Un autoridadi na ária di saúdi aviza ma redi sosial sta ta prujudika jóvens — Kuzê ki Bíblia ta fla?

Na dia 23 di maiu di 2023, un di kes prinsipal autoridadi na ária di saúdi na Mérka, fla ma redi sosial sta ta prujudika txeu jóven.

• “Enbóra redi sosial pode djuda alguns kriansa i jóvens, ten txeu próva ki ta mostra ma redi sosial pode prujudika saúdi mental i fíziku di kriansas i jóvens.” — Redes Sociais e Saúde Mental dos Jovens: Comunicado do Cirurgião-Geral dos EUA, 2023.

Alguns piskiza ki fazedu ta djuda-nu odja pamodi ki nu debe fika preokupadu.

• Kes jóven ki ten 12 ti 15 anu, “ki ta gasta más di 3 óra pur dia na redi sosial, ten dôs bês más xansi di ten prublémas mental, ki ta inklui depreson i ansiadadi.”

• Óras ki kes jóven di 14 anu “ta uza redi sosial más txeu, normalmenti es ka ta konsigi durmi dretu, es ta sufri abuzu di kolégas pa internet, es ka ta xinti dretu ku ses aparénsia i es ta xinti diprimidu i ma es ka ten valor. Kel-li ta kontise más txeu ku mininas di ki ku rapázis.”

Kuzê ki pai ku mai pode faze pa proteje ses fidjus di kes prigu li? Bíblia ta da bons konsedju.

Kuzê ki pai ku mai pode faze

Faze bu párti. Pai ku mai, nhos pensa na kes prigu di uza redi sosial i nhos disidi si nhos ta dexa nhos fidjus uza redi sosial ô nau.

• Prinsípiu di Bíblia: ‘Iduka mininu na kaminhu ki el debe anda’. — Provérbios 22:6.

• Pa bu sabe más, lé artigu “N debe dexa nha fidju uza redi sosial?”.

Si bu dexa bu fidju uza redi sosial, presta atenson na kes prigu ki ten i na modi ki el ta uza internet. Modi ki bu pode faze kel-li?

Proteje bu fidju di kes informason prigozu. Djuda bu fidju sabe kal ki é kes informason prigozu i modi ki el pode ivita-s.

• Prinsípiu di Bíblia: “Konportamentu seksual mariadu, kalker tipu di inpuréza i ganánsia ka debe nen papiadu na nhos meiu, . . . Nen konportamentu sen vergónha, nen konbérsu tolu, nen piada indisenti”. — Efézius 5:3, 4.

• Pa bu odja alguns kuza ki pode djuda, lé artigu “Inxina bu fidju uza redi sosial ku suguransa”.

Poi limitis. Pur izénplu, poi régras di kantu ténpu bu fidju pode gasta ta uza redi sosial i ki óra ki el pode uza-l.

• Prinsípiu di Bíblia: ‘Nhos toma txeu kuidadu pa nhos anda sima algen ki ten sabedoria, ta uza nhos ténpu di midjór manera’. — Efézius 5:15, 16.

• Uza kel vídiu di dizenhus na kuadru branku Toma kuidadu óras ki bu ta uza redi sosial pa djuda bu fidju intende pamodi ki el meste poi limiti óras ki el ta uza redi sosial.