“Txoma ansions”

1. Modi ki Jeová ta mostra ma el ta da txeu valor pa ses ovelha?

JEOVÁ ta da txeu valor pa ses ovelha. El kunpra-s ku sangi di Jizus i el dizigina ansions na kongregason pa kuida di Se ribanhu. (Atus 20:28) Deus krê pa ses ovelha tratadu ku bondadi. Ansions ta sigi orientasons di Jizus óras ki es ta inkoraja irmons ku irmans i es ta djuda-s kontinua fiel pa Jeová. — Isa. 32:1, 2.

2. Jeová ta kuida prinsipalmenti di kenha? (Ezequiel 34:15, 16)

² Jeová ta preokupa ku tudu ses ovelha prinsipalmenti ku kes ki sta fraku. Através di ansions Jeová ta djuda kes ki ses amizadi ku el fika fraku pamodi es faze un pekadu gravi. (Lé Ezekiel 34:15, 16.) Má, Jeová krê pa nu pidi ses ajuda sénpri ki nu meste. Alén di ora ta pidi Jeová ajuda, tanbê nu meste djobe ajuda di kes “pastor i instrutor” na kongregason óras ki nu meste. — Efé. 4:11, 12.

3. Modi ki sabe kuzê ki ansions ta faze ta djuda nos tudu?

³ Na kel studu li nu sta ben odja modi ki Jeová ta uza ansions pa djuda kes algen ki ses amizadi ku el bira fraku. Nu ta ben responde kes pergunta li: Ki óra ki nu debe pidi ajuda di ansions? Pamodi ki nu debe faze kel-li? I modi ki es ta djuda-nu? Sikrê gósi nos amizadi ku Jeová sta fórti, sabe respósta pa kes pergunta li ta ben djuda-nu da más valor pa maneras ki Jeová ta uza ansions i es ta ben djuda-nu sabe kuzê ki nu pode faze óras ki nu meste di ajuda.

KI ÓRA KI NU DEBE “TXOMA ANSIONS”?

4. Modi ki nu sabe ma Tiagu 5:14-16, 19, 20 sta ta pâpia di un algen ki se amizadi ku Jeová sta fraku? (Odja imajen.)

⁴ Disiplu Tiagu splika modi ki Jeová ta uza ansions pa djuda-nu. Tiagu skrebe: “Sta algen na nhos meiu ki sta duenti? Pa el txoma ansions di kongregason.” (Lé Tiagu 5:14-16, 19, 20.) Tiagu sta ta pâpia di un algen ki meste rekupera se amizadi ku Jeová. Pur izénplu, el ta fla pa kel algen ki sta duenti ka txoma dotor, má ansions. Apóstlu Tiagu fla ma un algen ta fika dretu otu bês óras ki se pekadu purduadu. Di alguns manera, kes kuza ki ta fazedu pa trata kes algen ki sta duenti é kes mésmu ki ta fazedu pa djuda un algen ki se amizadi ku Jeová sta fraku. Óras ki nu sta duenti nu ta bai pa dotor, nu ta splika-l kuzê ki nu sta ta xinti i nu ta sigi kel orientason ki el ta da-nu. Di mésmu manera, óras ki nos amizadi ku Jeová sta fraku nu debe pâpia ku un ansion i sigi kes konsedju ki el ta da-nu ku bazi na Bíblia.

5. Modi ki nu pode sabe si nos amizadi ku Jeová sta ta bira fraku?

⁵ Na Tiagu kapitlu 5, Tiagu ta insentiva-nu pa nu pâpia ku ansions óras ki nos amizadi ku Jeová sta ta bira fraku. Má, é inportanti pidi ajuda di ansions antis di nu straga nos amizadi ku Jeová. Nu meste ser onéstu ku nos kabésa. Bíblia ta mostra ma nu pode sta ta ingana nos mê, ta pensa ma nu sta ku un bon amizadi ku Jeová, má na verdadi nu ka sta. (Tia. 1:22) É kel-li ki staba ta kontise ku alguns di kes primeru kriston na Sardis, i Jizus aviza-s ma es ka staba ta agrada Jeová. (Apo. 3:1, 2) Un manera di nu analiza nos amizadi ku Jeová é óras ki nu ta konpara kel zelu ki nu ten gósi ku kel ki nu tinha kantu nu batiza. (Apo. 2:4, 5) Nu pode pensa na kes pergunta li: ‘N ta xinti alegria na lé Bíblia i midita na el sima N ta xintiba antis? N sta pripara i N sta sisti tudu runion? Nha zelu pa pregason sta ta diminui? N ta pasa maior párti di nha ténpu ta divirti i ta pensa na kuzas material?’ Si bu responde sin pa kalker un di kes pergunta li, kel-li pode mostra ma bu amizadi ku Jeová sta ta bira fraku. Si nu ka sta konsigi bira nos amizadi ku Jeová más fórti nos sô ô si nu faze algun kuza mariadu, nu meste pidi ajuda di ansion.

