Vida ta ben ser sima éra antis di koronavírus? Modi ki Bíblia pode djuda-u na un mundu ki muda pamodi koronavírus?

“Nos tudu nu krê pa nos vida bira normal sima éra antis di koronavírus.” — Angela Merkel, xanseler ô primeru ministru di Alimanha.

Talvês bu ta konkorda ku kes palavra la, dja ki koronavírus sta kontinua ta afeta pesoas na mundu interu. Má, kuzê ki “normal” krê fla? Kuzê ki pesoas ta spéra ma es ta konsigi faze?

• Vida sima éra antis. Txeu algen tene gana di sta djuntu ku otus algen pa es da kunpanheru abrasu i mozada. Tanbê, es krê xinti más avontádi pa es viaja. É sima un dotora fla: “Txeu algen ta atxa ma ten un vida normal” é bai “restoranti, sinéma i faze otus kuza sima kes-li.”

• Ten un vida más midjór. Pa alguns algen kel-li é un oportunidadi pa es muda ses vida, asi pa es ten un vida más midjór di ki antis. Es ta atxa ma mundu meste muda. Nu meste kaba ku kes trabadju ki ta toma algen txeu ténpu i forsa, ku kes tratamentu mariadu ki ta dadu algen pamodi ses puzison na sosiadadi i tanbê ku kes duénsa ki ta afeta menti di pesoas. Ten un sinhorb ki fla: “Koronavírus da-nu oportunidadi pa nu para i pensa na nos vida, na modi ki mundu ta ben ser i ki mudansas nu pode faze na mundu. I kel-li é un oportunidadi ki ka ta dura pa tudu ténpu.”

Otus algen sufri tantu ku koronavírus, ki pa es vida ka ta ben ser “normal” sima éra antis. Pur izénplu, txeu di es perde ses trabadju, ses kaza, ses saúdi ô más piór inda kes algen ki es ta ama móre.

É klaru ki ningen ka sabe modi ki vida ta ben ser dipôs ki koronavírus kaba. (Eclesiastes 9:11) Má, Bíblia pode djuda-nu seta nos situason i lida ku kes kuza ki pode ben kontise. Tanbê, Bíblia ta pâpia di un futuru ki talvês nunka bu ka ta imajinaba, má ki nu pode ten sertéza ma ta ben kontise.

Ten un atitudi puzitivu sobri koronavírus

Dja ten txeu ténpu ki Bíblia fla ma ta ben tinha ‘duénsas ki ta spadja’ na ‘fin di es sistéma’. (Lucas 21:11; Mateus 24:3.) Óras ki nu ta nkara koronavírus di kel manera li, nu ta odja ma el é sô más un di kes kuza ki ta ben kontiseba, sima géra, tremor di téra i falta di kumida. Tudu kel-li ta mostra ma tudu kuza ki Bíblia fla ta kunpri.

Modi ki sabe kel-li ta djuda-nu: Sikrê situason di koronavírus midjora, Bíblia ta aviza-nu ma na ténpu ki nu sta ta vive ‘kuzas ta fikaba konplikadu, difísil di aguenta.’ (2 Timóteo 3:1) Sabe di kel-li ta djuda-nu lida ku kes kuza ki sta ta kontise na es ténpu difísil.

Bíblia ta djuda-nu ten un atitudi puzitivu. Ka ta dura ta ben ten grandi mudansa na es mundu ki vida sta kada bês más difísil. Kal ki é kel mudansa?

Un futuru ki bu ka sta ta spéra dipôs ki koronavírus kaba

Bíblia ka ta pâpia sô di kes txeu prubléma ki nu ta pasa pa el gósi, má tanbê el ta mostra ma ka ta dura kuzas ta ben midjora. Bíblia ta pâpia di un futuru ki ninhun govérnu di ómi ka ta pode da-nu, má ki é sô Deus ki pode da-nu. ‘El ta linpa di ses odju tudu lágua, i ka ta ten más mórti, nen ka ta ten más tristéza, nen txoru, nen dór.’ — Apocalipse 21:4.

Jeovác Deus promete: ‘Odja! N sta poi tudu kuza ta bira novu.’ (Apocalipse 21:5) El ta ben rezolve tudu kes prubléma ki nu sta ta pasa pa el, ki ta inklui tudu kes ki piora pamodi koronavírus. Kes-li é alguns kuza ki el ta ben traze:

• Saúdi perfeitu, sen duénsa i sen mórti. — Isaías 25:8; 33:24.

• Trabadju ki ta da tudu algen alegria, i ki ka ta kansa algen dimás. — Isaías 65:22, 23.

• Un vida sábi sen pobréza ku fómi. — Salmos 72:12, 13; 145:16.

• Un vida sen kes dór pamodi kuzas ki kontise na pasadu, má ku speransa di torna odja kes algen ki nu ta ama ki móre. — Isaías 65:17; Atos 24:15.

