Bíblia pode djuda-u liberta di vísiu di dróga?

Tudu anu, milhons di algen ta móre pamodi es ta uza dróga. Duránti es ténpu di COVID-19, kel prubléma li fika más piór inda. Bíblia ten stadu ta djuda txeu algen liberta di vísiu di dróga. Si bu sta ta luta ku kel prubléma li, Bíblia pode djuda-u tanbê.a

Na kel artigu li

Pamodi ki nu debe djobe orientason di Bíblia pa djuda-nu liberta di un vísiu?

Kes algen ki ta faze piskiza diskubri ma txeu bês, algen ta uza dróga pamodi es sta ta xinti es sô, es sta txeu preokupadu ô diprimidu. Bíblia pode djuda-u ten kel fé ki bu meste pa bu konsigi lida ku kes prubléma ki pode poi algen ta fika visiadu na dróga. I el ta mostra-u modi ki bu pode ten un amizadi fórti ku Deus. (Salmo 25:14) Deus pode djuda-u sabe lida ku kes prubléma ki pode parse ma bu ka ta konsigi rezolve bo sô. — Marcos 11:22-24.

Kuatu konsedju di Bíblia ki pode djuda-nu liberta di un vísiu

1. Konxe Jeová Deus.b (João 17:3) El é Kriador i se puder ka ta kaba. Más di ki kel-li, el é bu Pai na Séu ki ta ama-u txeu. El krê ser bu amigu i uza se puder pa djuda-u. (Isaías 40:29-31; Tiago 4:8) Si bu disidi seta se amor, el promete ma el ta da-u un futuru sábi. — Jeremias 29:11; João 3:16.
2. Pidi Jeová pa djuda-u. Ora pa Deus i pidi-l pa el djuda-u liberta di bu vísiu pa bu pode ser ‘santu [ô, linpu] i ki [el] ta seta’. (Romanos 12:1) Através di se spritu santu ô se forsa, el ta da-u kel ‘puder alén di normal’. (2 Coríntios 4:7; Lucas 11:13) Kel puder li ta djuda-u dexa di uza dróga i dizenvolve kel ‘manera di ser novu’ ki ta agrada Deus. — Colossenses 3:9, 10.
3. Intxi bu menti ku pensamentus di Deus. (Isaías 55:9) El ta djuda-u ‘bira bu manera di pensa más novu’ ô ti muda-l. Di kel manera li, bu ta konsigi liberta di bu vísiu. (Efésios 4:23) Kes pensamentu di Deus sta na Bíblia. Pur isu, é inportanti bu lé Bíblia tudu dia. (Salmo 1:1-3) Txeu algen resebe ajuda pa ntende kuzê ki Bíblia ta inxina i kel-li foi bon pa es. (Atos 8:30, 31) Tistimunhas di Jeová ta oferese studu di Bíblia di grasa. Tanbê nu ta konvida-u pa sisti nos runion, undi ki nu ta studa kel ki Bíblia ta fla i nu ta odja modi ki nu pode aplika kes kuza ki Bíblia ta fla na nos vida.
4. Skodje dretu bus amizadi. Timenti bu sta ta luta kóntra bu vísiu, bus amigu pode influensia-u ô pa dretu ô pa mariadu. (Provérbios 13:20) Bu pode atxa bons amigu entri kes ki ta adora Deus. I Deus krê pa bu tra pruvetu di kes amizadi li. (Salmo 119:63; Romanos 1:12) Skodje dretu kuzas ki bu ta divirti ku el, pamodi é sima si bu sta ta pasa ténpu ku kes algen ki bu sta odja, ki bu sta obi ô ki bu sta lé sobri es. Fika lonji di kalker kuza ki pode krê inpidi-u di faze kel ki é dretu. — Salmo 101:3; Amós 5:14.

Testus di Bíblia ki pode djuda-u liberta di un vísiu

Salmo 27:10: ‘Sikrê nha pai ku nha mai bandona-m, Jeová ta resebe-m.’

“Nunka N ka konxe nha pai, i pamodi kel-li N ta xintiba un vaziu déntu mi. Kantu N konxe Jeová i N odja ma el é un algen rial i ki ta ama-m di verdadi, N atxa un obijetivu na vida i N konsigi liberta di nha vísiu.” — Wilby, di Aiti.

Salmo 50:15: ‘Txoma-m na dia di frónta. N ta salva-u’.

“Kel testu li txeu bês da-m forsa pa N kontinua, mésmu óras ki N ta kaíba na tentason otu bês. Jeová kunpri se promésa.” — Serhiy, di Ukránia.

Provérbios 3:5, 6: ‘Kunfia na Jeová di tudu bu korason; ka bu kunfia na bu própi ntendimentu. Lenbra di el na tudu bus kaminhu, i el ta bira-u bus kaminhu rétu.’

“Kel testu li djuda-m kunfia na Jeová, ka na nha kabésa. Ku se ajuda, N konsigi muda nha vida.” — Michele, di Itália.