6. Kuzê ki un algen ki faze un pekadu gravi debe faze?

⁶ Alguns pekadu é txeu gravi ki alguns algen pode tradu di kongregason si el ka rapende. Si nu faze un pekadu gravi nu debe pâpia ku ansion. (1 Kor. 5:11-13) Un algen ki faze un pekadu gravi ka ta pode rekupera se amizadi ku Jeová el sô. Pa Jeová purdua-nu através di sakrifisiu di resgati, nu meste ‘faze kuzas ki ta mostra ma dja nu rapende.’ (Atus 26:20) Kes kuza li ta involve pâpia ku ansion si nu faze un pekadu gravi.

7. Kenha más ki meste di ajuda di ansion?

⁷ Alén di djuda kes algen ki faze un pekadu gravi, ansions tanbê ta djuda kes algen ki ses amizadi ku Jeová sta fraku. (Atus 20:35) Pur izénplu, bu pode atxa ma sta difísil luta kóntra dizejus mariadu. Bu luta pode ser difísil prinsipalmenti si antis di bu prende verdadi bu ta uzaba dróga, bu ta odjaba pornografia ô bu ta fazeba konportamentu seksual mariadu. Ka bu xinti medu di pidi ajuda. Bu pode ba pâpia ku un ansion ki bu ta kunfia na el, ki ta obi-u ku atenson i ki pode djuda-u faze kes mudansa ki bu meste pa bu pode luta kóntra dizejus mariadu, tanbê el pode lenbra-u ma Jeová ta fika kontenti si bu kontinua ta obi ku el. (Ecl. 4:12) Talvês bu pode xinti dizanimadu pamodi bu sta kontinua ta ten dizejus mariadu, kel ansion ta djuda-u lenbra ma Jeová ta fika kontenti si bu pidi-l ajuda. Kel-li ta mostra ma bu ka ta kunfia na bu própi forsa i ma bu krê dexa Jeová kontenti. — 1 Kor. 10:12.

8. Nu meste pâpia ku ansions sobri tudu éru ki nu ta faze? Splika.

⁸ Nu ka meste pâpia ku ansions sobri tudu érus ki nu ta faze. Pur izénplu, imajina ma bu fla un irmon un kuza ki magua-l i ti bu sai di kabésa ku el. Envês di ba pâpia ku ansion sobri kel-li, bu pode aplika kel konsedju ki Jizus da sobri pâpia ku bu irmon i faze pas ku el. (Mat. 5:23, 24) Bu pode faze piskiza sobri brandura, paxénxa, kontrola bu kabésa asi pa bu pode mostra kes kualidadi li más dretu na futuru. Má, é klaru ki si inda bu ka konsigi rezolve bu prubléma bu pode pidi ajuda di ansions. Na karta ki apóstlu Paulu skrebe pa kristons na Filipus, el pidi un irmon, ki el ka fla se nómi, pa djuda Evódia ku Síntiki rezolve ses prubléma. Di mésmu manera, un ansion di bu kongregason pode djuda-u faze mésmu kuza. — Flp. 4:2, 3.

PAMODI KI NU DEBE TXOMA ANSIONS?

9. Pamodi ki nu ka debe dexa vergónha inpidi-nu di pidi ajuda di ansions? (Provérbios 28:13)

⁹ Nu meste fé i koraji pa pidi ajuda óras ki nu faze un pekadu gravi ô óras ki nu xinti ma nu ka sta konsigi luta kóntra un frakéza. Nu ka debe dexa vergónha inpidi-nu di pidi ajuda di ansions. Pamodi? Pamodi óras ki nu ta sigi orientasons di Jeová, nu ta mostra ma nu ta kunfia na el i na kes instruson ki el ta da-nu pa nu pode kontinua ku un fé fórti. Nu ta rekonhese ma nu meste se ajuda pa nu kontinua ta faze kel ki é dretu. (Sal. 94:18) I si nu faze un pekadu Jeová ta mostra-nu mizerikórdia si nu konfesa nos pekadu i nu bandona-s. — Lé Provérbios 28:13.

