Kuzê ki Bíblia ta fla sobri kes txeu séka na mundu?

“Xina fla ma 2022 é anu ‘más kenti’ ki dja es tevi i tanbê kel-li é kel tirseru veron más séku ki dja kontise la.” — Jornal The Guardian, 7 di setenbru di 2022.
“Previzon di ténpu ta mostra ma na alguns párti di Áfrika séka ta kontinua duránti sinku anu sigidu.” — Notísias di ONU, 26 di agostu di 2022.
“Más di metadi di Europa ta ben pasa pa un séka ki talvês pode ser kel piór ki dja kontise na kes últimu 500 anu.” — BBC News, 23 di agostu di 2022.

Txeu spesialista ta fla ma kes séka li ta kontinua i ti ma es ta ben piora. Nu pode ten speransa ma ta ben ten un futuru midjór? Kuzê ki Bíblia ta fla?

Séka i profesias di Bíblia

Bíblia dja flaba ma na nos ténpu:

‘Ta ben ten falta di kumida na un lugar tras di kel otu’. — Lukas 21:11.

Séka txeu bês ta traze falta di kumida. Kel falta di kumida li ta traze sufrimentu i ti mórti. Kes kuza li ta kunpri kel ki Bíblia dja flaba ma ta ben kontiseba. — Apocalipse 6:6, 8.

Pamodi ki séka sta ta bira kada bês más piór

Bíblia ta fla-nu kel motivu prinsipal ki ta mostra pamodi ki séka sta ta bira kada bês más piór. El ta fla:

‘[Ómi] é ka kapás di gia se kabésa.’ — Jeremias 10:23.

Kel-li krê fla ma ómi é ka kapás di ‘gia’ ô governa kunpanheru. Pamodi disizons mariadu ki ómi ta toma, ta ten séka i falta di agu.

Maioria di sientistas ta konkorda ma kuzas ki ómi sta ta faze sta poi téra bira más kenti. I pamodi kel-li, séka sta ta bira más txeu na mundu.
Kes kuza ki kes algen ganansiozu i kes algen ki ta sta na pulítika ta faze, sen pensa na futuru, ta distrui floréstas i ta traze poluison. Tanbê pamodi es ta uza mariadu kes kuza ki nu ta atxa na naturéza, kes lugar ki ten agu pode seka.

Má, Bíblia ta da-nu speransa.

Ten algun speransa pa futuru?

Bíblia ta promete ma Deus ta ben rezolve prubléma di falta di agu. Modi ki el ta ben faze kel-li?

1. Deus ta ben ‘distrui kes ki sta distrui téra.’ (Apocalipse 11:18) El ta ben rezolve prubléma di falta di agu óras ki el ta kaba ku kes algen mau i ganansiozu ki sta faze kuzas ki ta prujudika anbienti. — 2 Timóteo 3:1, 2.
2. ‘Txon séku ta ben bira un lagoa xeiu di junku’. (Isaías 35:1, 6, 7) Deus ta ben rezolve tudu kes prubléma ki séka ta traze i el ta ben bira kel téra li un paraízu ku txeu agu.
3. ‘Bu ta kuida di téra, bu ta pô-l ta da kumida txeu dimás i ku txeu rikéza.’ (Salmo 65:9) Ku benson di Deus, téra ta ben da txeu kumida i ta ben ten agu linpu pa tudu algen.