Perguntas ki leitoris ta faze

Kal ki éra altura di pórtiku di ténplu di Salumon?

Pórtiku ta sirbiba di entrada pa kel lugar Santu di ténplu. Di akordu ku idison di Traduson di Mundu Novu ki publikadu antis di anu 2023, ‘kel pórtiku ki ta fikaba na entrada di kaza tinha mésmu largura ki kel kaza, ki éra 20 kôvadu. I se altura éra di 120 kôvadu.’ (2 Cró. 3:4) Otus traduson tanbê ta fla ma kel pórtiku tinha “120 kôvadu” di altura. Kel-li krê fla ma el éra un tori di 53 métru (175 pé) di altura!

Má, Traduson di Mundu Novu di 2023, ta fla kel-li sobri pórtiku di ténplu di Salumon: ‘Se altura éra di 20 kôvadu’, ô uns 9 métru (30 pé) di altura.a Odja pamodi ki fazedu kel mudansa li.

1 Reis 6:3 ka ta fla kal ki éra altura di pórtiku. Jeremias ki skrebe kel versíklu fla kunprimentu i largura di pórtiku, má el ka fla se altura. Dipôs, na kes otu kapítlu, el pâpia tintin pa tintin di kes otu párti inportanti di ténplu, ki ta inkluiba Mar di kóbri, kes 10 karinhu, i kes dôs pilar di kóbri ki ta fikaba na ladu di fóra di pórtiku. (1 Reis 7:15-37) Na verdadi, si pórtiku tinha más di 50 métru di altura i el ta fikaba mutu más altu ki kes otu párti di ténplu, pamodi ki Jeremias ka fla se altura? Mésmu senténas di anu dipôs, alguns skritor judeu fla ma pórtiku ka éra más altu di ki kes otu párti di ténplu di Salumon.

Studiozus ten dúvida si kes paredi di ténplu ta konsigi aguentaba un pórtiku di 120 kôvadu di altura. Kes konstruson grandi ki fazedu di pédra i tijolu na ténpu antigu, sima kes porton di ténplu na Ijitu, tinha un bazi largu i el ta ba ta fikaba stretu ti ki txiga topu. Má ténplu di Salumon éra diferenti. Studiozus ta kridita ma kes paredi ka tinha más di ki 6 kôvadu, ô 2,7 métru (9 pé), di grosura. Un studiozu di arkitetura ki txoma Theodor Busink, fla: “Ku bazi na grosura di kel paredi di entrada di ténplu [kel pórtiku], ka pode tinha 120 kôvadu [di altura].”

Kel testu di 2 Crónicas 3:4 talvês kopiadu mariadu. Enbóra alguns kópia di skrituras antigu ta fla “120” na kel versíklu li, otus testu di kunfiansa sima Kódisi Alexandrinu di séklu 5 i Kódisi Anbrozianu di séklu 6, ta fla “20 kôvadu. Pamodi ki talvês kel algen ki faze kópia ingana i el skrebe “120”? Kes palavra na ebraiku “sen (100)” i “kôvadu” ta parse ku kunpanheru. Nton, talvês kel algen ki faze kópia uza palavra “sen (100)” envês di “kôvadu”.

Enbóra nu ta sforsa pa nu intende kada párti di ténplu di Salumon i pa mostra-l di manera izatu, nu ta konsentra prinsipalmenti na kuzê ki el ta reprizenta, ki é kel grandi ténplu spritual. Nos é txeu gratu pamodi Jeová ta konvida tudu se sérvus pa adora-l na kel ténplu li! — Ebr. 9:11-14; Apo. 3:12; 7:9-17.