Relijion debe mete na pulítika?

Na mundu interu, txeu algen ki ta fla ma es ta sigi Kristu, ta mete txeu na pulítika. Alguns di es ta apoia un partidu pulítiku pa pode djuda-s difende krénsas di ses relijion ô ses manera di vive. I pulítikus txeu bês ta uza maneras di konporta di pesoas i prublémas na sosiadadi pa ten apoiu di pesoas ki é relijiozu. Na txeu ileison ta ten xéfis di relijion ki é kandidatu. Na alguns país, un relijion ki ta fla ma el é “kriston” talvês ta dadu un tratamentu spesial i ti ta fladu ma el é un relijion nasional.

Kuzê ki bu ta atxa? Kes algen ki ta sigi Jizus debe mete na pulítika? Nu pode atxa respósta na izénplu ki Jizus da. El fla: ‘N dexa izénplu pa nhos, nton sima N faze nhos, nhos debe faze tanbê.’ (João 13:15) Ki izénplu Jizus dexa na asuntus ki ten aver ku pulítika?

Jizus mete na pulítika?

Nau. Jizus ka mete na pulítika di es mundu.

Jizus ka buska ten puder na pulítika. El ka seta ser un governanti di es mundu kantu Satanás oferese-l ‘tudu kes reinu di mundu’. (Mateus 4:8-10)a Na un otu momentu, pesoas ki rekonhese ma Jizus ta sérba un bon líder tenta pô-l mete na pulítika aforsa. Bíblia ta fla: ‘Jizus sabia ma es staba ta ben pega-l pa bira-l rei, el sai i el torna ba fika na kel monti, el sô.’ (João 6:15) Jizus ka kai na kel tentason. Envês di kel-li, el nega mete na asuntus di pulítika.

Jizus ka mete na pulítika. Pur izénplu, na ténpu di Jizus, judeus ka ta kria pagaba inpostu pa govérnu di Roma pamodi es ta atxaba ma kel inpostu éra injustu. Kantu ki es tenta poi Jizus pa skodje un di kes ladu, el ka fika ta diskuti sobri inpostu. El fla-s: ‘Nhos paga Séza kel ki é di Séza, má nhos da Deus kel ki é di Deus.’ (Marcos 12:13-17) El ka toma ninhun ladu na kel asuntu li, má el mostra ma es devia pagaba inpostu ki govérnu di Roma ta izijiba i ki ta reprizentaba Séza. Tanbê el mostra ma nu ka ten ki obi ku tudu kuza ki autoridadis ta pidi-nu. Un algen ka pode da govérnus kel ki é di Deus i kel-li ta inklui nos adorason pa el. — Mateus 4:10; 22:37, 38.

Jizus inxina sobri Reinu di Deus, ki é un govérnu na séu. (Lucas 4:43) El ka mete na pulítika pamodi el sabia ma é ka govérnus di ómi, má é Reinu di Deus ki ta ben faze vontadi di Deus na Téra. (Mateus 6:10) Jizus ntende ma Reinu di Deus ka ta ben uzaba govérnus di ómi, má el ta ben fikaba na ses lugar. — Daniel 2:44.

Kristons na ténpu di apóstlus ta meteba na pulítika?

Nau. Sigidoris di Jizus ta obiba ku se órdi di ‘ka faze párti di mundu’. (João 15:19) Es sigi izénplu di Jizus i es ka mete na asuntus di mundu. (João 17:16; 18:36) Envês di es mete na asuntus di pulítika, es faze trabadju ki Jizus daba es, ki éra prega i inxina sobri Reinu di Deus. — Mateus 28:18-20; Atos 10:42.

Pa kristons na ténpu di apóstlus, obi ku Deus éra kuza más inportanti na ses vida. Má tanbê es sabia ma es tinha ki ruspetaba autoridadis. (Atos 5:29; 1 Pedro 2:13, 17) Es ta obiba ku leis di govérnus i es ta pagaba inpostu. (Romanos 13:1, 7) Kes lei di govérnu ta daba es proteson i kes sirvisu di govérnu ta djudaba es, má simé es ka ta meteba na pulítika. — Atos 25:10, 11; Filipenses 1:7.

Kuzê ki Stória ta fla sobri kristons di ténpu di apóstlus i pulítika

“Kristons na ténpu di apóstlus ka ta fazeba alguns kuza ki romanus ta fazeba. . . . Es ka ta meteba na asuntus di pulítika.” — Livru On the Road to Civilization—A World History (Na Estrada Para a Civilização – Uma História do Mundo), pájina 238.
“Ka ten nada ki ta mostra ma Jizus ta krê meteba na pulítika ô na géra, i. . . nu pode fla mésmu kuza sobri se disiplus.” — Livru Jesus and Judaism (Jesus e o Judaísmo), pájina 231.
“Kristons na ténpu di apóstlus ka ta misturaba relijion ku pulítika. Ses lialdadi pa Kristu éra más inportanti di ki ses lialdadi pa Séza.” — Livru César e Cristo, pájina 505.
“[Apóstlu] Polu staba dispostu na uza direitu ki el tinha kómu sidadon romanu pa iziji proteson. Má el ka ta tentaba mete na asuntus pulítiku di se ténpu. . . . Nbóra kristons na ténpu di apóstlus sabia ma es tinha ki daba ónra pa autoridadis, es sabia tanbê ma es ka tinha ki meteba na pulítika.” — Livru Beyond Good Intentions—A Biblical View of Politics (Para lá das Boas Intenções — Um Conceito Bíblico sobre a Política), pájinas 122-123.
“Kristons sabia klaru ma es ka debe meteba na pulítika . . . Inda ti komésu di séklu três, Hippolytus fla ma éra di tradison di kristons si un algen ki tinha autoridadi krê entraba na igreja, el tinha ki dexaba se kargu.” — Livru Uma História do Cristianismo, Volumi 1, pájina 337.

Oji sigidoris di Jizus ka ta mete na pulítika

Bíblia ta fla klaru ma nen Jizus nen se sigidoris ka ta meteba na pulítika. Pur isu, Tistimunhas di Jeová na mundu interu ka ta mete na pulítika di ninhun manera. Sima kristons na ténpu di apóstlus, es ta faze trabadju ki Jizus manda-s, ki é prega ‘kes notísia sábi di Reinu’ — Mateus 24:14.

a Kantu Jizus nega oférta ki Satanás faze-l, el ka nega ma Satanás tinha autoridadi pa faze-l kel oférta. Más tardi el txoma Satanás di ‘governanti di mundu’. — João 14:30