10. Kuzê ki pode kontise si nu tenta sukundi un pekadu?

¹⁰ Óras ki nu ta pâpia ku ansions sobri pekadus ki nu faze, Jeová pode purdua-nu i nu pode ten un bon amizadi ku el otu bês. Má, si nu ka pâpia ku ansions nu ta sufri más txeu inda. Pur izénplu, kantu rei Davidi tenta sukundi ses pekadu el fika deprimidu i duenti pamodi el sabia ma Jeová ka staba kontenti ku el. (Sal. 32:3-5) Óras ki nu sta duenti ô nu panha un pankada, si nu dimora txeu pa trata-l, el ta fika más piór. Di mésmu manera, si nu faze un pekadu gravi i nu dimora ki pidi ajuda di ansions, nu pode perde nos amizadi ku Jeová. Dja ki Jeová sabe kel-li, el ta fla-nu pa nu ‘rezolve kuzas’ ku el. Pur isu, el ta fla-nu pa nu pâpia ku ansions ki el ta uza pa djuda-nu bira se amigu otu bês. — Isa. 1:5, 6, 18.

11. Modi ki otus algen pode fika prujudikadu si nu sukundi un pekadu gravi?

¹¹ Si nu tenta sukundi un pekadu gravi, el pode prujudika otus algen. Nu pode ka dexa spritu santu di Jeová entra na kongregason i kel-li pode poi pas di nos irmons na prigu. (Efé. 4:30) Tanbê si nu fika ta sabe ma un algen na kongregason faze un pekadu gravi, nu debe insentiva-l pa el ba pâpia ku ansions sobri kel asuntu.a Si nu sukundi un pekadu gravi ki otu algen faze nu sta ta peka kóntra Jeová tanbê. (Lev. 5:1) Nos amor pa Jeová ta pô-nu ta ba pâpia ku ansions di kuzê ki kontise asi nu ta djuda kongregason mante linpu i nu ta djuda kel algen ki peka rekupera se amizadi ku Jeová.

MODI KI ANSIONS TA DJUDA-NU?

12. Modi ki ansions ta djuda kes algen ki meste rekupera ses amizadi ku Jeová?

¹² Bíblia ta fla ansions pa djuda kes ki meste rekupera ses amizadi ku Jeová. (1 Tes. 5:14) Si bu faze algun kuza ki prujudika bu amizadi ku Jeová, ansions pode faze-u perguntas pa intende kuzê ki bu sta ta pensa i modi ki bu sta ta xinti. (Pro. 20:5) Bu pode djuda-s óras ki bu ta fla-s tudu kuza ki kontise sikrê é difísil pa bo pamodi bu kultura, bu manera di ser ô bu sta ku vergónha. Ka bu preokupa si bu ka konsigi splika dretu modi ki bu sta xinti. (Jó 6:3) Ansions ka sta ba julga-u lógu pa kuzê ki bu fla. Envês di kel-li, es ta ba obi-u ku atenson asi pa es pode sabe tudu kuza antis di es da-u konsedju ku bazi na Bíblia. (Pro. 18:13) Ansions sabe ma ta leba ténpu pa da un algen kel ajuda ki el meste, pur isu es sabe ma sô un konbérsu ka ta txiga.

13. Modi ki ansions pode djuda-u óras ki es ta ora pa bo i es ta da-u konsedju ku bazi na Bíblia? (Odja imajen.)

¹³ Ansions ka krê pa bu xinti más piór pamodi kuzê ki bu faze. Envês di kel-li, es ta ora pa bo. Talvês bu pode fika dimiradu ku forsa ki ses orason pode ten. Ses ajuda tanbê ta inklui ‘poi óliu na nómi di Jeová.’ (Tia. 5:14-16) Kel óliu li é kes verdadi di Palavra di Deus. Manera ki ansions ta uza Bíblia pode konsola-u i djuda-u rekupera bu amizadi ku Jeová. (Isa. 57:18) Kes orientason di Bíblia ki es ta da-u pode da-u forsa pa bu kontinua ta faze kel ki é dretu. Através di es bu pode obi vós di Jeová ta fla-u: ‘Kel-li ki é kaminhu. Anda na el.’ — Isa. 30:21.