Isaías 41:10: ‘Ka bu xinti medu, pamodi N sta ku bo. Ka bu fika preokupadu dimás, pamodi mi é bu Deus. N ta da-u forsa, sin, N ta djuda-u. N ta pega-u riju ku nha mô direita di justisa.’

“N ta fikaba txeu fadigadu óras ki N ka ta podia uza dróga. Kel testu li djuda-m odja ma Deus ta djudaba mi vense nha fadiga. I el faze kel-li”. — Envy, di Áfrika di Sul.

1 Coríntios 15:33: ‘Ka nhos ngana nhos kabésa. Maus koléga ta straga bons ábitu.’

“É pamodi maus koléga ki N kumesa ta uza dróga i N fika visiadu na es. Sô N konsigi larga vísiu di dróga dipôs ki N larga kes mau koléga i N pasa ta sta djuntu ku pesoas ki tinha bon konportamentu i ki N ta dimiraba ses manera di vive.” — Izaki, di Kénia.

2 Coríntios 7:1: ‘Nu linpa di tudu sujidadi di karni i di spritu’.

“Kes palavra li djuda-m kontinua ta luta pa N linpa nha korpu i larga nhas vísiu i tudu kes kuza ki staba ta straga nha vida.” — Roza, di Kulónbia.

Filipenses 4:13: ‘Pa tudu kuza N ten forsa pamodi kel ki ta da-m puder.’

“N sabia ma N ka tinha kel forsa ki N mesteba pa N liberta di kel vísiu di dróga mi sô, pur isu N óra pa Deus djuda-m. El da-m kel forsa ki N staba ta meste.” — Patrizia, di Itália.

Spiriénsias di pesoas ki konsigi liberta di vísiu di dróga ku ajuda di Bíblia

Joseph Ehrenbogen, kria na un anbienti violéntu i el fika visiadu na bebida alkólika, na sigaru, na padjinha i eroína. Txeu bês, kuazi el móre pamodi el uza dróga dimás. Má, el lé un testu na Bíblia ki da-l sertéza ma el pode mudaba. Lé se stória na artigu ku téma: “Aprendi a respeitar as mulheres e a mim mesmo”.

Dimitry Korshunov, kai na tentason txeu bês timenti el staba ta luta kóntra vísiu di bebe dimás. Odja vídiu ‘N staba kansadu ku nha manera di vive’, pa odja kuzê ki djuda-l liberta di se vísiu.

Bíblia ta proíbi djobe ajuda di dotor pa liberta di un vísiu?

Nau. Bíblia ta da kel konsedju li: ‘Kes algen ki tene saúdi ka meste dotor, má kes ki sta duenti meste.’ (Mateus 9:12) Tanbê, Instituto Nacional de Combate ao Uso de Drogas, na Mérka fla: “Vísiu di drógas é un duénsa difísil, i normalmenti kel algen ki krê para di uza dróga ten ki faze más di ki sô kontrola se dizeju.” É klaru ki kel ajuda ki Deus ta da é mutu más fórti di ki kalker forsa di vontadi ki kel algen ten. Má simé, txeu di kes ki sigi konsedjus di Bíblia i konsigi liberta di vísiu di uza dróga, tanbê mesteba di ajuda di un dotor.c Pur izénplu, un ómi ki txoma Allen, fla: “Kantu N staba ta tenta para di bebe dimás, N fika ta xinti txeu dór na korpu. Nton N odja ma alén di kel ajuda di Bíblia ki N staba ta resebe, N mesteba di ajuda di un dotor.”

Bíblia ta fla ma un algen ka debe uza dróga pa faze un tratamentu?

Nau. Na verdadi, Bíblia ta pâpia di bebida alkólika pa tratamentu di un duénsa ô pa alivia dór di un algen ki sta kuazi ta móre. (Provérbios 31:6; 1 Timóteo 5:23) Má, sima ta kontise ku bebida alkólika, kes dróga ki ta uzadu pa alivia dór pode vísia un algen. Pur isu, é bon nu sta sienti di kes prigu ki pode ten i toma txeu kuidadu na manera ki nu ta uza kes ramedi txeu fórti ki dotor ta pasa-nu pa alivia dór. — Provérbios 22:3.

a Nbóra kel artigu li ta pâpia sobri modi ki un algen pode liberta di vísiu di uza dróga, tanbê kes prinsípiu di Bíblia pode djuda kes ki sta ta pasa pa otus tipu di prubléma sima, uza bebida alkólika, fuma sigaru, kume dimás, kes ki sta visiadu na faze pósta, na odja pornografia, ô uza redi sosial.

b Jeová é nómi di kel Deus verdaderu ki sta na Bíblia. (Salmo 83:18) Odja artigu: “Ken ki é Jeová?”

c Txeu di kes séntru di tratamentu, ospital i prugrama di rekuperason pode djuda. Kada algen debe djobe ku kuidadu kes opson i dipôs disidi ki tipu di tratamentu ki é midjór pa el. — Provérbios 14:15.