Modi ki algen ta ivita divôrsia dipôs di txeu anu kazadu

Na Mérka, entri anu 1990 i anu 2015, divórsiu entri kes algen ki ten 50 anu fika dôs bês más txeu i entri kes ki ten más ki 65 anu fika três bês más txeu. Kuzê ki ta poi kes algen ki dja ten txeu anu kazadu ta divôrsia? Kuzê ki bu pode faze pa kel-li ka kontise na bu kazamentu?

Na kel artigu li nu ta ben odja:

• Kuzê ki ta poi kes algen ki dja ten txeu anu kazadu ta divôrsia?

• Kuzê ki bu pode faze?

• Perguntas ki pode djuda nhos pâpia ku kunpanheru

Kuzê ki ta poi kes algen ki dja ten txeu anu kazadu ta divôrsia?

• Txeu bês, kazamentu di kes algen ki divôrsia dipôs ki dja es tinha txeu anu kazadu ba ta fria poku-poku. Sima ténpu ba ta pasa, alguns maridu ku mudjer kumesa ta gosta di kuzas diferenti di kunpanheru i ta parse ma es tinha poku kuza igual ku kunpanheru. Ô dipôs ki fidjus bira adultu i muda pa ses kaza, un kazal pode da kónta ma es staba konsentradu na ses responsabilidadi di ser pai i mai pa txeu ténpu i pamodi kel-la es skese di modi ki es pode ser un bon maridu i un bon mudjer.

• Na kes últimu anu, pesoas ki ta fla ma es é spesialista na kazamentu sta da maridu ku mudjer konsedju pa pensa na kes pergunta li: ‘Nha kazamentu sta pô-m ta ser filís?’ ‘El sta pô-m ta ser un algen midjór?’ ‘Nha maridu ô nha mudjer ta pô-m ta xinti amadu i ma N ten valor?’ Pesoas oji ta atxa ma si respósta pa kalker un di kes pergunta li é nau, bu ten ki faze kel ki é midjór pa bo. Kel-li krê fla divôrsia i kumesa un vida novu.

• Pesoas ka sta ta atxa ma divórsiu é un kuza mariadu más. Un sosiólugua skrebe: “Antis kalker algen ki ka staba kontenti ku se mudjer ô maridu i el krê divorsiaba el tinha ki ten un bon motivu pa fazeba kel-la. Má gósi é diferenti. Si bu ka sta kontenti na bu kazamentu bu ten ki ten un bon motivu di pamodi ki bu krê kontinua kazadu. Kel-li ta kontise pamodi pesoas oji ta kridita ma kuza más inportanti é faze kel ki é midjór pa es.”b

É klaru ki óras ki un algen divôrsia el pode kaba ku alguns prubléma, má talvês el pode ten otus prubléma. Pur izénplu, un studu ta mostra ma “kes algen ki dja ten txeu anu kazadu i ki divôrsia normalmenti ta ten txeu prubléma pamodi falta di dinheru, prinsipalmenti mudjer.”

Ten otu kuza ki é bon pensa na el. Un livruc ta fla: “Sikrê bu tenta muda bu manera di vive, bu ta kontinua ta ser kel mésmu algen. Si bu manera di pâpia ku bu maridu ô bu mudjer ka sta ta da sértu, kuzê ki bu sta ta faze pa bu muda? Kuzê ki bu sta ta faze pa muda manera ki bu ta lida ku prublémas?”d

Kuzê ki bu pode faze

• Seta mudansas. Ninhun kazamentu ka ta kontinua kel mê. Nhos kazamentu pode muda pamodi nhos fidju pode muda pa se kaza ô pamodi nhos tudu dôs pode kumesa ta gosta di kuzas diferenti di kunpanheru. Envês di krê pa kuzas kontinua sima éra antis, pensa na modi ki bu pode midjora kuzas gósi.

  

  Prinsípiu di Bíblia: ‘Ka bu fla: “Pamodi ki kes ténpu antigu éra midjór ki ténpu di gósi?” Dja ki, kel pergunta li, é ka sabedoria ki ta pô-u ta faze-l.’ — Eclesiastes 7:10.

• Kontinua ta bira más amigu di bu maridu ô di bu mudjer . Bu pode mostra interesi na algun kuza ki bu maridu ô bu mudjer sta ta gosta di el gósi? Bu pode djuda bu maridu ô bu mudjer interesa pa un kuza ki gósi bu sta ta gosta di el? Bu pode ranja algun kuza novu pa faze ô pa prende ki nhos tudu dôs ta gosta? Nhos obijetivu debe ser pasa ténpu djuntu, asi pa bo i pa bu mudjer ô bu maridu xinti ma nhos é kazadu, envês di dôs algen ta mora na mésmu kaza.

  

  Prinsípiu di Bíblia: “Pa kada algen kontinua ta djobe, ka se própi vantajen, má kel di otu algen.” — 1 Koríntius 10:24.

• Nhos kontinua ta mostra bons manera. Ka bu dexa di ser idukadu sô pamodi dja nhos ten txeu ténpu djuntu. Pâpia ku ruspetu ku bu mudjer ô bu maridu i tenta mostra bons manera sima kantu nhos staba ta namora. Fla “pur favor” i “obrigadu.” Sénpri mostra bu mudjer ô bu maridu ma bu ta ama-l i mostra ma abo é gratu pa tudu kel ki el ta faze pa bo.

  

  Prinsípiu di Bíblia: “Nhos mostra bondadi pa kunpanheru, nhos mostra konpaxon di korason”. — Efézius 4:32.

• Nhos lenbra di kes ténpu sábi ki nhos pasa djuntu. Djobe kes fotu di kantu nhos ta namoraba ô di kes kuza ki nhos fazeba djuntu. Faze kel-li pode djuda nhos kontinua ku un amor fórti pa kunpanheru i ku ruspetu na nhos kazamentu.

  

  Prinsípiu di Bíblia: “Pa kada un di nhos ama se mudjer sima el ta ama se kabésa. Tanbê, mudjer debe ruspeta se maridu di korason.” — Efézius 5:33.