Kuzê ki Bíblia ta fla sobri adora imaji?

Na un notísia ki Igreja Katólika da, es fla ma duránti un serimónia na Bazílika di Son Pedru ki fazedu na dia 25 di marsu di 2022, Papa Fransisku fika di pé dianti di státua di Maria, el “fitxa odju, el inbaxa kabésa i el faze orason déntu di el.” El “inplora Maria” ta pidi pas. Di akordu ku un otu notísia di Vatikanu, “Papa faze un orason pa Korason Imakuladu di Maria, ta pidi pa tudu algen na mundu interu, prinsipalmenti pa kes algen di Rúsia ku Ukránia.”

Kuzê ki bu ta atxa? É dretu faze orason pa imajis ô uza-s pa faze adorason? Pensa na kes testu di Bíblia li:

• ‘Ka bu faze ninhun imaji na fórma di státua pa bo, nen ninhun fórma di algun kuza ki ten di riba na séu, ô dibaxu na Téra, ô na agu dibaxu di téra. Ka bu nbaxa ses dianti nen ka bu sirbi-s, pamodi ami, Jeová, bu Deus, ami é un Deus ki ta iziji pa adora-m sô mi’. — Êxodo 20:4, 5.a

• ‘Ses imaji é di prata i oru, trabadju di mô di ómis. Es ten bóka, má es ka ta pode pâpia; es ten odju, má es ka ta pode odja. Es ten orédja, má es ka ta pode obi; es ten narís, má es ka ta pode txera. Es ten mô, má es ka ta pode palpa; es ten pé, má es ka ta pode anda. Es ka ta pode faze ninhun son ku ses garganta. Kes algen ki ta faze-s ta bira sima es, i tanbê tudu kes ki ta kunfia na es.’ — Salmo 115:4-8.

• ‘Ami é Jeová. Kel-li é nha nómi; N ka ta da ningen nha glória, nen nha lovor pa imajis na fórma di státua.’ — Isaías 42:8, nóta di rodapé.

• ‘Nhos fuji di idolatria.’ — 1 Coríntios 10:14.

• ‘Nhos ten kuidadu ku imajis.’ — 1 João 5:21.

Pa bu sabe más sobri kuzê ki Bíblia ta fla sobri adora imajis, lé artigu “O Conceito da Bíblia — Imagens” ô odja vídiu Deus ta seta pa nu uza imajis na adorason?.

Talvês bu pode krê sabe más sobri kuzê ki Bíblia ta fla sobri kes asuntu li tanbê:

• “Kuzê ki Bíblia ta inxina sobri vírjen Maria?”

• “Nu bebe ora pa vírjen Maria?”

• “Milagris i vizon, es é sinal ki ta ben di Deus?”

• “Modi ki ta ben ten pas na téra?”

Dónu di fotu: Vincenzo Pinto/AFP via Getty Images