Kes txuba ku txeia ki sta faze txeu stragu — Kuzê ki Bíblia ta fla?

Na mundu interu, txeu algen sta ta lida ku kes txuba ku txeia ki sta ta faze txeu stragu. Repara na kes notísia li:

• “Na kes dia ki pasa li, kapital di Xina txobe más txeu na kes últimu 140 anu, dipôs ki kai. . . 744,8 milímitru di txuba entri sábadu i kuarta-fera.” — AP News, 2 di agostu di 2023.

• “Furakon ki txoma Khanun traze txeu txuba i béntu fórti na sul di Japon pa sugundu dia na es kinta-fera, i el mata peloménus dôs algen. . . . Sta speradu ma kel tenpistadi ta traze más txuba ki ta bai ti 600 milímitru na párti sentral di Taiuan ki ten montanhas.” — Deutsche Welle, 3 di agostu di 2023.

• “Kel txeia di kel fin di simana li [na Nova Skósia] kontise pamodi kel txuba más fórti ki dja kai na zóna di Atlántiku di Kanadá na kes últimu 50 anu.” — BBC News, 24 di julhu di 2023.

Kuzê ki Bíblia ta fla sobri kes tipu di kuza li?

Un sinal di “ténpu di fin”

Bíblia ta fla ma nu sta ta vive na un ténpu ki ta txomadu di “ténpu di fin”. (2 Timótiu 3:1) Jizus dja flaba ma duránti nos ténpu nu ta ben odjaba ‘kuzas ki ta da medu’. (Lukas 21:11) Mudansas di klima sta ta poi dizastris na naturéza ta kontise más txeu, di un manera ki algen ka sta spera i más fórti.

Un motivu pa ten speransa

Bíblia ta fla-nu ma kes monti kuza mariadu ki sta kontise oji na téra é un razon pa nu ten speransa. Modi? Jizus fla: “Óras ki nhos odja kes kuza li ta kontise, nhos fika ta sabe ma Reinu di Deus sta kuazi ta txiga.” — Lukas 21:31; Mateus 24:3.

Kes kuza ki nu sta odja ta kontise ta mostra ma ka ta dura Reinu di Deus ta ben kontrola tudu forsa di naturéza i kel-li ta inklui siklu di agu. — Jó 36:27, 28; Salmo 107:29.

Pa sabe más sobri modi ki Reinu di Deus ta ben konpo anbienti odja artigu “Kenha ki ta ben salva téra?”.