14. Di akordu ku Gálatas 6:1, modi ki ansions ta djuda un algen ki sta ta “bai pa un kaminhu mariadu”? (Odja imajen.)

¹⁴ Lé Gálatas 6:1. Un sérvu di Jeová ki “bai pa un kaminhu mariadu” ka sta ta faze kuzê ki Jeová krê pa el faze. Bai pa un kaminhu mariadu pode krê fla toma un mau disizon ô faze un pekadu gravi. Amor ta poi ansions ta “tenta koriji kel ómi ku un spritu di brandura.” Kel palavra na gregu traduzidu pa “koriji” tanbê pode krê fla poi un osu na lugar asi pa kel algen pode fika bon otu bês. Un bon dotor ta toma kuidadu óras ki el ta tenta poi un osu na lugar asi pa el ka poi kel algen ta xinti más dór. Di mésmu manera, óras ki ansions ta tenta koriji un algen ki bai pa un kaminhu mariadu, es ka ta krê poi kel algen ta xinti más dór inda. Envês di kel-li es ta faze ses midjór pa koriji kel irmon ku bondadi. Bíblia tanbê ta fla ma ansions debe kontinua ta “djobe pa [ses] kabésa”. Óras ki es ta djuda un algen aplika konsedjus di Bíblia es ta rekonhese ma es tanbê es é inperfeitu i es ta komete érus. Pur isu, es ta toma kuidadu pa es ka pensa ma es é más midjór ki kel algen ki es ta tenta djuda. Envês di kel-li es ta mostra umildadi i konpaxon. — 1 Ped. 3:8.

15. Kuzê ki nu pode faze si nu ten un prubléma?

¹⁵ Nu pode kunfia na kes ansion di nos kongregason. Es ta inxinadu ma es ka debe konta nos asuntu pa otus algen, ma es debe da konsedju ku bazi na Bíblia envês di ses própi opinion i ma es debe kontinua ta djuda-nu lida ku nos prubléma. (Pro. 11:13; Gál. 6:2) Kes ansion ten manera di ser diferenti i alguns ten más spiriénsia di ki otus, má nu pode xinti avontádi na txiga na kalker ansion pa pâpia di nos prubléma. É klaru ki nu ka debe bai di un ansion pa kel otu ta pidi konsedju i spera pa un di es fla-nu kuzê ki nu krê obi. Si nu faze kel-li, nu ta ser sima kes algen ki gosta pa es fazedu “gósga na obidu” envês di prende kes “ensinu ki é bon” di Palavra di Deus. (2 Tim. 4:3) Óras ki nu ta fla un ansion kal ki é nos prubléma, el pode pergunta-nu si dja nu pâpia ku otus ansion sobri kel asuntu i ki konsedju ki es da-nu. I umildadi ta pô-l pidi konsedju na otus ansion. — Pro. 13:10.

RESPONSABILIDADI KI KADA UN DI NOS TEN

16. Ki responsabilidadi kada un di nos ten?

¹⁶ Enbóra ansions ta da-nu konsedju pa djuda-nu óras ki nu ten un prubléma, es ka ta fla-nu kuzê ki nu debe faze. Kada un di nos ten responsabilidadi di mostra pa kuzas ki nu ta fla i pa kuzas ki nu ta faze na nos dia-dia ma nu ta ama Jeová i ma nu krê agrada-l. Ku se ajuda nu ta pode toma disizons ki ta mostra sabedoria i nu ta kontinua fiel pa el. (Rom. 14:12) É pamodi kel-li ki ansions ka ta fla-nu kuzê ki nu debe faze, envês di kel-li es ta uza Bíblia pa djuda-nu intende kuzê ki Jeová ta pensa sobri kel asuntu. Óras ki nu ta sigi kes konsedju ki ten bazi na Bíblia nu ta pode trena nos “kapasidadi di pensa” i toma disizons ki ta mostra sabedoria. — Ebr. 5:14.

17. Kuzê ki Jeová krê pa nu faze?

¹⁷ Nu ten un priviléjiu grandi ki é ser ovelhas di Jeová. I Jeová manda Jizus ki é “kel bon pastor”, pa da se vida pa nos asi pa nu ten oportunidadi di vive pa tudu ténpu. (Juan 10:11) Através di ansions na kongregason, Jeová kunpri kel promésa li: ‘N ta ben da nhos pastoris ki ta aji di akordu ku nha vontadi, i kumida ki es ta ben da nhos é konhisimentu i intendimentu.’ (Jer. 3:15) Óras ki nos fé sta fraku ô nu meste rekupera nos amizadi ku Jeová nu ka debe xinti medu di pâpia ku ansions. Si nu faze kel-li nu ta odja modi ki Jeová ta uza-s pa djuda-nu.