu meste mante sienti, asi pa es “lebadu” ku Jizus pa ses rekonpensa na séu. Désdi gósi es sta ku txeu vontadi di ba “sta djuntu” ku Jizus na se Reinu. Dipôs di géra di Armajedon, es ta ben ser noiva di Jizus na kazamentu di Korderu. — 2 Tes. 2:1; Apo. 19:9.
20. Kuzê ki Jeová ta ben faze pa kes algen ki obi ku se avizus?
20 Óra di Jizus ben faze julgamentu sta kuazi ta txiga, má nu ka meste ten medu. Si nu mante fiel, nos Pai na séu ki krê-nu txeu ta ben da-nu “kel puder alén di normal” asi pa nu “konsigi fika di pé frenti di Fidju di Ómi.” (2 Kor. 4:7; Luk. 21:36) Ka ta inporta si nos speransa é di bai vive na séu ô na téra, nu ta agrada nos pai si nu obi ku kes avizu ki nu ta atxa na kes ilustrason ki Jizus pâpia di el. I pamodi Jeová é un Deus xeiu di bondadi, nos nómi ta ‘atxadu skrebedu na livru di vida’. — Dan. 12:1; Apo. 3:5.
KÁNTIKU 26 É pa mi ki nhos faze-l
a Odja artigu “Kuzê ki nu sabe sobri modi ki Jeová ta ben julga na futuru?” na Séntinela di maiu di 2024.
b Pa más informason, djobe artigu “Você vai ‘se manter vigilante’?” na Séntinela di 15 di marsu di 2015.
[Nóta di rodapé]
d SPLIKASON DI FOTU: Un irman skodjedu ku spritu santu sta ta faze un studu di Bíblia pa un mudjer jóven ki el atxa na pregason.