Studa ku menti abértu

Óras ki nu ta pripara pa nu studa, talvês nu pode pensa na kel pergunta li: ‘Kuzê ki N sta ben prende?’ Má nu meste lenbra ma enbóra nu pode atxa ma dja nu sabe di kuzê ki nu sta ba prende, kel-li ka krê fla ma ka ten nada novu ki Jeová krê inxina-nu. Modi ki nu pode studa ku menti abértu?

Ora ta pidi sabedoria. Pidi Jeová pa djuda-u intende kuzê ki el krê pa bu prende na kel momentu. (Tia. 1:5) Ka bu fika kontenti sô ku kuzê ki dja bu prendeba antis. — Pro. 3:5, 6.

Dexa puder di Palavra di Deus muda bu vida. “Palavra di Deus é bibu”. (Ebr. 4:12) Nton, kada bês ki nu lé Bíblia, el pode inxina-nu algun kuza novu i djuda-nu na diferentis ária di nos vida. Má kel-li sô ta kontise si nu rekonhese ma nu meste prende kuzê ki Deus sta inxina-nu.

Mostra gratidon pa tudu kuza ki Jeová ta uza pa inxina-nu. Se kumida spritual é sima ‘un banketi di kumida rei di sábi’. (Isa. 25:6) Ka bu ivita lé asuntus ki bu ta atxa ma bu ka ta ba gosta di studa. Si bu faze si, bu ta dexa Deus djuda-u bira un algen midjór i bu ta ba xinti alegria óras ki bu ta studa!