Modi ki sabe kel-li ta djuda-nu: Bíblia ta fla: ‘Nu ten kel speransa li, sima un ánkura pa nos vida’. (Hebreus 6:19, nóta di rodapé) Kel speransa ma kuzas ta ben midjora, ta djuda-nu lida ku kes prubléma difísil ki nu ta pasa pa el oji. Tanbê, ta djuda-nu ka fika preokupadu dimás, mante kalmu i ten alegria.

Má nu pode kridita mê na kes promésa di Bíblia? Odja kel artigu “Bíblia é un livru di kunfiansa i ki ta pâpia verdadi”.

Prinsípius di Bíblia ki ta djuda-nu dipôs di koronavírus

• Da vida valor

  Testu di Bíblia: ‘Sabedoria ta proteje vida di kel algen ki ten el.’ — Eclesiastes 7:12.

  Kuzê ki kel-li krê fla: Óras ki nu ta toma disizons ku sabedoria nu ten ménus xansi di fika duenti. Tenta sabe modi ki situason na lugar ki bu ta mora sta. Tenta sabe kal ki é orientason ki govérnu sta ta da sobri saúdi i suguransa, kantu algen ki sta infetadu na undi ki bu ta mora i kantu algen ki dja toma vasina.

• Toma kuidadu

  Testu di Bíblia: ‘Algen sábiu ta toma kuidadu i el ta afasta di mal, má algen stúpidu ta faze kuzas sen pensa i ta kunfia na se kabésa.’ — Provérbios 14:16.

  Kuzê ki kel-li krê fla: Kontinua ta faze tudu kel ki bu pode pa bu proteje bu saúdi. Kes algen di ária di saúdi ta fla ma koronavírus inda ta dura pa algun ténpu.

• Djobe infornasons di kunfiansa

  Testu di Bíblia: ‘Algen nosenti ta kridita na tudu palavra, má ken ki é prudenti ta pensa antis di el da kada pasu.’ — Provérbios 14:15.

  Kuzê ki kel-li krê fla: Ka bu sigi tudu konsedjus ki bu ta obi, pamodi bu pode prujudika bu saúdi si bu toma disizons ku bazi na informasons mariadu.

• Mante un atitudi puzitivu

  Testu di Bíblia: ‘Ka bu fla: “Pamodi ki kes ténpu antigu éra midjór ki ténpu di gósi?” Dja ki, kel pergunta li, é ka sabedoria ki ta pô-u ta faze-l.’ — Eclesiastes 7:10.

  Kuzê ki kel-li krê fla: Tenta vive di midjór manera, di akordu ku bu situason gósi. Ka bu fika ta pensa ma bu vida éra mutu más midjór antis di koronavírus. Tanbê, ka bu fika ta pensa na kes kuza ki bu ka konsigi faze pamodi koronavírus.

• Mostra ruspetu pa otus algen

  Testu di Bíblia: ‘Nhos onra ómis di tudu tipu’. — 1 Pedro 2:17.

  Kuzê ki kel-li krê fla: Pesoas tevi reason diferenti sobri koronavírus i se rezultadus. Mostra ma bu ta ruspeta ses opinion, má ka bu muda kes bon disizon ki bu toma. Kontinua ta mostra konsiderason pa kes ki inda ka vasina, pa kes ki dja sta algen grandi i pa kes ki ten prublémas gravi di saúdi.

• Ten paxénxa

  Testu di Bíblia: ‘Amor ten paxénxa i el é bon.’ —1 Coríntios 13:4.

  Kuzê ki kel-li krê fla: Óras ki bu ta odja algen ku medu di faze kuzas ki éra normal es fazeba antis di koronavírus, ten paxénxa ku es. Tanbê ten paxénxa ku bu kabésa óras ki bu ta faze planus pa faze kuzas ki bu ka sta fazeba antis pamodi koronavírus.

Modi ki Bíblia sta ta djuda pesoas lida ku koronavírus

Kes promésa di Bíblia sobri un futuru midjór sta ta konsola Tistimunhas di Jeová i sta ta djuda-s ka konsentra na koronavírus. Tanbê es ta obi ku kel órdi di Bíblia di sta sénpri na runion pa adora Deus i asi es ta djuda kunpanheru. (Hebreus 10:24, 25) Tudu algen sta konvidadu pa sisti runion di Tistimunhas di Jeová, ki duránti koronavírus sta ta fazedu pa internet.

Alguns algen ta konkorda ma kes runion li sta ta djuda-s duránti es ténpu difísil. Pur izénplu, un mudjer ki panha koronavírus seta konviti pa sisti runion di Tistimunhas di Jeová pa internet. Kes runion djuda-l xinti más midjór, sikrê ku kes prubléma gravi di saúdi ki el kontinua ta xinti pamodi koronavírus. El fla: “N ta xinti ma N ta faze párti di kel família li. Lé Bíblia ta kalma-m i ta da-m pas déntu mi. Tanbê, el ta djuda-m konsentra na nha speransa pa futuru, envês di konsentra na nhas prubléma. Obrigadu pamodi nhos djuda-m ten un amizadi ku Deus, ki é un kuza ki N staba ta djobe nha vida interu.”